بەس كۇننىڭ ىشىندە 53 كەلىدەن استام ماريحۋانا تاركىلەندى

ايماقتار • 18 شىلدە، 2019

بەس كۇننىڭ ىشىندە 53 كەلىدەن استام ماريحۋانا تاركىلەندى

وسى ايدا جامبىل وبلىسىنىڭ اۋماعىندا ەسىرتكى مەن پسيحوبەلسەندى زاتتاردى جەتكىزۋ ارنالارىنىڭ جولىن كەسۋگە باعىتتالعان «ورمەك» جەدەل-الدىن الۋ ءىس-شاراسى ۇيىمداستىرىلعان بولاتىن. جامبىل وبلىستىق پوليتسيا دەپارتامەنتىنىڭ مالىمەتىنشە، ءىس-شارا بارىسىندا 11 قىلمىستىق قۇقىق بۇزۋشىلىق انىقتالعان. ونىڭ ىشىندە تورتەۋى قازاقستان رەسپۋبليكاسى قىلمىستىق كودەكسىنىڭ 296-بابى، 4-بولىگىمەن اسا ءىرى مولشەردە ەسىرتكى زاتتارىن ساقتاۋ بويىنشا، بىرەۋى قىلمىستىق كودەكستىڭ 300-بابىمەن قۇرامىندا ەسىرتكى بار وسىمدىكتەردى ءوسىرۋ بويىنشا جانە قىلمىستىق كودەكستىڭ 296-بابى، 1،2،3-بولىكتەرى بويىنشا التى قىلمىستىق تەرىس قىلىق دەرەكتەرى تىركەلگەن. سونىمەن قاتار، زاڭسىز اينالىمنان بەس كۇن ىشىندە 53 كەلى 646 گرامم «ماريحۋانا» ەسىرتكى زاتى تاركىلەندى.

حاميت ەسامان

جامبىل وبلىستىق پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى 12 شىلدە كۇنى جۋالى اۋدانىنىڭ بايتەرەك جانە قىزىلارىق اۋىلدارى اراسىنداعى تاس جولىندا نۇر-سۇلتان قالاسىندا ۋاقىتشا تۇراتىن، بۇرىن سوتتالماعان جانە ۋاقىتشا جۇمىسسىز وزبەكستان رەسپۋبليكاسىنىڭ 36 جاستاعى ازاماتىن ۇستادى. ودان سالماعى 3 كەلى 786 گرامم بولاتىن «ءۇندى ماريحۋاناسى» تاركىلەندى. «كۇدىكتى كىناسىن مويىندادى جانە جۋالى اۋدانىنىڭ ۋاقىتشا ۇستاۋ يزولياتورىنا قامالدى. قازاقستان رەسپۋبليكاسى قىلمىستىق كودەكسىنىڭ 296-بابى 4-بولىگى بويىنشا سوتقا دەيىنگى تەرگەۋ امالدارى جۇرگىزىلۋدە. سونىمەن قاتار، ءدال وسى كۇنى شۋ اۋدانىنىڭ «اسپارا-تاسوتكەل» قۇمدى ايماعىندا سالماعى 5 كەلى 400 گرامم «ماريحۋانا» ەسىرتكى زاتىمەن 34 جاستاعى نۇر-سۇلتان قالاسىنىڭ تۇرعىنى ۇستالدى. كۇدىكتى كىناسىن مويىندادى جانە شۋ اۋداندىق پوليتسيا باسقارماسىنىڭ ۋاقىتشا ۇستاۋ يزولياتورىنا قاماۋعا الىندى. بۇگىندە قازاقستان رەسپۋبليكاسى قىلمىستىق كودەكسىنىڭ 296-بابى 4-بولىگى بويىنشا سوتقا دەيىنگى تەرگەۋ امالدارى جۇرگىزىلۋدە»، دەيدى جامبىل وبلىستىق پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باستىعى، پوليتسيا پودپولكوۆنيگى اسحات المەتوۆ.

جامبىل وبلىسى