ەلىمىزدىڭ ازاماتتىق اۆياتسيا كوميتەتىنىڭ توراعاسى تالعات لاستاەۆ, سوڭعى 7-8 جىلدىڭ ىشىندە قازاقستاندا ترانزيتتىك جولاۋشىلار اعىنى 20 ەسەگە ارتقانىن ايتتى. ماسەلەن, وتكەن جىلى ەل ارقىلى اتتانعان جولاۋشىلاردىڭ سانى 900 مىڭعا جەتتى دەدى ول.
– بۇل فورۋم اۋە باعىتتارىن دامىتۋعا سەپتەسەدى دەگەن ءۇمىتتەمىز. بىرتىندەپ ليبەراليزاتسيالاۋ ساياساتىنا كوشۋدى قولعا الدىق. ول ءوز جەمىسىن بەرە باستادى. ونى ەلدەگى كومپانيالاردىڭ اشىلۋىنان بايقاۋعا بولادى. بۇگىندە جۇما سايىن قازاقستاننان الەمنىڭ 27 مەملەكەتىنە شامامەن 500-گە جۋىق رەيس ورىندالادى. بۇل 98 اۋە مارشرۋتىن قۇراپ وتىر. اتالعان كورسەتكىش ءوسۋ ۇستىندە. بيىل پراگا, ۇلان-باتىر باعىتىمەن قاتار جۋىردا ەلباسىنىڭ تاپسىرماسىمەن نۇر-سۇلتان – توكيو رەيسى اشىلدى. وسى ىسكە قىتايلىق ارىپتەستەرىمىزدىڭ دە قوسىلعانى قۋانتۋدا. جاقىن ارادا نۇر-سۇلتان – شانحاي جانە نۇر-سۇلتان – سينگاپۋر اۋە رەيستەرىن دە اشۋدى جوسپارلاپ وتىرمىز. مۇنىڭ بارلىعى ەلدەگى ءتۋريزمدى دامىتىپ, «استانا» حالىقارالىق قارجى ورتالىعىنىڭ جۇمىسىن جانداندىرۋى ءتيىس. سوندىقتان «Routes Silk Road 2019» فورۋمىنان ءبىزدىڭ كۇتەرىمىز كوپ. بۇل ەلدەگى ازاماتتىق اۆيا سەكتورعا تىڭ سەرپىن بەرىپ, دۇنيەجۇزىلىك كومپانيالارعا ەلوردامەن جاقىنىراق تانىسۋدىڭ مۇمكىندىگى, – دەيدى تالعات لاستاەۆ.
نۇرسۇلتان نازارباەۆ حالىقارالىق اۋەجايىنىڭ باسقارما ءتوراعاسى رادىلبەك ءاديمولدا, اۋە ايلاعى بۇگىندە ايماقتىق حابقا اينالعانىن, وندا 5 قازاقستاندىق جانە 16 شەتەلدىك كومپانيا 22-39 حالىقارالىق اۋە مارشرۋتتارى بويىنشا جۇمىس ىستەپ جاتقانىن جەتكىزدى.
– تاۋلىگىنە اۋەجايىمىز 17 مىڭ جولاۋشىنى قابىلدايدى. تاعى ءبىر ايتا كەتەرلىگى, 9-11 شىلدە ارالىعىندا جەر شارىن اينالىپ ۇشۋ بويىنشا رەكورد تىركەلدى. ول سولتۇستىك جانە وڭتۇستىك پوليۋس ارقىلى ورىندالدى. ۇشاق فلوريدا شاھارىنان اۋەگە كوتەرىلىپ, 10 شىلدە كۇنى ءبىزدىڭ اۋەجايىمىزعا قوندى. بۇل ەل استاناسى مەن نۇرسۇلتان نازارباەۆ حالىقارالىق اۋەجايىنىڭ بەدەلىن كوتەرەتىن ايتۋلى شارا بولدى. وسىدان-اق اۋە تەرمينالىمىز تەحنيكالىق تۇرعىدان تارتىمدى ەكەندىگىن دالەلدەدى. ارمەن قاراي دا مارشرۋتتىق جەلىلەر ارتادى دەگەن سەنىمدەمىز, – دەدى ءوز كەزەگىندە رادىلبەك ءاديمولدا.
ال IATA قاۋىمداستىعىنىڭ ورتالىق ازيا بويىنشا ايماقتىق مەنەدجەرى دجوردان كارامالاكوۆ, «ءبىر بەلدەۋ, ءبىر جول» يدەياسىن جۇزەگە اسىرۋدا اۆياتسيانىڭ ءمۇمكىندىگى وراسان ەكەندىگىن ايتادى. ول بۇگىنگە دەيىن جۇك اعىنىن قامتۋدا تەك اۆتوكولىك جانە تەمىر جولدارىمەن بىرگە تەڭىز باعىتى عانا قاراستىرىلىپ كەلگەنىن ساباقتاپ, وسى تۇرعىدا اۋە جولىنىڭ باسىمدىقتارى دۇرىس يگەرىلمەي جاتقانىنا نازار اۋداردى.
– كوپتەگەن مەملەكەت باسشىلارى جۇك اعىنى تۋرالى ءسوز قوزعاعاندا ۇنەمى تەڭىز, تەمىر جانە تاس جولدارىنا ءمان بەرىپ جاتادى. ال اۆياتسيا قايدا قالدى سوندا؟ بۇگىندە ءبىز بايقاپ وتىرمىز, نارىققا 13 قىتايلىق اۆياكومپانيا كەلىپ وتىر. ولاردىڭ تەحنيكالىق پاركى 1600 ۇلكەن كولەمدى ترانسپورتتىق ۇشاقتاردى قۇراۋدا. بۇل تاپتىرماس مۇمكىندىك. وسىلايشا اۆياتسيا بۇل جوبادان ءوز ورنىن تابا الاتىنىن ايعاقتاپ تۇر. جاڭا جىبەك جولىن دامىتۋدا اۋە كەڭىستىگىنىڭ ماڭىزى ەرەكشە بولماق. وسى ارقىلى قيىر شىعىس پەن ورتالىق ازيانىڭ ەكونوميكاسىن ورىستەتۋگە جول اشىلادى, – دەپ تۇيىندەدى دجوردان كارامالاكوۆ.
«Egemen Qazaqstan»
