سول ۇيدەن پاتەرلى بولعان جاس ماماندار ءلاززات وسكەن مەن ەربولات دۇيسەنباەۆ اۋدانعا كەلگەندە الدىنان جاڭا باسپانا دايىن تۇرادى دەپ ويلاماپتى.
– ءبىز ءو.سۇلتانعازين اتىنداعى قوستاناي مەملەكەتتىك پەداگوگيكالىق ۋنيۆەرسيتەتىنە «سەرپىن» باعدارلاماسى بويىنشا شىمكەنت قالاسىنان كەلىپ تۇسكەن ەدىك. ءتورت جىل وقىپ, ماتەماتيكا ءپانىنىڭ مۇعالىمى ماماندىعىن الدىق. ەندى ءوز قالاۋىمىزبەن امانگەلدى اۋدانىنا كەلدىك. الدىمىزدان جاپ-جاڭا باسپانا دايىن تۇر ەكەن, قاتتى قۋاندىق. ءبىر بولمە بولعانمەن ءىشى كەڭ, ىستىق سۋ, سۋىق سۋى اعىپ تۇر, ورتالىقتان جىلىتىلادى, قىستا وت جاقپايمىز, – دەيدى ءلاززات وسكەن. ايتپاقشى, ءلاززات پەن ەربولات بۇل باسپاناعا تامىز ايىندا جاس وتباسى بولىپ ورالادى, وعان دەيىن شىمكەنتكە اتا-انالارىنا بارىپ, ۇيلەنۋ تويىن وتكىزىپ كەلەدى ەكەن. جاس ماماندار ءۇشىن جاستىقتىڭ قۋانىشى وسىلاي جالعاسىن تاپپاق.
جاسىراتىنى جوق, بۇگىندە وبلىس ورتالىعىنان شالعاي جاتقان امانگەلدى اۋدانىندا ماماندار تاپشىلىعى قاتتى بىلىنەدى. اۋدان بويىنشا 8 پاننەن 23 مۇعالىم جەتىسپەيدى. ال جالپى, دارىگەر, ۆەتەرينار سەكىلدى باسقا ماماندىقتاردى قوسقاندا اۋدانعا ءالى 40-تان اسا مامان كەرەك. ءبىر بيۋدجەتتىڭ جەلكەسىنە مىنە بەرمەي, جۇمىلا كىرىسپەسە جوق تابىلا ما؟ جاس ماماندارعا ارنالعان 8 ءپاتەرلى ءۇيدى اۋدان كاسىپكەرلەرى جۇمىلىپ, نەبارى 2 ايدىڭ ىشىندە سالىپ بەردى.
جاستار جىلىنا ورايلاستىرىلىپ سالىنعان جاس ماماندارعا ارنالعان ءۇي مەن جاستار ساياباعىنا 47 ميلليون تەڭگە دەمەۋشىلەر قاراجاتى تارتىلدى, سونىمەن قاتار 15 ميلليون تەڭگە بيۋدجەت قاراجاتى جۇمسالدى. اۋداندا «رۋحاني جاڭعىرۋ» باعدارلاماسىنىڭ «تۋعان جەر» ارنايى جوباسى اياسىندا يگى جۇمىستار قولعا الىنعان. «مەكتەپكە تاعزىم» اكتسياسىمەن مەكتەپ تۇلەكتەرىنىڭ اۋىل مەكتەپتەرىنە قولعابىسى ۇيىمداستىرىلدى. امانگەلدى ورتا مەكتەبىنىڭ تۇلەگى ءابىلحان بورانباەۆ 2,5 ميلليون تەڭگەگە ءىت كابينەت الىپ بەرسە, ى.التىنسارين اتىنداعى ورتا مەكتەپتىڭ تۇلەكتەرى 1 ملن تەڭگەگە گەوگرافيا الاڭىنىڭ جابدىعىن اكەلىپ بەردى. اۋداندا مۇنداي مىسالدار جەتكىلىكتى. اقساي اۋىلىنداعى بۇيرەكتال ورتا مەكتەبىنىڭ تۇلەگى الەكساندر پاۆلوۆسكي مەكتەپكە 900 مىڭ تەڭگەگە كومەك كورسەتتى. امانتوعاي ورتا مەكتەبىنىڭ تۇلەكتەرى جانە جەكە كاسىپ يەلەرى ومىرزاق, دۇيسەن ءىلياسوۆتار, دارحان شاكىمانوۆ سىندى ازاماتتار مەكتەپتىڭ جوندەۋ جۇمىستارىنا 6 ميلليوننان استام تەڭگە قارجىلاي كومەك كورسەتتى. ۇرپەك اۋىلىنداعى جاڭاۋىل ورتا مەكتەبىنىڭ ءار جىلدارداعى تۇلەكتەرى ءبىلىم ۇياسى مەن اۋىلدى اباتتاندىرۋ ماقساتىندا «ۇلەسىم ساعان, ۇرپەگىم!» اتتى قور اشىپ, 12 ميلليون تەڭگەگە جۋىق قاراجات جينادى. وسىلايشا اۋداننىڭ مەكتەپ تۇلەكتەرى بيىل ءوز اۋىلى مەن مەكتەبىنە 45 ميلليون تەڭگەنىڭ دەمەۋشىلىك كومەگىن كورسەتكەن.
اۋدان ورتالىعىنداعى بۇرىن شاڭى شىعىپ بوس جاتقان جەردە جاستار ساياباعى ورنادى. جوبانىڭ قۇنى 30 ميلليون تەڭگەنى قۇرادى.
– بۇل اۋدان ءۇشىن از قارجى ەمەس, ساياباقتىڭ سالىنۋى اۋدانداعى كاسىپكەرلەردىڭ ارقاسى. ەندى جاس كاسىپكەرلەر وسى ساياباق ىشىنەن ءوز بيزنەسىن اشقالى وتىر. مۇندا پيتستسا, دونەر, كاۋاپ ورتالىقتارى, سۋسىندار جانە قىمىز ساتاتىن ورىندار جانە بالالارعا ارنالعان ويىن الاڭدارى جۇمىس ىستەيتىن بولادى. ساياباق اۋدان
تۇرعىندارىنىڭ مادەني-دەمالىس ورنى بولۋمەن قاتار, ون شاقتى ادامدى جۇمىسپەن قامتيدى. جاستاردىڭ سپورتپەن, دەنەشىنىقتىرۋمەن اينالىسۋىنا دا مۇمكىندىك جاسالعان.
قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ «قازاقستان حالقىنىڭ كەم دەگەندە 30 پايىزى سپورتپەن شۇعىلدانۋى كەرەك» دەگەن تاپسىرماسى اۋداندا كوپ جۇمىسقا مۇرىندىق بولدى. ءاسىرەسە سپورتقا بالالار مەن جاستاردىڭ قامتىلۋى ايرىقشا نازاردا. اۋدان ورتالىعىنداعى ب.قولداسباەۆ اتىنداعى مەكتەپتە زاماناۋي شاعىن فۋتبول الاڭىنىڭ اشىلۋى سونىڭ جارقىن مىسالى, – دەيدى اۋدان اكىمى ءامىرحان اسانوۆ. ونى ب.قولداسباەۆ اتىنداعى قازاق ورتا مەكتەبىنىڭ تۇلەگى, كاسىپكەر سەرىك قاپاپين ءوزىنىڭ 12 ميلليون تەڭگە قارجىسىنا سالىپ بەردى.
امانگەلدى اۋدانىنداعى وسىنداي الەۋمەتتىك نىسانداردىڭ كوبەيۋى اۋىل شارۋاشىلىعىنىڭ دا, اۋىلدىڭ دا نىعايىپ ەڭسە كوتەرىپ كەلە جاتقانىنا دالەل. سوڭعى جىلدارى مال ءوسىرۋ ءۇشىن جاستاردىڭ اۋىلعا كەلە باستاعانىنا دا جاقسى مىسالدار بار. جاس ماماندار دا جىل قۇسىنداي اۋىلعا قايتسا, تۋعان جەردى گۇلدەندىرەتىن دە سولار بولادى.
قوستاناي وبلىسى,
امانگەلدى اۋدانى
