جيىننىڭ باستى تاقىرىبى ۇكىمەتتىڭ كەڭەيتىلگەن وتىرىسىندا مەملەكەت باسشىسىنىڭ الەۋمەتتىك-ەڭبەك سالاسى بويىنشا بەرگەن تاپسىرمالارىن ىسكە اسىرۋ بولدى. جاڭا جۇمىس ورىندارىن قۇرۋ, مەكەنجاي الەۋمەتتىك كومەگىن بەرۋ, ەڭبەك قۇقىقتارىن ساقتاۋ ماسەلەلەرى جونىندە دە ءسوز قوزعالدى.
اتىراۋ وبلىسى اكىمىنىڭ ءبىرىنشى ورىنباسارى سەرىك شاپكەنوۆ بيىلعى 1 ساۋىردەن بەرى وكىلەتتى ورگاندارعا ااك بويىنشا كەڭەس سۇراپ 14 314 ادام كەلگەنىن اتاپ ءوتتى. قازىر ايماقتا 32 670 ادام (5 748 وتباسى) مەكەنجاي الەۋمەتتىك كومەگىن الادى.
مينيستر بەردىبەك ساپارباەۆ بيىل جاستاردى, مۇمكىندىگى شەكتەۋلى جاندار مەن از قامتىلعان وتباسىلاردى مەملەكەتتىك قولداۋ شارالارىنىڭ اياسى كەڭەيگەنىن, پرەزيدەنت تاپسىرماسىمەن جەڭىلدەتىلگەن نەسيە بەرۋ, ۇيىندە ىستەيتىن الەۋمەتتىك جۇمىس ورىندارىن اشۋ, بيزنەس نەگىزدەرىنە, جاڭا ماماندىقتارعا وقىتۋعا قوسىمشا 50 ملرد تەڭگە بولىنگەنىن ايتتى. مۇمكىندىگى شەكتەۋلى جانداردى وڭالتۋدىڭ تەحنيكالىق قۇرالدارمەن تولىق قامتاماسىز ەتىلۋى ماڭىزدى ەكەنىنە توقتالعان مينيستر اقتوبەدە «الەۋمەتتىك قىزمەتتەر پورتالى» قاناتقاقتى جوباسى باستالعانىن اتاپ ءوتتى. «بۇل مۇگەدەك جاندارعا مەملەكەتتىك ساتىپ الۋعا قاراماي, قاجەتتى تەحنيكالىق قۇرالدار مەن قىزمەتتەردى ءوزى, جەكە ەرەكشەلىكتەرىن ەسكەرە وتىرىپ الۋعا مۇمكىندىك بەرەدى»,-دەدى بەردىبەك ساپارباەۆ. مينيستر ەلىمىزدىڭ بارلىق وبلىستارىندا وڭالتۋ ورتالىقتارى بولۋى ءتيىس ەكەنىن ايتىپ, ەندىگى كەزەكتە اۋدانداردا شاعىن كەشەندى ورتالىقتار اشىلاتىنىن ءمالىم ەتتى.
كەڭەستە, سونداي-اق, ءىرى كاسىپورىن باسشىلارىنا قىزمەتكەرلەرىنىڭ ەڭبەك قۇقىقتارىن ساقتاۋ, قاۋىپسىز ەڭبەك جاعدايىن قامتاماسىز ەتىپ, قازاقستاندىق جۇمىسشىلار مەن شەتەلدىكتەرگە بىردەي جاعداي جاسالۋى كەرەكتىگى ايتىلدى.
قر ەڭبەك جانە حالىقتى الەۋمەتتىك قورعاۋ ءمينيسترى جۇمىس ساپارى كەزىندە اتىراۋداعى الەۋمەتتىك قىزمەتتەر ورتالىعى مەن حالىقتى جۇمىسپەن قامتۋ ورتالىعىنىڭ قىزمەتىمەن تانىسىپ, ايماقتا اتقارىلىپ جاتقان ىستەرگە وڭ باعا بەردى.
اتىراۋ
