ءمينيستردىڭ ايتۋىنشا, مەملەكەت
باسشىسى قاسىم-جومارت توقاەۆتىڭ سايلاۋالدى تۇعىرناماسىن ىسكە اسىرۋ جوسپارى اياسىندا
وتىن-ەنەرگەتيكالىق كەشەنىندە جاڭا كەن ورىندارى ىسكە قوسىلادى دەپ جوسپارلانۋدا.
«مۇناي-گاز سالاسىندا اعىمداعى جىلدىڭ 5 ايى ىشىندە 36,5 ملن توننا مۇناي ءوندىرىلدى.
جەدەل جوسپار 101% -عا ورىندالدى» دەگەن ق.بوزىمباەۆ بيىلعى مۇناي ءوندىرۋ جوسپارى
89 ملن توننا كولەمىندە بەلگىلەنگەنىن اتاپ ءوتتى. سونداي-اق قاشاعاندا اعىمداعى جىلعى
14 ءساۋىر-19 مامىر ارالىعىنداعى جوندەۋ جۇمىستارى مەرزىمىنەن 10 كۇن بۇرىن اياقتالعانىن
ءمالىمدەدى. تەڭىز جانە جەرۇستى قۇرىلىستارىندا تەحنيكالىق جۇمىستار ءجۇرگىزىلگەن.
مۇنداعى مۇناي ءوندىرۋ كولەمى قازىر تاۋلىگىنە 400 مىڭ باررەلگە جەتكەن. مۇنداي
رەكوردتى كورسەتكىشكە جىلدىڭ سوڭىنا تامان قول جەتكىزىلەدى دەپ جوسپارلانعان
بولاتىن. «الداعى ۋاقىتتا تەڭىز كەن ورنىن كەڭەيتۋ جوباسى اياقتالسا, 2024 جىلى ءوندىرۋ كولەمى جىلىنا 39 ملن تونناعا دەيىن ۇلعايادى» دەدى مينيستر. بۇگىنگى
تاڭدا جوبادا 45 مىڭنان استام قازاقستاندىق جۇمىس ىستەۋدە. ۆەدومستۆو باسشىسىنىڭ
ءمالىمدەۋىنشە, ەلىمىزدى گازداندىرۋعا ءبولىنەتىن قاراجات كولەمى جىلدان-جىلعا
ۇلعايۋ ۇستىندە. ءناتيجەسىندە حالىقتى كوگىلدىر وتىنمەن قامتۋ كولەمى 49,7%-عا جەتتى.
قازىرگى كۇنى شامامەن 9 ميلليونعا جۋىق ادام گاز تۇتىنۋدا.
ايتا كەتەيىك, 2019-2021 جىلدار
كەزەڭىندە گازداندىرۋعا ارنالعان قاراجات وڭىرلەردى دامىتۋ, «نۇرلى جەر», سونداي-اق
اعىمداعى جىلعى 27 اقپاندا Nur Otan پارتياسىنىڭ XVIII سەزىندە بەرىلگەن ەلباسىنىڭ جەكە تاپسىرمالارىن جۇزەگە
اسىرۋ ءۇشىن ازىرلەنگەن باعدارلامالاردا كوزدەلگەن. وسىعان سايكەس بۇل جۇمىستىڭ
ودان ءارى ورىستەي بەرەتىندىگى اتاپ ءوتىلدى. ءسويتىپ ەلىمىزدىڭ 13 وڭىرىندە وسى
كەزەڭ ءىشىندە 100-دەن استام جوبا ىسكە اسىرىلماق. «ەلباسى تاپسىرمالارىن ىسكە
اسىرۋ شەڭبەرىندە گازداندىرۋ جوبالارى ەندى 1 ملن-نان استام تۇرعىندى گازبەن قامتاماسىز
ەتۋگە مۇمكىندىك بەرەدى», دەدى مينيستر. سونىمەن قاتار ق.بوزىمباەۆ 2019 جىلدىڭ سوڭىندا
ەلدى مەكەندەردىڭ گازداندىرىلۋ دەڭگەيىن 50%-دان اسىرۋ جوسپارلانعانىن ايتىپ ءوتتى.
سارىارقا گاز قۇبىرىنىڭ تارتىلۋىنا بايلانىستى ەل استاناسىمەن بىرگە, ءبىرىنشى كەزەڭدە
قاراعاندى, تەمىرتاۋ, جەزقازعان, ءساتباەۆ, ساران, شاحتينسك قالالارىنىڭ 171 ەلدى
مەكەنى كوگىلدىر وتىنمەن قامتاماسىز ەتىلمەك. جوبا اياسىندا ەلىمىزدىڭ 142 مىڭ تۇرعىنى
وتىننىڭ وسى قولايلى تۇرىنە قول جەتكىزەتىن بولادى. ەنەرگەتيكا ءمينيسترى «سارىارقا»
گاز قۇبىرىنىڭ بەلگىلەنگەن كەستەگە ءسايكەس سالىنىپ جاتقانىن دا اتاپ ءوتتى. «قازىرگى
ۋاقىتتا جەزقازعان قالاسىنا جاقىن جەردە دانەكەرلەۋ جۇمىستارى جۇرگىزىلۋدە. بۇگىنگە
شامامەن 420 شاقىرىم قۇبىر ءدانەكەرلەندى. بۇل گاز قۇبىرى ۇزىندىعىنىڭ 40%-ىن
قۇرايدى» دەپ مالىمدەدى. دانەكەرلەۋ جۇمىستارىنىڭ ورتاشا قارقىنى كۇنىنە 7-8 شاقىرىم.
وسى ىسكە 2200-دەن استام ادام مەن 700-گە جۋىق ارنايى تەحنيكا جۇمىلدىرىلعان.
ق.بوزىمباەۆ ەلىمىزدىڭ «جاسىل»
ەكونوميكاعا كوشۋ باعدارىنا سايكەس جاڭارتىلاتىن ەنەرگەتيكا سەكتورى جوسپارلى تۇردە
دامىپ كەلە جاتقانىن ايتىپ ءوتتى. «ەلەكتر ەنەرگياسىن ءوندىرۋدىڭ جالپى كولەمىندەگى جاڭارتىلاتىن
ەنەرگيا كوزدەرىنىڭ ۇلەسى 2020 جىلعا قاراي 3%-عا دەيىن, 2025 جىلعا قاراي 6%-عا دەيىن,
2030 جىلعا قاراي 10%-عا دەيىن ارتادى» دەدى ول.
ەگەر 2014 جىلى قازاقستاندا قۋاتى
177 مۆت بولاتىن 35 جەك وبەكتىسى بولسا, بۇگىندە جالپى قۋاتى 679 مۆت بولاتىن جاڭارتىلاتىن
ەنەرگيا كوزدەرىنىڭ 74 وبەكتىسى جۇمىس ىستەۋدە. جىل سوڭىنا دەيىن قۋاتى 236 مۆت بولاتىن
تاعى 10 جەك وبەكتىسىن ىسكە قوسۋ جوسپارلانىپ وتىر. ءسويتىپ جاڭارتىلاتىن ەنەرگيا
كوزدەرى وبەكتىلەرىنىڭ سانىن 2020 جىلى – 95 (1483 مۆت), 2021 جىلى 119 (2096 مۆت)
بىرلىككە جەتكىزۋ كوزدەلۋدە.
مەملەكەت باسشىسىنىڭ تاپسىرماسى
اياسىندا ەكولوگيالىق ورتانى قورعاۋ بويىنشا جول كارتاسىنىڭ ازىرلەنىپ جاتقانى اتاپ
ءوتىلدى. وسى شاراعا وراي جاڭا ەكولوگيالىق كودەكس جوباسىن ازىرلەۋ بويىنشا اۋقىمدى
جۇمىس جۇرگىزىلۋدە. مۇنداعى ەڭ نەگىزگى باعىتتاردىڭ ءبىرى – «لاستاۋشى تولەيدى» حالىقارالىق
ەكولوگيالىق قاعيداتىن ىسكە اسىرۋ. «لاستاۋشى ءۇشىن ايىپپۇل ءتولەۋدىڭ ورنىنا لاستاۋعا
جول بەرمەۋ جانە ەڭ وزىق قولجەتىمدى تەحنولوگيالاردى ەنگىزۋ ەكونوميكالىق جاعىنان
ءتيىمدى بولادى» دەدى مينيستر. ال ەميسسيالار ءۇشىن ءوندىرىپ الۋ جۇيەسى جانە تولەمدەر
مولشەرلەمەسى قايتا قاراستىرىلاتىن بولادى.
ەندى جەرگىلىكتى بيۋدجەتتەرگە
تۇسەتىن ەكولوگيالىق تولەمدەردىڭ كەمىندە 50%-ى ەكولوگيالىق ماسەلەلەردى شەشۋگە
جۇمسالاتىنى زاڭنامالىق تۇردە بەكىتىلمەك. قازىرگى ۋاقىتتا ەكولوگيالىق كودەكستىڭ
جوباسى بەلسەندى تالقىلانۋدا.
