الدىمەن وسى ۇجىمنىڭ بەلدى اكتەرى, مادەنيەت قايراتكەرى بولات مامىتبەكوۆتىڭ ءالى سياسى كەبە قويماعان تىرناقالدى تۋىندىسىنا ارقاۋ بولعان تۇلعا جايلى بىرەر ءسوز. نوعايباي باتىربەك ۇلى 1834–1917 جىلدارى قازىرگى م.جۇماباەۆ اۋدانىندا ءومىر ءسۇرگەن. قازاقستان مەن رەسەي مۇراعاتتارىندا ساقتالعان قۇجاتتارعا قاراعاندا پولۋدين بولىسىن باسقارا وتىرىپ, ەل, جەر داۋلارىنا ارالاسىپ, حالىق پايداسىنا شەشىپ وتىرعان. وت اۋىزدى, وراق ءتىلدى شەشەن, بي رەتىندە ادىلدىگىمەن قارا قىلدى قاق جارعان. مەملەكەتارالىق ءماسەلەلەرگە دە ارالاسىپ, پاتشالىق وتارلاۋ ساياساتىنا قارسىلىعىن اشىق بىلدىرگەن. رەسەيدىڭ الەۋمەتتىك ساياسي ارحيۆىنەن بابامىزدىڭ ءبىر توپ بيلەرمەن 1876–1877 جىلدارداعى ورىس-تۇرىك سوعىسىنا قاتىستى پاتشاعا جولداعان حاتى تابىلعان. سوعان قاراعاندا ءتۇبى ءبىر ءتۇركى تۋىسقاندارعا قولداۋ كورسەتۋگە تىرىسقانىن اڭعارۋ قيىن ەمەس. ومبى ارحيۆىندە ساقتالعان ءبىر قۇجاتتا پاتشا شەكارالىق ايماقتا تىنىشتىق, اۋىزبىرشىلىك ورناتۋعا زور ۇلەس قوسقان بيگە ءوز ريزاشىلىعىن بىلدىرگەنى ايتىلعان.
سپەكتاكل جەلىسى حالقىنا پانا, ۇلتىنا قامقور بولعان تۇلعانىڭ ومىرىنەن الىنعان ناقتى وقيعالار نەگىزىندە قۇرىلا وتىرىپ, پاراساتتى, كەمەڭگەرلىك بيىك تۇلعاسىن جان-جاقتى سومداۋعا ارنالعان. ەرلى-زايىپتىلار اراسىنداعى تۇرمىستىق جانجالداردان باستاپ جەر, مال داۋى, وتارلاۋ ساياساتى ابدەن دەندەگەن قوعامداعى شىتىرمان قايشىلىقتار انىق تا نانىمدى سۋرەتتەلەدى. ەل بىرلىگى, اتاكاسىپتى دامىتۋ, اعايىندىق تاتۋلىق, وقۋ-بىلىمگە شاقىرۋ ماسەلەلەرى تالقىعا تۇسكەندە ءبيدىڭ «ىنتىماقسىز ەلدى ۇرىس بيلەيدى. ىنتىماقتى ەلدى ىرىس بيلەيدى. ءبىز كەتەرمىز.ەندىگى ەل مەن جەردىڭ يەسى دە, كيەسى دە سەندەرسىڭدەر. بۇگىن ۇرپاقتىڭ الدىندا امانات ارقالاپ تۇرسىڭ, دەپ جاس قۇراقتاي جەلكىلدەپ ءوسىپ كەلە جاتقان ۇلى اقىلبەككە اق باتاسىن بەرۋى ۇرپاقتار اراسىنداعى ساباقتاستىقتىڭ جالعاستىعىن, اتا-بابا ءداستۇرى ۇزىلمەيتىنىن, ونىڭ ارعى جاعىندا «ۇيادا نە كورسەڭ ۇشقاندا سونى ىلەسىڭ» دەگەن ءتالىم-تاربيەنىڭ جاتقانىن ءبىلدىرەدى.
باستى ءرولدى تەاتر ديرەكتورى ءبىرجان جالعاسباەۆ ءساتتى سومداپ شىققان. اكتەرلەر نۇربول قۇمارشيەۆ, داۋرەن تويبازاروۆ, اسىلحان رازيەۆ تە, كوركەمدىك جەتەكشى, «دارىن» مەملەكەتتىك جاستار سىيلىعىنىڭ يەگەرى فارحاد مولداعالي دا وزدەرىنە جۇكتەلگەن تالاپ ۇدەسىنەن كورىنە بىلگەن. جۇرتشىلىقتىڭ قايتا-قايتا قول سوعىپ, ۇلكەن قوشەمەت كورسەتۋى پرەمەرانىڭ ويداعىداي وتكەنىن اڭعارتسا كەرەك.
سولتۇستىك قازاقستان وبلىسى
