جەر مەن تەر
سارسەنبى, 6 ناۋرىز 2013 6:23
كوكتەمگى ەگىسكە دايىن
كوكتەمگى دالا جۇمىستارى جەتىسۋ جەرىندە زور جاۋاپكەرشىلىكپەن باستالىپ, تياناقتى ءارى قالىپتاسقان جاقسى ۇردىستەن تايماي اتقارىلۋدا. بۇگىنگى كۇنگە سوقا, تىرما, تۇقىم سەپكىش 100 پايىزعا دايىن بولسا, مەحانيزاتورلار قاۋىمى تراكتورلارىن 90 پايىزعا دايىنداپ ۇلگەردى. كوكتەمنىڭ ءبىر كۇنى جىلعا ازىق بولاتىنىن استە ەستەرىنەن شىعارمايتىن ديقاندار دالا توسىندەگى تىنىمسىز تىرلىگىن باستاپ قانا قويماي قۇبىلىپ تۇراتىن اۋا-رايىنا قاراي ارەكەت ەتۋدە.
سارسەنبى, 6 ناۋرىز 2013 6:23
كوكتەمگى ەگىسكە دايىن
كوكتەمگى دالا جۇمىستارى جەتىسۋ جەرىندە زور جاۋاپكەرشىلىكپەن باستالىپ, تياناقتى ءارى قالىپتاسقان جاقسى ۇردىستەن تايماي اتقارىلۋدا. بۇگىنگى كۇنگە سوقا, تىرما, تۇقىم سەپكىش 100 پايىزعا دايىن بولسا, مەحانيزاتورلار قاۋىمى تراكتورلارىن 90 پايىزعا دايىنداپ ۇلگەردى. كوكتەمنىڭ ءبىر كۇنى جىلعا ازىق بولاتىنىن استە ەستەرىنەن شىعارمايتىن ديقاندار دالا توسىندەگى تىنىمسىز تىرلىگىن باستاپ قانا قويماي قۇبىلىپ تۇراتىن اۋا-رايىنا قاراي ارەكەت ەتۋدە. «بيىلعى كوكتەمدە بارلىعى 455 مىڭ 458 گەكتار جەرگە سەبىلەتىن 54 مىڭ توننا ءداندى داقىل تۇقىمىنىڭ 53 مىڭ تونناسى تالاپقا ساي تەكسەرۋدەن ءوتتى. تاراتىپ ايتساق, ونىڭ 23 مىڭ تونناسى – 1 كلاستى, 28 مىڭ تونناسى – 2 كلاستى, 1200 تونناسى 3 كلاستى بولىپ ءبولىنىپ سەبىلەدى. دالا جۇمىستارىن دەر كەزىندە بەلگىلەنگەن تالاپقا ساي جۇرگىزۋگە قاجەتتى 47 مىڭ توننا سولياركانىڭ بۇگىنگى كۇنگە دەيىن 30 پايىزى قولىمىزعا ءتيدى», دەدى الماتى وبلىسى اكىمىنىڭ ورىنباسارى تىنىشباي دوسىمبەكوۆ.
راس, بيىل جەتىسۋ جەرىندە قار سۋى مول بولىپ, جاۋىن-شاشىن دا كوبەيىپ تۇر. توتەنشە جاعداي قاۋپى تونگەن ايماقتار ءوز الدىنا. سونىڭ ءبارىن ەسكەرە وتىرىپ جەتىسۋلىقتاردىڭ ارشىنداپ العا باسۋى – وسىعان دەيىن اگرارلى وبلىستا دالا جۇمىستارىنىڭ قالىپتى ىرعاققا ءتۇسىپ, جىلما-جىل تۇقىم سەبىلەتىن جەر كولەمىن كاسىبي تۇرعىدا بىرتىندەپ وسىرە بىلگەندىگىنىڭ جەمىسى.
نۇربول الدىباەۆ,
«ەگەمەن قازاقستان».
الماتى وبلىسى.
ىلعال مول ءتۇستى, بىراق تۇقىم تاپشىلىعى ويلانتادى
بيىل قوستاناي وبلىسىندا بارلىعى 4 ميلليون 183 مىڭ گەكتار القاپقا ءدان سەبىلەدى. ونىڭ 3 ميلليون 790 مىڭ گەكتارى بيدايعا تيەسىلى. نارىقتىڭ سۇرانىمىمەن ەسەپتەسكەن ديقاندار جىل سايىن مايلى داقىلدار القابىن ۇلعايتىپ كەلەدى. بيىل ونىڭ كولەمىن 256 مىڭ گەكتارعا جەتكىزبەك. بۇل بىلتىرعىمەن سالىستىرعاندا 60 مىڭ گەكتارعا ارتىق.
– وتكەن جىلعى قۋاڭشىلىق تاقىرعا وتىرعىزعان ديقاندار قىستا قاردىڭ مول تۇسكەنىنە قۋاندى. توپىراقتا ىلعالدىڭ جەتكىلىكتى بولارىنا سەنەدى. دەگەنمەن, كوكتەمگى دالا جۇمىستارىنىڭ ۋاقىتى جاقىنداعان سايىن ولاردىڭ كوڭىلى ورنىندا بولماي وتىر. ويتكەنى, تۇقىم جەتكىلىكسىز. وبلىس بويىنشا بارلىعى 580 مىڭ توننا تۇقىم كەرەك بولسا, قازىر سونىڭ 53 مىڭ تونناسى كەم. ال «كوكتەمنىڭ ءبىر كۇنى – جىلعا ازىق» دەگەن, ۋاقىت كۇتپەيدى. رەسپۋبليكا بويىنشا 80 مىڭ توننا تۇقىم جەتپەيدى, سونىڭ جارتىسىنان كوبى قوستاناي وبلىسىنا قاجەت. سوندىقتان ديقانداردىڭ كۇپتى كوڭىلىن سەيىلتۋ ءۇشىن جەرگىلىكتى جەردە بۇل ماسەلە وتكىر قويىلدى. قازىر جەرگىلىكتى بيۋدجەتتەن وسى ماقساتقا 250 ميلليون تەڭگە قاراجات ءبولىنىپ, تۇقىم دايىندايتىن شارۋاشىلىقتاردان 12 مىڭ توننا تۇقىم ساتىپ الىناتىن بولدى.
– وتكەن جىلى قۋاڭشىلىقتىڭ سالدارىنان وبلىستىڭ بىرقاتار, اسىرەسە, وڭتۇستىك اۋداندارىندا ديقانداردىڭ كەۋسەنىنە ءتۇيىر ءدان ىلىنگەن جوق. استىق شىقپاعان سوڭ, تۇقىم قايدان بولسىن, – دەيدى وبلىستىق اۋىلشارۋاشىلىعى باسقارماسى ەگىن شارۋاشىلىعى ءبولىمىنىڭ باس مامانى امانجول قاليەۆ.
وبلىستا تەحنيكالاردىڭ 90 پايىزى دايىن. وبلىس ديقاندارىنىڭ كوكتەمگى دالا جۇمىستارىنا اتتانىس الدىنداعى ءداستۇرلى باسقوسۋى ناۋرىز ايىنىڭ ورتاسىنا تامان بولادى. وندا وبلىس اكىمى نۇرالى سادۋاقاسوۆ جانە ماماندار ناۋقانعا دايىندىق پەن وزەكتى ماسەلەلەردى ورتاعا سالاتىن بولادى. سودان كەيىن كوپ ۇزاماي-اق, ءساۋىردىڭ ءتاۋىر كۇندەرى تۋىسىمەن, ايدىڭ 5-10 جۇلدىزى ارالىعىندا وڭىردە جاپپاي ىلعال جابۋ جۇمىستارى باستالادى.
ءنازيرا جارىمبەتوۆا,
«ەگەمەن قازاقستان».
قوستاناي.
ناعىز ناۋقان ءالى الدا
باسقا-باسقا وڭتۇستىكتە دالا ءدۇبىرى ەرتەرەك ەستىلەدى عوي. وڭتۇستىك قازاقستان وبلىستىق اۋىلشارۋاشىلىعى باسقارماسىنىڭ باستىعى قاناتبەك وسپانبەكوۆتىڭ ايتۋىنا قاراعاندا, بيىل ەگىستىك كولەمى بىلتىرعى جىلمەن سالىستىرعاندا 44 مىڭ گەكتارعا كوبەيگەلى وتىر. سوندا جالپى وبلىس بويىنشا 785 مىڭ گەكتارعا ەگىن ەگۋ جوسپارلانسا, سونىڭ ىشىندە 139 مىڭ گەكتار جەرگە كۇزدىك سەبىلىپ قويىلىپتى. «كوكتەمنىڭ ءار كۇنى جىلعا ازىق» ەكەنىن جاقسى تۇسىنەتىن ءوڭتۇستىكقازاقستاندىق ديقاندار كۇننىڭ كوزى جىلت ەتكەلى بەرى 9 100 گەكتار جەرگە جوڭىشقا, جازدىق بيداي, كوكونىس ەگىپ ۇلگەرىپتى. جەر جىرتۋ, ەگىن ەگۋ جۇمىستارى ەندى-ەندى باستالىپ جاتقانىن ەسكەرسەك, بۇل ارينە, از كورسەتكىش ەمەس. بۇگىنگى كۇنى تاۋار وندىرۋشىلەر تاراپىنان جەڭىلدەتىلگەن باعامەن بوساتىلاتىن 33,9 مىڭ توننا تىڭايتقىشقا تاپسىرىس بەرىلىپتى. ونىڭ قازىرگە ناقتى الىنعانى 5 مىڭ توننا. بۇل تاراپتا جۇمىستار ءالى جالعاسىپ جاتىر. ازىرگە 139 مىڭ گەكتار كۇزدىكتىڭ 25 مىڭى قورەكتەندىرىلدى. جەر جىرتۋ جۇمىستارى 496 مىڭ گەكتارعا مەجەلەنگەن, سونىڭ 352 مىڭ گەكتارى جىرتىلدى. وتكەن اپتادا وبلىسقا بەلگىلەنگەن باعامەن 32 مىڭ توننا جانارماي ءبولىندى. بۇل وبلىستا ەگىن شارۋاشىلىعىمەن اينالىساتىن شارۋالاردىڭ 87-89 پايىزىن قامتاماسىز ەتۋگە جەتەدى. ەلىمىزدىڭ مۇناي جانە گاز مينيسترلىگى بەلگىلەگەن باعا بويىنشا جانارمايدىڭ ءبىر تونناسى 93 975 تەڭگەدەن بەرىلۋدە. ال, اۋىلشارۋاشىلىعى تەحنيكالارىنىڭ 88-91 پايىزى كوكتەمگى ەگىسكە دايىن. ناعىز ناۋقان ءالى الدا. وڭتۇستىكتىڭ كەڭ دالاسىندا ەڭبەك كورىگى ەندى-ەندى قىزىپ كەلەدى.
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى.
ازىرلىك قوڭىر كۇزدەن جالعاسۋدا
قاردىڭ مول ءتۇسۋىن سولتۇستىكقازاقستاندىق ديقاندار جاقسى ىرىمعا بالاپ وتىر. الايدا, تابيعاتتىڭ جارىلقاۋىنا يەك ارتىپ, جاعانى جايلاۋعا سالۋدان استە اۋلاق. كەرىسىنشە, جىلداعى ادەت بويىنشا كوكتەمگى ەگىسكە جان-جاقتى ازىرلىك جۇمىستارى قوڭىر كۇزدەن بەرى تىڭعىلىقتى جالعاسىپ كەلەدى. اۋىل شارۋاشىلىق تەحنيكالارىنىڭ 73 پايىزى دايىندىق ساپىنا قويىلىپ, كەڭ الىمدى ەگىس كەشەندەرىمەن تولىقتىرۋعا باسا ءمان بەرىلگەن. بۇگىندە ونداي جوعارى ءونىمدى تەحنيكا بىرلىكتەرىنىڭ سانى ءبىر مىڭنان اسادى. بىلتىر ليزينگ ارقىلى 8,5 ميلليارد تەڭگەگە 400-گە جۋىق جاڭا تەحنيكا ساتىپ الىنىپ, ماشينا-تراكتور پاركىنىڭ ماتەريالدىق-تەحنيكالىق بازاسى ايتارلىقتاي نىعايتىلدى.
وبلىستىق اۋىل شارۋاشىلىعى باسقارماسىنىڭ دەرەكتەرى بويىنشا بيىل 3,6 ميلليون گەكتەر القاپقا ءداندى داقىل ءسىڭىرۋ جوسپارلانعان; ونىڭ 3 ميلليون گەكتارى – بيداي, 368 مىڭ گەكتارى – مايلى داقىلدار. قامبالارعا قۇيىلىپ الىنعان 546,2 مىڭ توننا تۇقىمنىڭ 95 پايىزى ءبىرىنشى, ەكىنشى سۇرىپقا جاتادى. كوكتەمگى دالا جۇمىستارىن تولىق اتقارىپ شىعۋعا 70 مىڭ توننادان استام جانار-جاعارماي قاجەت بولسا, بۇگىنگى كۇنگە دەيىن تورتتەن بىرىمەن قامتاماسىز ەتىلگەن. نارىققا قاراعاندا باعاسى 10-15 پايىزعا ارزان قولجەتىمدى ديزەل وتىنىن تاسىمالداۋمەن ارنايى وپەراتورلار اينالىسادى. اگروقۇرىلىم باسشىلارى بيىلدان باستاپ شەتەلدەن الىناتىن گەربيتسيدتەر مەن تىڭايتقىشتارعا دا دەمەۋقارجى كورسەتىلەتىن جاڭالىقتى ەستىپ, قاتتى قۋانۋلى.
قىزىلجار ءوڭىرىنىڭ استىق ءوندىرۋشىلەرى كوكتەمگى ەگىن سەبۋ جۇمىستارىنا ازىرلىكتى وسى قارقىنمەن جالعاستىرسا, قولداعى 5500-دەي تۇقىم سەبۋ كەشەندەرىن جاۋاپتى ناۋقانعا تولىق جۇمىلدىرا الارى انىق.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.
