وبلىس ورتالىعىنداعى «قازاقستان ءاليۋمينيى» اق-تا مەتاللۋرگيا, قۇيۋ ءوندىرىسى, ەلەكتر ەنەرگەتيكاسى, ماشينا جاساۋ, تەحنولوگيالىق ماشينالار مەن جابدىقتار, تەپلوۆوز ءماشينيسى, قۇرىلىس سالاسى, ەكولوگيا, اۆتوماتتاندىرۋ جانە باسقارۋ, يكەمدى اۆتوماتتى جەلىلەر جانە اقپاراتتىق جۇيەلەر سەكىلدى تەحنيكالىق ماماندىقتاردا وقىپ جاتقان ستۋدەنتتەرگە وسىنداي جاقسى ءمۇمكىندىك بەرىلدى. اشىق ەسىك كۇنى ارقىلى ستۋدەنتتەر كاسىپورىنداردا سۇرانىسقا يە بوس ورىنداردى ءبىلىپ, ءوندىرىس بارىسىن كورىپ, ماماندارعا ءتۇرلى سۇراقتار قويدى.
– اشىق ەسىك كۇنى ستۋدەنتتەرگە ءوندىرىستىڭ بارلىق ەرەكشەلىكتەرىن تۇسىنۋگە كومەكتەسەدى, تاڭداعان ماماندىعىن تەرەڭىرەك تانۋعا ءمۇمكىندىك بەرەدى, – دەدى ەۋرازيالىق توپتىڭ باسقارما ءتوراعاسىنىڭ الەۋمەتتىك ماسەلەلەر جونىندەگى ورىنباسارى يننا گۋبارەۆا.
سوڭعى جىلدارى س.تورايعىروۆ اتىنداعى مەملەكەتتىك ۋنيۆەرسيتەت وڭىردەگى كاسىپورىندارمەن بىرلەسىپ جۇمىس ءىستەۋدە. ۋنيۆەرسيتەت جەرگىلىكتى 278 ءوندىرىس ورنىمەن ەكىجاقتى كەلىسىمشارت جاساعان. ستۋدەنتتەر 1-كۋرستان باستاپ كاسىبي ءتاجىريبەدەن وتەدى, 2-كۋرستا بولاشاق ماماندىعىن كاسىپورىندا ءجۇرىپ يگەرەدى. وقۋ ۇدەرىسىنە ءوندىرىستىك جەتەكشى ماماندار مەن سەرىكتەس شەتەلدىك جوعارى وقۋ ورىندارىنىڭ عالىمدارى قاتىسادى.
ۋنيۆەرسيتەتتىڭ «ەلەكترتەحنيكا جانە اۆتوماتتاندىرۋ» كافەدراسىنىڭ اعا وقىتۋشىسى يۋليا پوپوۆەتستىڭ ايتۋىنشا, كاسىپورىندارعا ەكسكۋرسيا ۇيىمداستىرۋ جوعارى وقۋ ورىندارىنىڭ تۇلەكتەرىن جۇمىسقا تارتۋدىڭ ءتيىمدى جولى.
– بىزگە كاسىپورىنداردىڭ وكىلدەرى ءجيى كەلىپ, ءوندىرىستىك تاقىرىپتارعا ساي تانىستىرىلىمدار جاسايدى. ستۋدەنتتەرگە ءوندىرىستى تانىستىرۋ – ءارى قىزىقتى, ءارى قاجەت, بۇل وتە پايدالى, – دەيدى ول.
ۋنيۆەرسيتەت 2014 جىلدان بەرى «سەرپىن» باعدارلاماسى بويىنشا «ماڭگىلىك ەل جاستارى – يندۋسترياعا!» اتتى تەحنيكالىق جانە اگرارلىق ماماندىقتار بويىنشا مامان دايىندايدى. بيىلعى وقۋ جىلىندا 16 ءبىلىم بەرۋ باعدارلاماسى بويىنشا تۇڭعىش تۇلەكتەر بۋىنى – 267 ستۋدەنت ءبىتىرىپ شىعادى. قازىرگى تاڭدا ۋنيۆەرسيتەتتە بارلىعى 20 ماماندىق بويىنشا 550 ستۋدەنت ءبىلىم الۋدا.
– مەن «سەرپىن» باعدارلاماسىمەن تاراز قالاسىنان كەلدىم. اشىق ەسىك كۇنى شاراسى بارىسىندا ماماندىعىمدى دۇرىس تاڭداعانىما كوز جەتكىزدىم. مەكتەپتە وقىپ جۇرگەندە پاۆلودار اليۋميني زاۋىتى جايلى ەستىپ-بىلگەن ەدىم. ەندى, مىنە سول زاۋىتتى كوردىم. العان اسەرىم شەكسىز. الداعى ۋاقىتتا تاجىريبە جيناقتاپ ءبىلىمىمدى شىڭداعىم كەلەدى, – دەيدى ءتۇستى مەتاللۋرگيا كوللەدجىنىڭ ستۋدەنتى ارمان تاسۋل.
قازىر كومپانيا كاسىپورىندارى ورنالاسقان وڭىرلەردەگى ۋنيۆەرسيتەت پەن كوللەدجدەردە ERG كۇندەرى وتۋدە.
پاۆلودار
