كەڭەسكە جوعارعى سوتتىڭ سۋديالارى, جەكەلەگەن مەملەكەتتىك ورگاندار مەن ۇيىمداردىڭ باسشىلارى مەن وكىلدەرى, وبلىستىق جانە وعان تەڭەستىرىلگەن سوتتاردىڭ توراعالارى, جوعارعى سوت دەپارتامەنتى مەن ونىڭ قۇرىلىمدىق ءبولىمشەلەرىنىڭ, سونداي-اق سوت تورەلىگى اكادەمياسىنىڭ باسشىلىعى دا قاتىستى.
ج.اسانوۆ كەڭەس جۇمىسىن اشا كەلە, «سوت تورەلىگىنىڭ 7 ءتۇيىنى» باعدارلاماسى اياسىندا ونداعان قاناتقاقتى جوبالاردى ىسكە اسىرۋ ناتيجەلەرى: «تۇنگى» جانە «وتباسىلىق» سوتتار, «تاتۋلاستىرۋشى-سۋديا», «سۋديا كومەكشىسى», سوتتان تىس تاتۋلاسۋ ورتالىقتارى, فرونت-كەڭسەلەر تۋرالى ايتىپ بەردى.
كەڭەس بارىسىندا جوعارعى سوت ءتوراعاسى سوتتارعا قويىلاتىن ىڭعايسىز ساۋالدارعا جاۋاپ بەردى. «سۋديالىققا «تانىستىق» نەمەسە اقشا ارقىلى بارىپ جاتادى, سۋديالار قۇقىق قورعاۋ ورگاندارىنىڭ جەتەگىندە ءجۇر, سوتتار مەملەكەتتىڭ مۇددەسىن ادامنان جوعارى قويادى», دەگەن سيپاتتاعى پىكىردى ج.اسانوۆ ءجونسىز دەپ سانايدى. ول سوتتاردىڭ اتىنا ءجيى قويىلاتىن جۇيەلى سىنعا جاۋاپ بەرە كەلە, ولاردى ءۇش توپقا ءبولدى: قىلمىستىق سوت تورەلىگى, مەملەكەتتىك ورگاندارمەن اراداعى جەكە ادامدار مەن بيزنەستىڭ داۋلارى جانە سۋديالىق كادرلار.
جوعارعى سوت توراعاسى 2020 جىلى سوت تورەلىگى سالاسىندا ساپالىق وزگەرىستەر ورىن الاتىنىنا جانە الداعى 2 جىل ىشىندە اقتاۋ ۇكىمدەرى سانىنىڭ 6 ەسەگە ارتاتىنىنا سەنىم ءبىلدىردى.
ج.اسانوۆ ايىپتاۋشىلىق باعىتتان قالاي قۇتىلۋعا بولاتىنىن, اكىمشىلىك ادىلەت كودەكسىنىڭ جوباسى, سۋديالىق كادرلاردى ىرىكتەۋدىڭ جاڭا جۇيەسىن قۇرۋ, سونداي-اق سۋديالار كورپۋسىن كاسىبي ەمەس, سىبايلاس جەمقورلىققا ۇشىراعان سۋديالاردان تازارتۋدىڭ جاڭا ادىستەمەسىن ەنگىزۋ تۋرالى ايتىپ بەردى.
– جالپى, سوت جۇيەسىنىڭ ەڭ باستى ءبىر عانا پروبلەماسى بار دەپ ايتاتىن بولساق, ول – سۋديالىق كادرلار. بيىلعا دەيىن سۋديالىققا مىقتى زاڭگەرلەر ۇمتىلمايتىن. نەگە؟ ويتكەنى ءبىزدىڭ بار قيىنشىلىعىمىزدى, جالاقىمىز تومەن ەكەندىگىن, جۇكتەمە كوپ ەكەندىگىن بىلەدى. ءتىپتى پروكۋرورلار دا, ادۆوكاتتار دا, باسقا زاڭگەرلەر دە سوت قىزمەتىنە كەلگىسى جوق. سوندا «سۋديا بولامىن دەپ كونكۋرسقا قاتىسىپ جاتقاندار كىمدەر؟» دەگەن سۇراق تۋادى. ولاردىڭ باسىم كوپشىلىگى سوتتاعى تەحنيكالىق قىزمەتكەرلەر – سوت حاتشىلارى. جوعارى سوت كەڭەسىنىڭ وتىرىسىندا ازاماتتاردى ءوز ەركىمەن جۇمىستان شىعارۋ ماسەلەسى قارالادى. ءبىز سوندا ودان «سەبەبى قانداي؟» دەپ سۇرايمىز. نەگىزىنەن ەكى سەبەپ ايتادى: «الدىمەن جالاقى از, ودان كەيىن جەكە ومىرگە ۋاقىت جوق». ويتكەنى كۇنىنە ءاربىر سۋديا 10 شەشىم قابىلدايدى. بۇلاردان بولەك ءۇشىنشى سەبەپ تە بار. نۇر-سۇلتان, الماتى, شىمكەنت قالالارىنا, وبلىس ورتالىقتارىنا اۋىسۋ, باسشىلىق قىزمەتكە تاعايىندالۋ بويىنشا سوت جۇيەسىنىڭ ىشىندە ادىلدىك بولماعانىن العا تارتادى, – دەدى جوعارعى سوت توراعاسى.
جيىن بارىسىندا جوعارعى سوتتىڭ ازاماتتىق ىستەر جونىندەگى سوت القاسىنىڭ توراعاسى مەيرامبەك تايمەردەنوۆ, جوعارعى سوتتىڭ مامانداندىرىلعان القاسىنىڭ ءتورايىمى ايگۇل قىدىرباەۆا ءسوز سويلەدى.
وبلىستىق جانە وعان تەڭەستىرىلگەن سوتتاردىڭ بىرقاتار توراعالارى دا ەسەپ بەردى.
كەڭەس سوڭىندا ج.اسانوۆ سۋديالار كورپۋسىنا بىرقاتار مىندەتتەر جۇكتەدى. ءارىپتەستەرىن سوت تورەلىگىن جاڭا جاعدايدا اتقارۋعا دايىن بولۋ قاجەتتىگىن ەسكەرتە وتىرىپ, ول سۋديالاردى سوت تورەلىگىن جۇزەگە اسىرۋدا جوعارى سەنىمدى اقتاۋعا شاقىردى.
جوعارعى سوت توراعاسى ەلىمىزدىڭ جوعارعى سوت ورگانىنىڭ ءادىل سوت تورەلىگىنە, قۇقىق ۇستەمدىگى مەن قوعامداعى تۇراقتىلىققا قول جەتكىزۋگە باعىتتالعانىن اتاپ ءوتتى.
