قۇلاعان كەڭەس يمپەرياسىمەن بىرگە قيراعان ەلىمىزدىڭ اۋىر جاعدايىن ءبارىمىز باسىمىزدان كەشتىك. جوقشىلىق پەن تاپشىلىقتان تارىعىپ, تىرشىلىگى توقتاپ قالىپ, ۇدەرە كوشكەن اۋىل جۇرتىنان قالماي, قالاعا اعىلدىق. الدەكىمدەردىڭ شاماسى مەگاپوليستەرگە قونىس اۋدارۋعا جەتتى. ولاردان ورتالاۋلارى وبلىس ورتالىقتارىنا ورنالاستى. ءبىز سەكىلدى جوق-جۇقانالار ەلسىز, ەگەسىز شاعىن قالاشىقتاردى پانالاپ, قاربالاسى تولى ۇلكەن اۋىلعا اينالدىردى.
ءالى كۇنگە ەسىمە السام, توبە شاشىم تىك تۇرىپ, قۇيقام شىمىرلاي جونەلەدى.
قالاي كۇن كوردىك؟ نە جارىق جوق. نە جىلۋ جوق. نە سۋ جوق. نە جالاقى جوق. بالكوندارىمىزعا قويعان پەشتەرىمىزگە ەسكى-قۇسقى اياق-كيىمدى جاعىپ, اس-اۋقات پىسىرگەن كۇندەر ۇمىتىلار ما؟ ءسويتىپ ءجۇرىپ اياقتارىن اپىل-تاپىل باسقان ەكى ەگىز ۇلىمنىڭ سوڭىنان دۇنيەگە تاعى نارەستە كەلدى. بالاباقشالار جابىلىپ قالعان. ەمىزۋلى بوبەگىمىزدى كوتەرىپ ءجۇرىپ تە جۇمىستان قول ۇزبەدىك. ايلاپ, جىلداپ ايلىق الماعاننان كۇدەر ءۇزىپ, مەكتەپتى تاستاپ, بەتتىڭ ارىن بەلگە تۇيگەن كەيبىر مۇعالىم قۇربىلارىم قۇساپ قاپ ارقالاپ, قاراتاۋ مەن اقمولا, نوۆوسىبىر ارالاپ كەتپەسەم دە, نارىقتىق ەكونوميكا ءوز دەگەنىنە كوندىرگەن. نارىق ءوز زاڭىنا باعىندىرسا دا, ىلگەرگى ءۇمىتتەن كوز جازعىزعان جوق. ءويتكەنى مەن دە قالىڭ كوپشىلىك سەكىلدى مەملەكەتىمىزدى باستاپ الىپ كەلە جاتقان باسشىمىزعا سەندىم.
ول – «قازاقستاندى قازاق باسقارسىن!» دەپ جەلتوقساننىڭ مۇزعا جاققان الاۋىنىڭ ارقاسىندا, حالىق قالاۋىمەن بيلىك باسىنا كەلگەن ن.نازارباەۆ بولاتىن.
تاۋەكەلگە باسىن تىككەن نۇرسۇلتان نازارباەۆتىڭ ورنىندا باسقا بىرەۋ بولعاندا مەملەكەتىمىزدىڭ ءحالى نەشىك بولاتىنىن كوز الدىما ەلەستەتە المايمىن. ويتكەنى بىردە قاتتى ايتىپ, بىردە جۇمسارتىپ, بىردە ارقادان قاعىپ, بىردە قامشىلاپ وتىرىپ, حالقىن ەكونوميكالىق تىعىرىقتان امان-ەسەن الىپ شىعىپ, ەندى عانا اياعىنا تۇرعان سابيدەي ءالجۋاز جاس مەملەكەتىن ىدىراۋ مەن قۇلدىراۋدان ساقتاپ قالعان نۇرسۇلتان ءابىش ۇلىنىڭ ولشەۋسىز ەڭبەگىن استە جوققا شىعارۋعا بولمايدى.
ول – توڭكەرىلىپ كەتكەندەي استان-كەستەن دۇنيەدە قازاعىمىزعا كەزىككەن بۇل اۋىر سىناقتان سۇرىندىرمەي وتكىزىپ, جاھاندىق سىن-قاتەرلەر تۋعىزىپ جاتقان الەمدىك ءتارتىپتىڭ تۇراقسىزدىعىنان زارداپ شەكتىرمەۋگە مەيلىنشە تىرىسىپ, دامۋدىڭ قازاقستاندىق جولىن سالىپ بەرگەن ادام. التاي مەن اتىراۋعا دەيىن الىپ جاتقان ۇلان-عايىر ۇلى دالامىزدىڭ شەكاراسىن شەگەندەپ تۇرىپ بەكىتىپ بەرگەن ادام. ابىلاي بابامىز ارمانداعان استانانى سالدى. بەس قۇرلىققا ۇيالماي كورسەتە الاتىن عاجايىپ شاھار. سوعىسسىز وتىز جىل باسقارىپ, ەلگە بەيبىت زامان ورناتتى. تاتۋلىقتى سالتانات قۇرعىزدى. وركەنيەتتى ەلۋ ەلدىڭ قاتارىنا قوستى.
تاۋەلسىز مەملەكەتىمىزدىڭ ىرگەتاسىن كوتەرىپ, نەگىزىن قالاعان ەلباسى ەل حالقىن عانا ەمەس, دۇنيە ءجۇزىن تاڭعالدىرىپ, بيلىكتى بەرۋدىڭ وزىندىك ۇلگىسىن جۇزەگە اسىردى. الەمدىك قاۋىمداستىقتاعى ساياسي بەت-بەدەلى جوعارى, شىعىس پەن باتىس ەلدەرىندەگى, يسلام الەمىندەگى, تۇركى ەلدەرىندەگى, ورتالىق ازياداعى, تمد اۋماعىنداعى ابىروي-اتاعىنا ەشكىم دە, ەشبىر الپاۋىت مەملەكەتتەر دە كوز جۇمبايلىقپەن قاراي المايتىن, قازاق دەيتىن حالىقتىڭ الەم جۇرتى الدىنداعى بەدەلى مەن ابىرويى ءۇشىن پاراسات بيىگىنەن كورىنە بىلگەن, ۇلت بولاشاعى ءۇشىن ۇلى قادام, ۇلكەن ەرلىك, سالماقتى شەشىم جاساعان ن.نازارباەۆتىڭ ەسىمى مەملەكەتىمىزدىڭ تاريحىندا ءسوزسىز التىن ارىپپەن جازىلادى.
تۇڭعىش پرەزيدەنت – ەلباسى, قاۋىپسىزدىك كەڭەسىنىڭ توراعاسى, Nur Otan پارتياسىنىڭ ءتوراعاسى, كونستيتۋتسيالىق كەڭەستىڭ مۇشەسى, ەل قامى, حالىق قامىن ءوز مۇددەسى سانايتىن, باسشىلاردىڭ جاڭا بۋىنىنىڭ بيلىككە كەلۋىن قامتاماسىز ەتۋدى ءوز مىندەتى دەپ سانايتىن نۇرسۇلتان ءابىش ۇلى مىنە, مەن ءۇشىن وسىنداي ۇلى تۇلعا.
ەندەشە, ەلباسىنىڭ ەلىمىز ءۇشىن ەتكەن ەڭبەگى قۇرمەتتەۋگە تۇرارلىق. «ادامدار ءبىزدىڭ جاقسىلىعىمىزدى ۇمىتادى, بىراق ىستەگەن قاتەلىكتەرىمىزدى ەسىندە ماڭگى ساقتايدى» دەگەن پايعامبارىمىز مۇحاممەد (س.ع.س.)-نىڭ ءسوزىن جادىمىزدا ۇستاساق, قوي ۇستىنە بوزتورعاي جۇمىرتقالاعان وسىناۋ ۋاقىتىمىزدىڭ قادىرىن تۇسىنەرمىز.
سول پايعامبارىمىز مۇحاممەد (س.ع.س.) ايتقانداي, «ساناسى قانشالىقتى تومەن بولسا, مۇرنىن سونشالىقتى اسپانعا شۇيىرەتىن ادامداردىڭ دا» تابىلىپ قالاتىنىن ەسكەرسەك, ارانداپ, اداسۋشىلىققا دا تۇسپەسىمىز ايان.
عۇلاما ءجۇسىپ بالاساعۇن ايتىپ كەتكەندەي, «نەگىزى ەڭ كۇشتى ادامدار – سابىرلى, سالماقتى ادامدار. ءسىز تۋرالى جامان ويلايتىندار – ءسىزدەن ءالسىز ادامدار. مىقتى ادامداردىڭ ءسىز جايلى ويلاۋعا ۋاقىتتارى دا جوق» ەكەنىنە كوزىمىز جەتەر ەدى.
ءۇمىت بيتەنوۆا,
قازاقستان جازۋشىلار وداعىنىڭ مۇشەسى
