«بولاشاق» كورپوراتيۆتىك قورىنىڭ «وزىڭنەن باستا» جوباسى اياسىندا Disney ونىمدەرىن قازاق تىلىندە دۋبلياجداۋ جۇمىسى ەلىمىزدە 2011 جىلدان بەرى جۇزەگە اسىپ كەلەدى. «ارىستان پاتشا» ءمۋلتفيلمى اتالعان جوبا اياسىنداعى 31-ءشى تۋىندى.
«BI Group كومپانياسىنىڭ دەمەۋشىلىگىمەن جانە Nur Otan پارتياسى مەن الماتى قالاسى اكىمدىگىنىڭ قولداۋىمەن جۇزەگە اسىرىلعان كەزەكتى تۋىندىمىز بۇگىننەن باستاپ كورەرمەنگە جول تارتتى. بۇل «وزىڭنەن باستا» جوباسى اياسىنداعى 31-ءشى كورىنىس. قازاق كورەرمەنىن قىزىقتى قازاقشا رەمەيكتەرمەن قۋانتا بەرەمىز. «بولاشاق» كورپوراتيۆتىك قورى مەن BI Group كومپانياسى Walt Disney Pictures, Pixar جانە Sony Pictures كومپانيالارىنىڭ تاعى 7 ءفيلمىن دۋبلياجداۋعا 2020 جىلعا ارنالعان مەموراندۋمعا قول قويدى», دەدى «بولاشاق» كورپوراتيۆتىك قورى قامقورشىلىق كەڭەسىنىڭ توراعاسى د.چايجۋنۋسوۆا.
فيلمدەگى كەيىپكەرلەردى قازاقشا سويلەتۋگە وتاندىق كينو جانە تەاتردىڭ جەتەكشى اكتەرلەرى تارتىلعان. اتاپ ايتار بولساق, مۋفاسا بەينەسىن قر ەڭبەك سىڭىرگەن قايراتكەرى, رەجيسسەر بەكبولات قۇرمانعوجاەۆ قازاقشالاسا, ءسارابيدى كينو جانە تەاتر اكتريساسى التىناي نوگەربەك, شەنزيدى جاس اكتريسا سايا توقمانعاليەۆا, رافيكيدى قر ەڭبەك سىڭىرگەن قايراتكەرى, اكتەر بولات ىبىراەۆ, پۋمبانى اكتەر جانىبەك مۇساەۆ, تيموندى تەاتر جانە كينو اكتەرى داۋرەن سەرعازين دىبىستادى. بالا سيمبانى – بەكنۇر ىبىراي, ەرەسەك سيمبانى – ولجاس جاقىپبەك قازاقشالادى. سول سياقتى نالانىڭ بالا كۇنىن – دينار قالدىبەك دىبىستاسا, ەرەسەك كۇنىن ناۋرىز ساباعاتوۆا قازاقشا سويلەتكەن. دۋبلياج رەجيسسەرى – شاح-مۇرات ورداباەۆ, مۋزىكالىق رەداكتور – انەل توكيروۆا.
فيلمدەگى باستى ساۋندترەكتى تانىمال قازاقستاندىق ءانشى مارجان اراپباەۆا ورىنداعان. ال ءانشى بەيونسە ورىنداعان ارىستان نالانىڭ «العا» ءانىن «X-Factor» جوباسىنىڭ جەڭىمپازى داريا گابدۋلل شىرقادى. ءفيلمنىڭ كاستينگىنە نۇر-سۇلتان جانە الماتى قالالارىنان 50-دەن اسا اكتەر قاتىسقان.
ەسكە سالا كەتەيىك, «وزىڭنەن باستا» جوباسى اياسىندا قازاق تىلىنە گولليۆۋدتىڭ 31 كينوتۋىندىسى دۋبلياجدالدى. ولاردىڭ ىشىندە «تاچكي-2», «مستيتەلي-2: ەرا الترونا», «حرابرايا سەردتسەم», «تاينا كوكو», «موانا», «مالەفيسەنتا», «الاددين», «يستوريا يگرۋشەك-4» جانە ت.ب. فيلمدەر بار.
