سەنات دەپۋتاتتارى ەڭ الدىمەن اۋدان باسشىسى جانات اسانتاەۆپەن بىرگە اۋداندىق جۇمىسپەن قامتۋ ورتالىعىنىڭ جۇمىسىمەن تانىسىپ, مەملەكەتتىك اتاۋلى الەۋمەتتىك كومەك الۋشى كوپ بالالى وتباسىلارمەن كەزدەستى. سەناتورلار اۋدان اقساقالدارىمەن, اۋداندىق مەكەمەلەردىڭ, شارۋا قوجالىقتارىنىڭ باسشىلارىمەن جانە بەلسەندى جاستارمەن جۇزدەسىپ, جەرگىلىكتى جەردەگى وزەكتى ماسەلەلەرگە قۇلاق ءتۇردى. كەزدەسۋلەر بارىسىندا ەلباسىنىڭ جولداۋى مەن پرەزيدەنت العا قويعان مىندەتتەر كەڭىنەن ءتۇسىندىرىلىپ, اۋدانداعى جالپى شەشىمىن تاپپاي جۇرگەن جول سالۋ ماسەلەسى كوتەرىلدى.
سەنات دەپۋتاتتارى «جاسىل ەل» باعدارلاماسى بويىنشا اۋدان جاستارىنىڭ اۋىلداعى سۋ تاپشىلىعىن جويۋ ماقساتىندا ازىرلەگەن «بۇلاق كورسەڭ, كوزىن اش» اتتى جوباسىن ءبىراۋىزدان قولدايتىندارىن جەتكىزدى. وڭىردەگى كەلەلى ماسەلەلەردى تالقىلاعاننان كەيىن دەپۋتاتتار اۋدان تۇرعىندارىن جەكە باسىنىڭ ماسەلەسى بويىنشا جەكە قابىلدادى. قابىلداۋدا كوپبالالى انالاردىڭ زەينەتاقى جاسىنا وزگەرىس ەنگىزۋ, قازاقستان رەسپۋبليكاسىنىڭ جەر كودەكسى مەن «مەملەكەتتىك ساتىپ الۋ تۋرالى» زاڭىنا وزگەرىستەر ەنگىزۋ, «ديپلوممەن – اۋىلعا» باعدارلاماسى بويىنشا تۇرعىن ءۇي قۇرىلىسىن جۇرگىزۋ ءۇشىن كەزەكسىز جەر بەرۋ, اۋىلشارۋاشىلىعى ونىمدەرىن وندىرۋگە قاتىستى ۇسىنىستار ايتىلدى جانە وعان دەپۋتاتتار تاراپىنان تولىق تۇسىندىرمە بەرىلدى. سەنات دەپۋتاتتارى اۋدانداعى حالىق يگىلىگى ءۇشىن سالىنىپ جاتقان نىسانداردىڭ ءبىرى – ءبىر پاتەرلى 67 تۇرعىن ءۇي كەشەنى قۇرىلىسىمەن تانىستى. ماۋسىم ايىندا باستاۋ العان قۇرىلىس جۇمىستارى قازىرگى تاڭدا جالعاسىن تابۋدا.
