سولاردىڭ ءبىرى – «جاسىل» ەكونوميكا جانە G-Global-دى دامىتۋ كواليتسياسى» ۇيىمداستىرعان الەۋمەتتىك جوبا. وسى جوبا ارقىلى اۋىل ايەلدەرى جەكە كاسىبىن باستاۋعا بولادى. جوبا نەگىزىندە 10 ادامعا 4 مىڭ دوللار تۇراتىن گرانتتى ۇتىپ الۋعا مۇمكىندىك بار. بۇل جونىندە بارلىق ءمالىمەتتى وڭىرلەردە باستالاتىن اۋىل ايەلدەرىنىڭ وبلىستىق فورۋمدارىندا بىلۋگە بولادى.
اۋىل ايەلدەرىنىڭ ءىى رەسپۋبليكالىق فورۋمىن وتكىزۋگە ارنالعان بريفينگتە ءسوز العان پارلامەنت ءماجىلىسىنىڭ دەپۋتاتى, فورۋمدى ۇيىمداستىرۋ كوميتەتىنىڭ توراعاسى مايرا ايسينا اتالعان شارا اۋىلدىڭ الەۋەتىن كوتەرۋ, ايەلدەردىڭ مۇمكىندىگىن ارتتىرۋعا باعىتتالعانىن ايتتى. «ءار ايەلگە – ءىس, ەلىمىزگە – تابىس» دەگەن ۇرانمەن بيىل ەكىنشى رەت وتكەلى وتىرعان فورۋمدى پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسياسى, سونداي-اق ەۋروپالىق باسقارۋ جانە دامۋ بانكى قولدادى», دەدى كوميتەت توراعاسى. ونىڭ ايتۋىنشا, بيىلعى اۋىل ايەلدەرىنىڭ رەسپۋبليكالىق فورۋمى 7-9 قاراشا ارالىعىندا ەلوردادا وتپەك. وعان دەيىن وسى اۋقىمدى شاراعا دايىندىق رەتىندە وبلىستىق فورۋمدار 4 شىلدەدە الماتى وبلىسىندا باستاۋ الىپ, قازان ايىندا قىزىلوردا وبلىسىندا اياقتالادى. وبلىستىق فورۋمدار ءار وڭىردە ەكى كۇن بولادى, وندا ءتۇرلى ترەنينگتەر, مەملەكەتتىك جانە جەكەمەنشىك جوبالاردىڭ ءتۇسىندىرۋ جۇمىستارى, كونسۋلتاتسيالار مەن كاسىپكەر ايەلدەردىڭ ىنتالاندىراتىن باياندامالارى جوسپارلانعان.
فورۋم جۇمىسىنىڭ بارىسىمەن كەڭىرەك تانىستىرعان «جاسىل» ەكونوميكا جانە G-Global-دى دامىتۋ كواليتسياسى» باسقارما ءتوراعاسى سالتانات راقىمبەكوۆا 14 وبلىستا دا فورۋمنىڭ باستالعانىن جەتكىزدى. «ءبىز بىلتىرعى اۋىل ايەلدەرىنىڭ رەسپۋبليكالىق ءى فورۋمىندا 250 كوشباسشى نازىك جانداردى ىرىكتەپ, ماراپاتتادىق. ولار – قازىر تاماشا ترەنەرلەر. كوشباسشى قىز-كەلىنشەكتەردىڭ ءسوزى, ءىسى, ويى مەن ءاربىر ارەكەتى كاسىپتى ەندى باستاماق اۋىل ايەلدەرىن ءسوزسىز شابىتتاندىرادى», دەيدى. ونىڭ مالىمدەۋىنشە, كواليتسيا قوعامدىق ۇيىم رەتىندە ءوز جۇمىسىن باستاعان وبلىستىق فورۋمداردىڭ كۇن ءتارتىبى شەڭبەرىندە ءۇش باستاما ۇيىمداستىرىپتى. ولار: «اۋىل – ەل بەسىگى» ارنايى جوباسىن قولداۋ جونىندەگى مەموراندۋمعا قوسىلۋ, «اۋىلدى تۇراقتى دامىتۋ ءۇشىن ۇزدىك تاجىريبەلەر مەن باستامالار» ونلاين-پلاتفورماسى قۇرىلدى, سونداي-اق جەتىستىككە جەتكەن اۋىل ايەلدەرىنىڭ رەسپۋبليكالىق مارافونى جاريالاندى.
