بىرلەسكەن وتىرىسقا سەناتتىڭ 49 دەپۋتاتىنان 41 دەپۋتات, ءماجىلىستىڭ 107 دەپۋتاتىنان 99 دەپۋتات جانە پرەمەر-مينيستر, مەملەكەتتىك حاتشى, سونىمەن قاتار كونستيتۋتسيالىق كەڭەستىڭ, جوعارعى سوتتىڭ, ورتالىق سايلاۋ كوميسسياسىنىڭ توراعالارى, ۇكىمەت مۇشەلەرى, رەسپۋبليكا پرەزيدەنتىنە تىكەلەي باعىناتىن جانە ەسەپ بەرەتىن مەملەكەتتىك ورگانداردىڭ باسشىلارى, پرەزيدەنت اكىمشىلىگىنىڭ, پرەمەر-مينيستر كەڭسەسىنىڭ, پارلامەنت پالاتالارى اپپاراتتارىنىڭ جاۋاپتى قىزمەتكەرلەرى جانە بۇقارالىق اقپارات قۇرالدارىنىڭ وكىلدەرى قاتىستى.
بىرلەسكەن وتىرىس بارىسىندا ءماجىلىس توراعاسى سەسسيا جۇمىسىن قورىتىندىلاي كەلە, پارلامەنت تۇڭعىش پرەزيدەنت – ەلباسى نۇرسۇلتان نازارباەۆتىڭ ءتورتىنشى سەسسيانىڭ اشىلۋىندا بەرگەن تاپسىرمالارى مەن قازاقستان حالقىنا جولداۋى باسشىلىققا الىنعانىن ايتتى.
ن.نىعماتۋلين اتاپ وتكەن مالىمەتتەرگە توقتالساق, سەسسيا بارىسىندا قوس پالاتانىڭ 5 بىرلەسكەن وتىرىسى, ءماجىلىستىڭ 41 جانە سەناتتىڭ 26 جالپى وتىرىسى وتكەن. وندا 319 ماڭىزدى ماسەلە قارالعان. جالپى ءتورتىنشى سەسسيا باستالعان كەزدەن 83 زاڭ جوباسى قابىلدانعان. ونىڭ ىشىندە 82 زاڭ جوباسىنا مەملەكەت باسشىسى قول قويىپ, ولار ءوز كۇشىنە ەنگەن.
– وسى قابىلدانعان ءاربىر زاڭ, ەڭ الدىمەن, ەلباسىمىز نۇرسۇلتان ءابىش ۇلى نازارباەۆتىڭ ستراتەگيالىق جانە الەۋمەتتىك باستامالارىن ورىنداۋعا باعىتتالدى. ءاربىر زاڭ, سونىمەن بىرگە ەلىمىزدىڭ دامۋىنا, حالقىمىزدىڭ ءومىر ساپاسىن كۇشەيتۋگە جاڭا سەرپىن بەردى. ال ەڭ باستىسى, قابىلدانعان بارلىق قۇجاتتار ازاماتتاردى قولداۋعا جانە قورعاۋعا ارنالدى. وسىنىڭ بارلىعى ەكى پالاتا دەپۋتاتتارىنىڭ بىرلەسكەن جۇمىستارىنىڭ ناتيجەسى دەپ سانايمىز. وسى ورايدا سەنات تا, ءماجىلىس تە زاڭ شىعارۋ جۇمىسىنا بەلسەندى ارالاسىپ, العا قويعان باسىم باعىتتار ناتيجەلى جۇزەگە اسىرىلدى, – دەدى ءماجىلىس توراعاسى.
ءماجىلىس توراعاسى اتاپ وتكەن ماڭىزدى زاڭ جوبالارىنىڭ قاتارىندا قازاقستان پرەزيدەنتى قاسىم-جومارت توقاەۆتىڭ استانا قالاسىنىڭ اتاۋىن نۇر-سۇلتان دەپ وزگەرتۋ جونىندە باستاماسىنا وراي دەپۋتاتتار قابىلداعان «قازاقستان رەسپۋبليكاسىنىڭ كونستيتۋتسياسىنا وزگەرىستەر ەنگىزۋ تۋرالى» زاڭ بار. سونىمەن بىرگە ەلباسىنىڭ باستاماسىمەن تۇركىستان وبلىسى جانە شىمكەنت قالاسىنىڭ الداعى دامۋ جوسپارى كونستيتۋتسيالىق زاڭمەن بەكىتىلدى. سونداي-اق پارلامەنتتىڭ ءاربىر سەسسياسىندا نەگىزگى ورىن الاتىن ەلىمىزدىڭ باس قارجى قۇجاتى رەسپۋبليكالىق بيۋدجەتتى قابىلداپ, ءۇش كۇن بۇرىن عانا 2019-2021 جىلدارعا ارنالعان رەسپۋبليكالىق بيۋدجەتكە تاعى دا تۇزەتۋلەر ەنگىزىلدى. ول تىكەلەي ەلباسىمىزدىڭ ستراتەگيالىق مىندەتتەرىن جالعاستىرۋ ماقساتىنداعى مەملەكەت باسشىسى قاسىم-جومارت توقاەۆتىڭ ناقتى الەۋمەتتىك تاپسىرمالارىن جۇزەگە اسىرۋعا ارنالعان.
وسى قاتاردا «دەنساۋلىق ساقتاۋ ماسەلەلەرى بويىنشا», «دارىلىك زاتتار مەن مەديتسينالىق بۇيىمداردىڭ اينالىسى ماسەلەلەرى بويىنشا» جانە «كينەماتوگرافيا تۋرالى», «ستاندارت تۋرالى», «كولىك ماسەلەلەرى بويىنشا» بىرقاتار زاڭدار قابىلداندى.
– «دەنساۋلىق ساقتاۋ ماسەلەلەرى بويىنشا» زاڭدى قابىلداۋ كەزىندە دەپۋتاتتار تەگىن مەديتسينالىق كومەكتىڭ مەملەكەتتىك كولەمىنىڭ جاڭا مودەلىن ەنگىزۋ سياقتى باسقا دا دەنساۋلىق ساقتاۋ سالاسىنىڭ جەكەلەگەن ماسەلەلەرىن رەتتەدى. ال «دارىلىك زاتتار مەن مەديتسينالىق بۇيىمداردىڭ اينالىسى ماسەلەلەرى بويىنشا» قابىلدانعان زاڭ دارىلەردىڭ قولجەتىمدى جانە باعاسىنىڭ تۇراقتى بولۋىنا جاڭا سەرپىن بەردى. گۋمانيتارلىق باعىتتى ايتاتىن بولساق, العاش رەت «كينەماتوگرافيا تۋرالى» زاڭ قابىلدانعانىن ەرەكشە اتاپ ءوتۋ كەرەك. بۇعان دەيىن ەلىمىزدە بۇل سالاعا قاتىستى قۇجات بولماعان. سوندىقتان جاڭا قۇجاتتا كينو ءوندىرىسىن قولداۋعا, وتاندىق فيلمدەردىڭ ساپاسى مەن باسەكەگە قابىلەتتىگىن ارتتىرۋ ءۇشىن جاعداي جاسالدى, – دەدى ن.نىعماتۋلين.
ءماجىلىس توراعاسىنىڭ ايتۋىنشا, پارلامەنت كاسىپكەرلىكتى قولداۋعا جاعداي جاساۋ ءۇشىن بيزنەس-ورتانى دامىتۋ جانە ساۋدا قىزمەتىن رەتتەۋگە قاتىستى زاڭناماعا وزگەرىستەر ەنگىزدى. ول بيزنەس سالاسىن جانە ساۋدا قىزمەتىن نىعايتۋعا ەرەكشە ىقپال ەتەدى. پارلامەنت «100 ناقتى قادام» ۇلت جوسپارىن ىسكە اسىرۋدى جالعاستىرىپ, «قازاقستان رەسپۋبليكاسى ورتالىق جانە جەرگىلىكتى اتقارۋشى ورگانداردىڭ فۋنكتسيالارىن باسەكەلەس ورتاعا بەرۋ ماسەلەلەرى بويىنشا» ماڭىزدى زاڭ قابىلدادى. سەنات جانە ءماجىلىس دەپۋتاتتارى ەلىمىزدىڭ سىرتقى ساياساتىن جۇزەگە اسىرۋ جولىندا بەلسەندى جۇمىستار اتقاردى.
– سەسسيا بارىسىندا دەپۋتاتتار 12 حالىقارالىق پارلامەنتتىك ۇيىم شەڭبەرىندە بەلسەندى جۇمىس ىستەدى, 327 حالىقارالىق ءىس-شاراعا قاتىستى جانە 80-نەن استام شەتەل پارلامەنتتەرىمەن ىنتىماقتاستىقتى ارتتىرۋعا ۇلەستەرىن قوستى. سەسسيا بارىسىندا دەپۋتاتتىق كورپۋس ۇكىمەت ەنگىزگەن زاڭ جوبالارىمەن تابىستى جۇمىس ىستەپ قانا قويماي, ءوزىنىڭ زاڭ شىعارۋ باستاماسىن دا جەمىستى ورىندادى. سونىڭ ىشىندە, ەلباسىنىڭ Nur Otan پارتياسىنىڭ XVIII سەزىندە بەرگەن تاپسىرماسىنا سايكەس دەپۋتاتتار «تۇرعىن ءۇي قاتىناستارى ماسەلەلەرى بويىنشا» زاڭعا باستاماشى بولدى. ول كوپ بالالى وتباسىلار مەن جۇمىس ىستەيتىن جاستاردى تۇرعىن ۇيمەن قامتاماسىز ەتۋگە جول اشتى, – دەپ اتاپ ءوتتى ءماجىلىس توراعاسى.
پارلامەنت وتكەن سەسسيادا ۇكىمەتپەن, باسقا دا مەملەكەتتىك ورگاندارمەن, قوعامدىق ۇيىمدارمەن جانە حالىقپەن ءوزارا جۇمىستاردى ودان ءارى تابىستى جالعاستىردى. وسىعان وراي, پارلامەنتتە 20 ۇكىمەت ساعاتى, 3 پارلامەنتتىك تىڭداۋ, 24 دوڭگەلەك ۇستەل, كوميتەتتەردىڭ 29 كوشپەلى وتىرىسى جانە 4 حالىقارالىق كونفەرەنتسيا ۇيىمداستىرىلعان. پارلامەنت جۇمىسىندا 319 دەپۋتاتتىق ساۋال جولدانعان. سونىمەن قاتار وسى سەسسيادا پارلامەنت دەپۋتاتتارىنا ازاماتتاردان 7 مىڭعا جۋىق حات كەلىپ ءتۇسىپ, ولاردىڭ بارلىعى زاڭعا سايكەس قارالدى. جالپى ايتقاندا, پارلامەنت دەپۋتاتتارى 2 مىڭنان استام قالالار مەن اۋىلداردى ارالاپ, 4 مىڭداي كەزدەسۋ وتكىزگەن.
وتىرىس بارىسىندا ءماجىلىس توراعاسى پارلامەنت پەن ۇكىمەت ءوزارا ءتيىمدى قىزمەت اتقارعانمەن, ورىن العان كەمشىلىكتەردىڭ كەزدەسكەنىن دە اتاپ ءوتتى. وسىعان سايكەس, ۇكىمەتتىڭ زاڭ جوبالاۋ جۇمىسىنا باسا نازار اۋدارۋ قاجەتتىگىن ايتتى.
– وسى ورايدا, الداعى بەسىنشى سەسسيا جۇمىسىن ايتا كەتسەك, پارلامەنت ەلباسى نۇرسۇلتان ءابىش ۇلى نازارباەۆتىڭ جولداۋى مەن الەۋمەتتىك قامقورلىق باستامالارىن ىسكە اسىرۋعا ارنالعان جۇمىستاردى ودان ءارى جالعاستىرادى, – دەدى ن.نىعماتۋلين.
سونىمەن بىرگە دەپۋتاتتار ءوز جۇمىستارىندا مەملەكەت باسشىسى قاسىم-جومارت توقاەۆ ۇسىنعان 10 نەگىزگى باعىتىن باسشىلىققا الادى. قازىرگى ۋاقىتتا پارلامەنت قورجىنىندا 34 زاڭ جوباسى بار. اتاپ ايتقاندا, «2020-2022 جىلدارعا ارنالعان رەسپۋبليكالىق بيۋدجەت تۋرالى», «حالىق دەنساۋلىعى ءجانە دەنساۋلىق ساقتاۋ جۇيەسى تۋرالى» كودەكس, «ەكولوگيالىق كودەكس» پەن «پەداگوگ مارتەبەسى تۋرالى» جانە ءمادەنيەت ماسەلەلەرىنە ارنالعان زاڭدار بار.
سونداي-اق الداعى سەسسيادا پارلامەنتتە تاريحي ماڭىزى زور ءىرى حالىقارالىق شارا وتەتىن بولادى. ول – بيىلعى 23-24 قىركۇيەكتە ەلوردامىز نۇر-سۇلتان قالاسىندا وتەتىن ەۋرازيا ەلدەرى پارلامەنتتەرى سپيكەرلەرىنىڭ ءتورتىنشى فورۋمى. «ۇلكەن ەۋرازيا: ديالوگ. سەنىم. سەرىكتەستىك» دەپ اتالاتىن وسى ماڭىزدى جيىنعا 60-تان استام ەلدىڭ پارلامەنت وكىلدەرى قاتىسادى ونىڭ ىشىندە 43 مەملەكەتتىڭ پارلامەنت توراعالارى, 16 حالىقارالىق جانە پارلامەنتتىك ۇيىم باسشىلارى كەلمەك. بۇل شارا – تۇڭعىش پرەزيدەنتىمىز – ەلباسى نۇرسۇلتان نازارباەۆتىڭ ەۋرازيالىق ينتەگراتسيا يدەياسىنىڭ 25 جىلدىعىنا ارنالادى.
ءسوزىن قورىتىندىلاي كەلە, ءماجىلىس توراعاسى ن.نىعماتۋلين VI سايلانعان پارلامەنتتىڭ ءتورتىنشى سەسسياسى ءوز جۇمىسىن اياقتاعانىن جاريالاپ, سەسسيا جۇمىسىنىڭ ناتيجەسى سەنات پەن ءماجىلىستىڭ, ۇكىمەتتىڭ, ەكى پالاتا اپپاراتىنىڭ قىزمەتكەرلەرى مەن اقپارات قۇرالدارى وكىلدەرىنىڭ بىرلەسىپ اتقارعان ەلەۋلى ەڭبەكتەرىنىڭ جەمىسى ەكەنىن ايتىپ, العىسىن جەتكىزدى.
ايتا كەتەيىك, سەسسيا اياقتالعانىمەن, دەپۋتاتتاردىڭ حالىقپەن كەزدەسۋى ءۇشىن ايماقتارعا ساپارى باستالادى.
