قازاقستان پرەزيدەنتى ءوز سوزىندە زاڭ ۇستەمدىگىن ساقتاۋ قاعيداتى ورنىقتى ەكونوميكالىق دامۋعا جانە ينۆەستورلارعا دەگەن سەنىمگە ىقپال ەتەتىنىن ايتتى.
– ءبىز زاماناۋي, كاسىبي جانە دەربەس سوت جۇيەسىن قالىپتاستىرۋعا ەرەكشە كوڭىل بولەمىز. «استانا» حالىقارالىق قارجى ورتالىعىنىڭ سوتى مەن حالىقارالىق اربيتراجدىق ورتالىعىن اعىلشىن قۇقىعى قاعيداتى نەگىزىندە قۇرۋ ارقىلى ءبىز «استانا» حالىقارالىق قارجى ورتالىعىنىڭ ينستيتۋتسيونالدىق قۇرىلىمىن جاساۋدى اياقتايمىز. سونىمەن قاتار, تۇڭعىش پرەزيدەنت نۇرسۇلتان نازارباەۆتىڭ نەگىزگى باستامالارىنىڭ ءبىرىن جۇزەگە اسىرامىز, – دەدى مەملەكەت باسشىسى.
قاسىم-جومارت توقاەۆتىڭ ايتۋىنشا, «استانا» حالىقارالىق قارجى ورتالىعىنىڭ قۇرىلۋى قازاقستاننىڭ الەمنىڭ دامىعان وتىز ەلىنىڭ قاتارىنا قوسىلۋ ءۇشىن جاساعان قادامدارىنىڭ ءبىرى سانالادى.
– ءبىز بۇل مىندەتتىڭ وتە ورشىلدىك ەكەنىن تۇسىنەمىز. ول تۇراقتى ءارى ساپالى ەكونوميكالىق ءوسىمدى, ءارتاراپتاندىرۋدى, جاڭا ينۆەستيتسيا مەن تەحنولوگيانى تارتۋدى تالاپ ەتەدى. ءبىز رەفورمالاردان قورىقپايمىز. سوندىقتان, بۇرىنعى كسرو اۋماعىندا العاش رەت اعىلشىن قۇقىعى سوت تورەلىگىنىڭ جالپى جۇيەسى اياسىندا ەلىمىزدە تابىستى قولدانىلىپ وتىر, – دەدى قازاقستان پرەزيدەنتى.
مەملەكەت باسشىسى «استانا» حالىقارالىق قارجى ورتالىعىندا يسلامدىق قارجىلاندىرۋ, ادام كاپيتالىن, يننوۆاتسيا مەن تسيفرلاندىرۋدى دامىتۋ, ستارتاپ-جوبالاردى قولداۋ سالالارى بويىنشا جۇزەگە اسىرىلىپ جاتقان جوبالاردىڭ مامانداندىرىلعان كورمەسىن ارالاپ كوردى. سونىمەن بىرگە, قاسىم-جومارت توقاەۆ «استانا» حالىقارالىق قارجى ورتالىعى بيرجاسىنىڭ جۇمىسىمەن تانىستى.
