گرەك-ريم كۇرەسى شەبەرلەرىنىڭ باسەكەسىن بارشا قازاقستاندىق جانكۇيەرلەر تاعاتسىزدانا كۇتۋدە. سەبەبى سپورتتىڭ بۇل تۇرىندە بىزدە جەڭىسپەن ورىلگەن تاماشا ءداستۇر دە, مىقتى باپكەرلىك مەكتەپ تە, بۇلا كۇشتەرى بۇلقىنعان بالۋاندار دا بار. اسا ءىرى حالىقارالىق جارىستاردا جەڭىپ العان جۇلدەلەرىمىز دە جەتەرلىك. بىراق ءبىر وكىنىشتىسى, كۇرەستىڭ وسى ءتۇرىن سەرىك ەتكەن ورەندەرىمىزدىڭ الەم چەمپيوناتىنىڭ التىن تۇعىرىنا كوتەرىلە الماعانىنا باقانداي 20 جىل بولدى. سوڭعى رەت سوناۋ 1999 جىلى گرەكيانىڭ استاناسى – افينىدا وتكەن ءدۇبىرلى دودادا محيتار مانۋكيان باس جۇلدەنى ولجالاعان ەدى. ودان كەيىن تالاي دۇرمەكتە كۇمىس پەن قولاعا قولىمىز جەتكەنىمەن, التىن مەدالدىڭ سىڭعىرىن ءبىر ەستىمەدىك. بالكىم, ءداپ وسى قازاقستاننىڭ باس شاھارىندا جالاۋى جەلبىرەيتىن اسا جاۋاپتى جارىستا جالىنداپ تۇرعان جىگىتتەرىمىزدىڭ ءبىرى سول ولقىلىقتىڭ ورنىن تولتىرىپ, قازاق ەلىنىڭ ءانۇرانىن شىرقاتادى دەپ ۇمىتتەنەمىز.
1993-2008 جىلدار ارالىعىندا قازاقستاننىڭ گرەك-ريم كۇرەسى شەبەرلەرى الەم چەمپيوناتتارىندا 21 مارتە بوي كورسەتتى. سونىڭ التاۋىندا سۇرەڭسىز ونەر كورسەتتىك. اتاپ ايتساق, 2001 جىلى – پاترىدان, 2002 جىلى – ماسكەۋدەن, 2006 جىلى – گۋانجوۋدان, 2007 جىلى – باكۋدەن جانە 2014 جىلى تاشكەنتتەن قۇر قول قايتتىق. وليمپيادا باعدارلاماسىنا ەنبەگەن سالماق دارەجەلەرى بويىنشا 2016 جىلى بۋداپەشتە ۇيىمداستىرىلعان باسەكەدە دە جولىمىز بولمادى. ال وزگە جارىستاردا تومەندەگىدەي ناتيجەلەرگە قول جەتكىزدىك:
قازاقستاننىڭ ۇلتتىق قۇراماسى الەم چەمپيوناتىنا تۇڭعىش رەت 1993 جىلى قاتىستى. ستوكگولمدە 30 جاستاعى داۋلەت تۇرلىحانوۆ جيىرمانىڭ ىشىندەگى جالىنداپ تۇرعان جاستاردىڭ تالايىن جولىنان ىعىستىرىپ, كۇمىس مەدالدى موينىنا ءىلدى. 82 كيلو سالماقتا كۇش سىناسقان داڭقتى بالۋان تەك سول كەزدەگى تۇركيانىڭ جاس جۇلدىزى, كەيىننەن ەكى دۇركىن وليمپيادا, ءۇش دۇركىن الەم جانە سەگىز دۇركىن ەۋروپا چەمپيونى اتانعان حامزا ەرلىكايعا عانا ءالى جەتپەدى. وسىلايشا داۋلەت بولات ۇلىنىڭ ەسىمى الەم چەمپيوناتىندا جۇلدە العان تۇڭعىش بالۋان رەتىندە تاۋەلسىز قازاقستاننىڭ تاريحىندا قالدى.
1994 جىلعى جارىستى تامپەرە قالاسى قابىلدادى. سۋومي ەلىندە يۋري مەلنيچەنكونىڭ مەرەيى ۇستەم بولدى. ءبىر عاجابى, 57 كيلو سالماقتا بەلدەسكەن ول فينالدا الەمنىڭ ەكى دۇركىن چەمپيونى جانە ءۇش دۇركىن جۇلدەگەرى, رەسەيلىك الەكساندر يگناتەنكوعا سوقىر ۇپاي ۇستاتقان جوق. يۋرا – كۇرەس تۇرلەرى بويىنشا تاۋەلسىز قازاقستاننىڭ تۇڭعىش الەم چەمپيونى!
1995 جىلى پراگادان قوس كۇمىس مەدالمەن ورالدىق. بارلىق قارسىلاستى بەت قاراتپاي ۇتىپ كەلە جاتقان يۋري مەلنيچەنكو فينالدا ءسۇرىندى. ونىڭ جولىن بوگەگەن اقش سپورتشىسى دەننيس حول. 74 كيلو سالماق دارەجەسىنىڭ جارتىلاي فينالىندا بارسەلونا وليمپياداسىنىڭ جەڭىمپازى, الەمنىڭ ءۇش جانە ەۋروپانىڭ ەكى دۇركىن چەمپيونى, رەسەيلىك مناتساكان يسكاندارياندى ويسىراتا ۇتقان باقتيار بايسەيىتوۆ اقتىق ايقاستا فرانتسيالىق يۆون ريمەرگە ەسە جىبەردى.
1997 جىلى ۆروتسلاۆتا يۋري مەلنيچەنكو ەكىنشى رەت الەم چەمپيونى اتاندى. 58 كيلو سالماقتا بەلدەسكەن ول رەسەيدىڭ تۋى استىندا ونەر كورسەتەتىن ارميان جىگىتى رافيك سيمونيانعا سان سوقتىردى.
1998 جىل ەل سپورتى تاريحىندا التىن ارىپتەرمەن جازۋلى. شۆەتسيانىڭ ەۆلە قالاسىندا ەكى بىردەي وتانداسىمىز جەڭىس تۇعىرىنىڭ ەڭ بيىك ساتىسىنا كوتەرىلدى. 63 كيلو سالماقتاعى محيتار مانۋكيان فينالدا ءتۇركيانىڭ تارلانى شەرەف ەروعلىنى ەڭسەردى. 76 كيلو سالماقتاعى باقتيار بايسەيىتوۆ سول كەزدەگى اتلانتا وليمپياداسىنىڭ جەڭىمپازى, كەيىننەن سيدنەي وليمپياداسىندا دا توپ جارعان كۋبانىڭ قابىلانى فيليبەرتو اسكۋي اگيلەرانىڭ اياعىن كوكتەن كەلتىردى. داۋلەت تۇرلىحانوۆ باپتاعان قازاقستاننىڭ ۇلتتىق قۇراماسى جالپى كوماندالىق ەسەپتە رەسەي مەن وڭتۇستىك كورەيادان كەيىنگى ءۇشىنشى تۇعىرعا تابان تىرەدى.
1999 جىلى محيتار مانۋكيان ەكى دۇركىن الەم چەمپيونى اتاندى. وسى جارىستىڭ فينالىندا ول تاعى دا تۇركيالىق شەرەف ەروعلىنى جەڭدى. يۋري مەلنيچەنكو دا ەكىنشى رەت كۇمىس مەدالدى موينىنا ءىلدى. ول الەم چەمپيونى, ازيا ويىندارىنىڭ جەڭىمپازى, كورەيالىق كيم ين سوپتان ۇتىلدى. كوماندالىق ەسەپتە قازاقستان قۇراماسى تۇركيامەن بىرگە ءتورتىنشى جانە بەسىنشى ورىنداردى ءوزارا ءبولىستى.
2003 جىلى كرەتەيدە گەورگي تسۋرتسۋميانىڭ اسىعى الشىسىنان ءتۇستى. اسا اۋىر سالماقتا كۇرەسكەن ول قولا مەدالدى يەلەندى. 2005 ءجانە 2009 جىلدارى دا ءدال سونداي كورسەتكىشكە قول جەتكىزدىك. بۋداپەشتە 55 كيلو سالماقتاعى ەرمەك كوكەتوۆ, ال حەرنينگتە 60 كيلو سالماقتاعى نۇرباقىت تەڭىزباەۆ ءۇشىنشى تۇعىرعا جايعاستى.
2010 جىلى ماسكەۋدە المات كەبىسباەۆ پەن نۇرماحان تىناليەۆ قولا مەدالداردى مويىندارىنا ءىلدى. 60 كيلو سالماقتاعى المات ازەربايجاندىق گاسان اليەۆ پەن جاپونيالىق ريۋتارو ماتسۋموتونى, ال 120 كيلو سالماقتاعى نۇرماحان كۋبالىق ميحاين لوپەس پەن ارمەنيالىق يۋري پاتريكەەۆتى عانا العا جىبەردى.
2011 جىلى ىستانبۇلدا المات كەبىسباەۆتىڭ باس جۇلدەنى ولجالاۋعا تاماشا مۇمكىندىگى بولدى. بارلىق قارسىلاستارىن ءبىر دەممەن ۇتقان قانداسىمىز فينالعا شىققانىمەن, شەشۋشى تۇستا ءۇمىت نورۋزيدەن ۇتىلدى. كەلەسى جىلى يران بالۋانى وليمپيادا چەمپيونى اتاندى. الىپتار سايىسىندا نۇرماحان تىناليەۆ ءۇشىنشى ورىندى ەنشىلەدى.
2013 جىلى بۋداپەشتە نۇرماحان تىناليەۆ ءۇشىنشى مارتە الەم چەمپيوناتىنىڭ قولا جۇلدەگەرى اتاندى. 2015 جىلى لاس-ۆەگاستا 59 كيلو سالماقتاعى المات كەبىسباەۆ پەن 75 كيلو سالماقتاعى دوسجان قارتىقوۆ ءۇشىنشى ساتىعا تابان تىرەدى. 2017 جىلى پاريجدە قازاقتىڭ قوس بالۋانى فينالعا شىقتى. بىراق ەكەۋى دە باس جۇلدە ءۇشىن تارتىستا قارسىلاستارىنا ەسە جىبەرىپ, كۇمىس مەدالدى يەلەندى. 59 كيلو سالماقتاعى مەيرامبەك ايناعۇلوۆ جاپونيانىڭ جۇلدىزى كەنيتيرو فۋميتودان ۇتىلسا, 71 كيلو سالماقتاعى دەمەۋ جادىراەۆ گەرمانيالىق فرانك شتەبلەردەن جەڭىلدى.
بىلتىرعى الەم چەمپيوناتىن قايتا ۆەنگريانىڭ باس شاھارى قابىلدادى. بۇل جارىستا بۇرىندارى ءدۇبىرلى دودالاردا كوپ كوزگە تۇسە قويماعان 60 كيلو سالماقتاعى ايدوس سۇلتانعالي مەن 67 كيلو سالماقتاعى مەيىرجان شەرماحانبەتتىڭ ونەرىنە قۇلشىنا قول سوقتىق. قوس قانداسىمىز قولا مەدالداردى مويىندارىندا جارقىراتتى.
P.S سوڭعى بەس الەم چەمپيوناتىندا بارلىعى 33 مەملەكەتتىڭ گرەك-ريم كۇرەسى شەبەرلەرى جۇلدەلى ورىنداردى يەلەندى. 13 ەلدىڭ ورەندەرى التىن تۇعىرعا كوتەرىلدى. قورجىنىندا 2 كۇمىس جانە 4 قولا مەدالى بار قازاقستاننىڭ بالۋاندارى جالپى ەسەپتە 14-ورىنعا جايعاستى.
