الايدا, پەتروپاۆلدىق ۆلاديمير دولجنيكوۆتىڭ ساياجايىندا وزگە جەمىس-جيدەكتەرمەن قاتار, شىرمالىپ وسەتىن جۇزىمدىك سامساپ تۇر. سۇرىبىنا قاراي ءدامى ءتىل ۇيىرەتىن جەمىستىڭ قىزىلى دا, جاسىلى دا, قاراسى دا, اقشىلى دا, كۇلگىنى دە, قىزعىلت-سارىسى دا كەزدەسەدى. بۇرىنعى ۇشقىش, بۇگىندە ماڭداي تەرىن توگىپ, ناپاقاسىن جەردەن تەرىپ وتىرعان تاجىريبەلى باعبان العاشقى ءجۇزىم كوشەتىن وسىدان وتىز جىل بۇرىن وتىرعىزىپتى. سودان بەرگى ارالىقتا ءجۇزىمدىك شارۋاشىلىعىن قالىپتاستىرىپ, تابيعاتى قاتال وڭىردە دە مول ءونىم الۋعا بولاتىنىن دالەلدەپ ءجۇر.
– ءجۇزىم – ءىنجىر, قۇرما سەكىلدى ادام اعزاسىنا وتە پايدالى. قۇرامىندا دارۋمەن كوپ. كوزدىڭ كورۋىن جاقسارتادى, بۇيرەك, دەمىكپە كەسەلدەرىنە بىردەن-ءبىر ەم. «الماتى-9», «ۆەلەس» سۇرىپتارى وتە ءتاتتى. «گاگارينسكي» دەپ اتالاتىن ءتۇرى تەز ءپىسىپ-جەتىلەدى. جۇزىمدەردىڭ دەنى قوڭىرجاي اۋا رايىنا بەيىمدەلگەن. سوڭعى كەزدەرى بارىنشا ەرتە پىسەتىن سۇرىپتاردى اۋدانداستىرىپ, ءپىسۋى ۇزاق ۋاقىتقا سوزىلاتىن تۇرلەرىنەن باس تارتۋعا تۋرا كەلدى. ويتكەنى جاز ماۋسىمىنىڭ قالاي بولاتىنىن بولجاۋ كۇردەلەنىپ بارادى.
اياق استى كۇن رايى كۇرت بۇزىلىپ, سوڭى قارا سۋىققا ۇلاساتىن كەزدەر بولادى. بىلتىر ساياجايلاردى قارعىن سۋ شايىپ, قيىن جاعدايعا تاپ بولعانىمىز بار. سوندىقتان بارلىق مۇمكىندىكتەردى جان-جاقتى ەسكەرۋگە تىرىسامىز, – دەيدى ول.
باعبان ءجۇزىمنىڭ ەرەكشە باپ تىلەيتىنىن, دۇرىس كۇتىم جاسالسا ءبىر اعاش جارتى عاسىرعا دەيىن جەمىس بەرەتىنىن ايتادى. ءبىر تۇپتەن 30 كيلوعا دەيىن ءونىم العان كەزدەرى بولىپتى.
ءجۇزىمنىڭ ءتۇبىن اشۋ مەرزىمىن دۇرىس بىلگەننىڭ ماڭىزى ايرىقشا. تامىرى ءالسىز كەلەتىندىكتەن, ۇسىك شالۋى, بولماسا ءشىرىپ كەتۋى ىقتيمال. بۇتاقتارى جيىلەپ كەتسە, جەمىس بەرۋى ناشارلايدى. ەڭ باستىسى, ۆلاديمير دولجنيكوۆ حيميالىق تىڭايتقىش قولدانبايتىندىقتان, ءجۇزىمدەرى ەكولوگيالىق جاعىنان تازا. وتباسىنان ارتىلعان جەمىستى شاراپ ازىرلەۋگە جۇمسايدى.
پەتروپاۆلدىق باعباننىڭ ساياجايىندا گەرمانيادا, جاپونيادا وسەتىن وسىمدىكتەر دە بار.
– تازا ءونىم العىڭ كەلسە, جەر وڭدەۋمەن شۇعىلدان, ەرىنبە. بابىن تاپقانعا جەر-انا قاشاندا جومارت. ءجۇزىمنىڭ تۇرلەرى مەن سورتتارىن زەرتتەيتىن امپەلوگرافيا عىلىمىن ءبىر ادامداي مەڭگەرىپ الدىم. جەرلەستەرىمنىڭ ءجۇزىم شارۋاشىلىعىمەن اينالىسۋىن قالار ەدىم. ول ءۇشىن ءتاجىريبەممەن بولىسۋگە دايىنمىن, – دەيدى قارت باعبان.
سولتۇستىك قازاقستان وبلىسى
