جوبالىق كەڭسە م.نارىكباەۆ اتىنداعى قازمزۋ بازاسىندا ءبىلىم جانە عىلىم مينيسترلىگى جانە ونىڭ ۆەدومستۆولىق باعىنىستى ۇيىمدارىنىڭ لاۋازىمدى تۇلعالارى, سونداي-اق اكادەميالىق ساراپتاما سالاسىنان تارتىلعان تۇلعالار مەن قوعام وكىلدەرىنەن قۇرىلادى. بۇل جوبا ءبىلىم جانە عىلىم جۇيەسىندەگى تۇرمىستىق سىبايلاس جەمقورلىق دەڭگەيىن جويۋعا, سونىمەن قاتار ازاماتتاردىڭ مينيسترلىككە, ءبىلىم بەرۋ ۇيىمدارىنا جانە عىلىمي ۇيىمدارعا دەگەن سەنىمىن ارتتىرۋعا باعىتتالاتىن بولادى.
بۇل ناتيجەگە سىبايلاس جەمقورلىق فاكتىلەرىن تالداۋ جانە ازايتۋ, بيزنەس ۇردىستەردى وڭتايلاندىرۋ, مەملەكەتتىك قىزمەتتەردى اۆتوماتتاندىرۋ جولىمەن قول جەتكىزىلەتىن بولادى.
«بۇگىن ءبىز وسى ۋنيۆەرسيتەتكە ارنايى كەلىپ ءبىلىم سالاسى بويىنشا جوبالىق كەڭسە اشقالى وتىرمىز. جالپى ءبىلىم سالاسى جەمقورلىقپەن كۇرەسۋ بويىنشا جانە جەمقورلىققا مۇلدەم جول بەرمەۋشىلىك مادەنيەتىن قالىپتاستىرۋ قاجەت. ءبىلىم - وتە اۋقىمدى سالا. 10-15 ميلليون قازاقستان ازاماتىنىڭ ءبىلىم سالاسىنا قالاي بولسا دا, كۇندەلىكتى قاتىسى بار. تەك مۇعالىمدەردىڭ ءوزى 300 مىڭعا جۋىقتايدى. ءبىلىم سالاسىندا بولىپ جاتقان ماسەلەلەردىڭ بارلىعى حالىقتىڭ باستى نازارىندا ەكەنى بەلگىلى. ەلباسىنىڭ تاپسىرماسىنا سايكەس ادالدىق الاڭى نەگىزىندە وسى تاجىريبەنى ىسكە اسىرۋ بارلىق رەسپۋبليكا بويىنشا جۇرگىزىلىپ جاتىر. ءبىزدىڭ مينيسترلىكتە وسىعان قوسىلۋدا. نەگىزگى ماقساتىمىز جەمقورلىقپەن كۇرەسۋ. ءبىلىم بەرۋ سالاسى, تاربيە سالاسى تىكەلەي ءبىزدىڭ مينيسترلىككە جۇكتەلگەننەن كەيىن ول جاۋاپكەرشىلىكتى جۇيەلى جۇمىستار ارقىلى شەشۋگە, جەمقورلىققا جول بەرمەۋگە, ادالدىق مادەنيەتىن قالىپتاستىرۋعا جۇيەلى جۇمىستار اتقارامىز», دەدى اسحات ايماعامبەتوۆ.
اتالمىش جوبالىق كەڭسە ءبىلىم جانە عىلىم جۇيەسىندە سىبايلاس جەمقورلىققا قارسى ءىس-قيمىل بويىنشا پارمەندى شارالار ازىرلەيتىن جانە وسى سالادا ستراتەگيالىق جوسپارلاۋدى جۇزەگە اسىراتىن ءتيىمدى قۇرىلىم بولادى دەپ كۇتىلۋدە.
ال سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ قازاق مەملەكەتتىك زاڭ ۋنيۆەرسيتەتى ەلىمىزدەگى سىبايلاس جەمقورلىقتىڭ «ءيىسى» دە جوق جوعارى وقۋ ورىندارىنىڭ ءبىرى سانالاتىنىن باسا ايتتى.
«قازاقستان بۇگىنگى تاڭدا جەمقورلىقتان تازا, زاماناۋي مەملەكەت قۇرۋدا. زاماناۋي ەلدىڭ ەڭ نەگىزگى باسىمدىعى - اشىقتىق, ايقىندىق, قوعام الدىندا ەسەپ بەرەتىن مەملەكەت ءتۇزۋ. مۇنان كەيىنگى باسىمدىق - كاسىبي, دەربەس, ەكونوميكالىق تۇرعىدا ىنتالاندىرىلعان مەملەكەتتىك اپپارات قالىپتاستىرۋ», دەدى اليك شپەكباەۆ.
راۋان قايدار,
«ەگەمەن قازاقستان»
