قالا سىرتىنداعى «پاراللەل» دەمالىس بازاسىنا 800 قاتىسۋشىدان تۇراتىن 42 كوماندا جينالدى. دەنساۋلىق ساقشىلارى جارىستىڭ 17 تۇرىنەن وزدەرىنىڭ جىلدامدىعىن, ەپتىلىگىن كورسەتتى. وندا دارىگەرلەر قول كۇرەستىردى, ارقان تارتتى, جۇگىردى, گىر كوتەردى, شاحمات وينادى, باسقا دا كوپتەگەن سىناقتان ءوتتى. ءار اۋرۋحانانىڭ ءوزىنىڭ كيگەن فورماسى, كوشباسشىلارى, ولاردىڭ جانكۇيەرلەرى بولدى. جارىستىڭ باس تورەشىسى ناتاليا سۋحاچەۆا دارىگەرلەر اراسىندا مۇنداي كەڭ كولەمدى دەمالىس جانە سپورت ءىس-شاراسى كوپ جىلدان بەرى وتكىزىلمەگەنىن ايتتى.
جارىس قورىتىندىسىنداعى جالپى كوماندالىق ەسەپتە وبلىستىق اۋرۋحانا ءبىرىنشى ورىندى, قوستاناي اۋداندىق ورتالىق اۋرۋحاناسى ەكىنشى ورىندى, امانگەلدى اۋداندىق ورتالىق اۋرۋحاناسى ءۇشىنشى ورىندى جەڭىپ الدى.
«العاشقى سپارتاكيادا سوڭعى بولمايدى, بۇل وبلىس مەديتسينا قىزمەتكەرلەرى اراسىندا داستۇرگە اينالادى. كەلەسى جىلعى شىلدەگە دەيىن كوماندالاردىڭ دايىندالۋىنا ۋاقىت بار» دەدى وبلىستىق دەنساۋلىق ساقتاۋ باسقارماسىنىڭ باسشىسى ۆياچەسلاۆ دۋدنيك.
قوستاناي
