ەكى كۇنگە ۇلاساتىن رۋحاني شارانىڭ تۇساۋكەسەرى ءى.جانسۇگىروۆ اتىنداعى مادەنيەت سارايىندا الماتى وبلىسىنىڭ اكىمى اماندىق باتالوۆتىڭ قۇتتىقتاۋ سوزىمەن باستالدى. ەلباسى نۇرسۇلتان نازارباەۆتىڭ «رۋحاني جاڭعىرۋ. بولاشاققا باعدار» جانە « ۇلى دالانىڭ جەتى قىرى» اتتى باعدارلامالىق ماقالالارىندا ايتىلعان ۇلتتىق قۇندىلىقتار مەن رۋحاني مۇرانى دارىپتەپ, جاڭعىرتۋ باعىتىندا اتقارىلىپ جاتقان جۇمىستارعا توقتالعان ايماق باسشىسى قازاق-قىرعىز زيالىلارىنىڭ باس قوسۋىنا ساتتىلىك تىلەدى.
جيىن باراسىندا ءسوز العان قىرعىز رەسپۋبليكاسىنىڭ توتەنشە جانە وكىلەتى ەلشىسى جەەنبەك كۋلۋباەۆ قىرعىزستان پرەزيدەنتى سوورونباي جەەنبەكوۆتىڭ فورۋمعا قاتىسۋشىلارعا جولداعان قۇتتىقتاۋ حاتىن وقىپ بەردى. قىرعىزستان پرەزيدەنتىنىڭ كەڭەسشىسى, جازۋشى سۇلتان راەۆ تا قازاق-قىرعىز زيالىلارىنىڭ ورتاق رۋحاني مۇددە تۇرعىسىندا ەڭبەكتەنىپ, ادەبيەت پەن ونەر الەمىندەگى ساباقتاستىقتى ءوز سوزىنە ارقاۋ ەتتى. وسىنداي جىلى لەبىزدى قۇتتىقتاۋلار قازاقستان جازۋشىلار وداعىنىڭ توراعاسى, اقىن ۇلىقبەك ەسداۋلەت, تاريحشى-عالىم مامبەت قويگەلديەۆتەر تاراپىنان دا ايتىلدى.
سونداي-اق, وسى جيىندا حالىقارالىق تۇركى اكادەمياسى دايىنداعان «ماناس ەپوسى» كىتابىنىڭ تۇساۋى كەسىلىپ, زيالى قاۋىم نازارىنا ۇسىنىلدى. مۇنان كەيىن فورۋم جۇمىسى الماتى وبلىسىنىڭ «رۋحاني جاڭعىرۋ» جوبالىق كەڭسەسىندەگى زيالىلار سيمپوزيۋمىنا جالعاستى. شارالار لەگى ەرتەڭ كەربۇلاق اۋدانىندا جالعاسىپ, قازاقتىڭ ۇلى عالىمى شوقان ءۋاليحانوۆتىڭ مەموريالدىق كەشەنىندە وتەتىن «ماناس» فەستيۆالىمەن تۇيىندەلمەك. مۇندا قازاق-قىرعىز جىرشىلارى «ماناس» جىرىن جاتقا ايتۋدان جارىسقا تۇسپەك.
