ۇكىمەت • 27 ماۋسىم، 2019

رەسەي اۋماعىنا ءوتۋ ءتارتىبى جەڭىلدەيدى

160 رەتكورسەتىلدى

ءماجىلىس توراعاسى نۇرلان نىعماتۋليننىڭ توراعالىعىمەن وتكەن پالاتانىڭ جالپى وتىرىسىندا «2006 جىلعى 3 قازانداعى قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى قازاقستان رەسپۋبليكاسىنىڭ جانە رەسەي فەدەراتسياسىنىڭ شەكارا ماڭىنداعى اۋماقتارى تۇرعىندارىنىڭ قازاقستان-رەسەي مەملەكەتتىك شەكاراسىن كەسىپ ءوتۋ ءتارتىبى تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى ماقۇلداندى.

ن.نىعماتۋلين وتىرىستىڭ اشىلۋىندا سويلەگەن سوزىندە بارلىق دەپۋتاتتىق كورپۋس اتىنان ارىس قالاسىندا بولعان توتەنشە جاعدايدان قازا بولعانداردىڭ وتباسىلارىنا كوڭىل ايتىپ، سونىمەن بىرگە زارداپ شەككەندەردىڭ تەزىرەك جازىلىپ كەتۋىنە تىلەكتەستىك ءبىلدىردى.

– وسى كۇندەرى بۇكىل قازاقستاندىقتار ءبىر ەل بولىپ، ءبىر حالىق بولىپ جۇمىلىپ، ارىس قالاسى تۇرعىندارىنا قولدان كەلگەن كومەكتى كورسەتۋدە. سونىڭ ىشىندە ءماجىلىس دەپۋتاتتارى دا ءبىرىنشى كۇننەن باستاپ وسى وقيعادان تىس قالعان جوق. دەپۋتاتتار وزدەرىنىڭ ءبىر كۇندىك جالاقىسىن ارنايى كومەك كورسەتۋ قورىنا اۋداردى. ال كەشەدەن باستاپ ءبىر توپ دەپۋتاتىمىز حالىقپەن كەزدەسۋ ءۇشىن ارىس قالاسىنا جول ءجۇرىپ كەتتى. بارشامىز ارىس قالاسىنىڭ تەزىرەك قالپىنا كەلىپ، تۇرعىندار جاعدايىنىڭ تەزىرەك جاقسارۋىن تىلەيمىز. ارىس، ءبىز بىرگەمىز، – دەدى ءماجىلىس توراعاسى.

جالپى وتىرىستىڭ كۇن ءتارتىبى بويىنشا قازاقستان رەسپۋبليكاسىنىڭ جانە رەسەي فەدەراتسياسىنىڭ شەكارا ماڭىنداعى اۋماقتارى تۇرعىندارىنىڭ قازاقستان-رەسەي مەملەكەتتىك شەكاراسىن كەسىپ ءوتۋ تارتىبىندەگى وزگەرىستەر قامتىلعان زاڭ جوباسى بويىنشا سىرتقى ىستەر ءمينيسترى بەيبىت اتامقۇلوۆ بايانداما جاسادى.

مينيستر بۇگىندە قازاقستان مەن رەسەي قارىم-قاتىناستارى مەملەكەتارالىق بايلانىستاردىڭ ەتالونى بولىپ وتىرعانىن اتاپ ءوتتى. مەملەكەتتەردىڭ ىقپالداستىعى ىنتىماقتاستىقتىڭ بارلىق سپەكترى بويىنشا قارىشتى دامۋىمەن ايقىندالۋدا. قارقىندى ساياسي ديالوگ ورناتىلدى. تەرەڭ ەكونوميكالىق بايلانىستار قۇرىلدى.

وسى ىنتىماقتاستىقتىڭ ءساتتى وربۋىنە بايلانىستى ەكى ەل اراسىنداعى مەملەكەتتىك شەكارانى دەليميتاتسيالاۋ تولىعىمەن اياقتالىپ، ال دەماركاتسياسى بويىنشا جۇمىستار جالعاسۋدا.

ب.اتامقۇلوۆتىڭ بايانداۋىنشا، ەكى ەل اراسىنداعى شەكارا 7 500 شاقىرىمنان اسادى جانە الەمدەگى ەڭ ۇزىن شەكارا بولىپ ەسەپتەلەدى. قازىرگى ۋاقىتتا قازاقستان-رەسەي شەكاراسىندا 51 وتكىزۋ بەكەتى بار. ولاردىڭ 30-ى – اۆتوكولىك، 20-سى – تەمىرجول جانە تاعى بىرەۋى وزەن ارقىلى. سونىمەن بىرگە شەكارا ماڭىنداعى تۇرعىندارعا ارنالعان 86 وتكىزۋ بەكەتتەرى جۇمىس اتقارۋدا. ولار اتالعان ايماقتار تۇرعىندارىنىڭ قولايلى قوزعالىسىن، بارىس-كەلىسىن تاۋلىك بويى قامتاماسىز ەتۋدە.

بۇل ءوز كەزەگىندە ەكى ەلدىڭ شەكاراسىن بويلاي قونىستانعان حالىققا ەڭ جاقىن اۋدان، وبلىس ورتالىقتارىنا بارىپ-كەلۋىنە قولايلى جاعداي تۋعىزىپ وتىر. سونىمەن قاتار شەكارادان ءوتۋدىڭ جەڭىلدەتىلگەن ءتۇرى تۋىستىق بايلانىستاردىڭ ۇزىلمەۋىنە دە سەبەپكەر بولۋدا.

دەپۋتاتتارعا راتيفيكاتسيالاۋ ءۇشىن ۇسىنىلعان كەلىسىمنىڭ 3-قوسىمشاسىندا كورسەتىلگەن شەكارا ماڭىنداعى اۋماقتاردا تۇراتىن قازاقستان مەن رەسەي ازاماتتارىنىڭ شەكارانى كەسىپ ءوتۋى ءۇشىن جارامدى قۇجاتتار تىزبەسىنە وزگەرىستەر ەنگىزىلىپ وتىر.

– قازاقستاننىڭ ىشكى زاڭناماسىندا ازاماتتاردى تىركەۋ كىتابىنىڭ كۇشىن جويۋ­ىنا جانە مەكەنجاي انىقتاماسىنىڭ ەنگىزىلۋىنە وراي اتالعان كەلىسىمگە ءتيىستى وزگەرىستەر ەنگىزۋ قاجەتتىگى تۋىندادى. بۇل وزگەرىستەر 2018 جىلى 9 قاراشادا پەتروپاۆلدا XV وڭىرارالىق ىنتى­ماق­تاستىق فورۋمىندا قول قويىلعان حاتتا­مامەن ەنگىزىلدى. قازىرگى ۋاقىتتا اۋىلدىق اۋماقتاردىڭ بارلىق اكىم­دىكتەرىندە ينتەرنەت جەلىسىن قولدانۋ ارقىلى مەكەنجاي كۋالىگىن بەرەتىن ءمۇم­كىندىك بار. وسىعان بايلانىستى بۇل حاتتامانى قابىلداۋ قازاقستان-رەسەي مەملەكەتتىك شەكاراسىنىڭ ماڭىنداعى اۋماقت­اردا تۇراتىن قازاقستان ازاماتتارىنىڭ ءوتۋ ۇدەرىسىن جەڭىلدەتۋگە جانە تارتىپكە كەلتىرۋگە مۇمكىندىك بەرەدى، – دەدى سىرتقى ىستەر ءمينيسترى.

سونىمەن بىرگە رەسەيدىڭ سىرتقى ءىس­تەر مينيسترلىگى 2019 جىلى 12 ساۋىردە جول­­داعان نوتاسىندا رەسەي تاراپى حات­تا­­ما­نىڭ كۇشىنە ەنۋى ءۇشىن قاجەتتى مەملە­­كەتىشىلىك راسىمدەر اياقتالعانىن حابارلاعان.

دەپۋتاتتار زاڭ جوباسىن تالقىلاي كەلە، تۇتاس قابىلدادى.

جالپى وتىرىس بارىسىندا «قازاقستان رەسپۋبليكاسىنىڭ ازاماتتىق پروتسەستىك كودەكسىنە سوتتار جۇمىسىنىڭ زاماناۋي فورماتتارىن ەندىرۋ، ارتىق سوت ءراسىم­دەرى مەن شىعىندارىن قىسقارتۋ ماسەلە­لەرى بويىنشا وزگەرىستەر مەن تولىق­تىرۋلار ەنگىزۋ تۋرالى» جانە «1994 جىلعى 15 ساۋىردەگى كەدەن ىستەرىندەگى ىنتى­ماقتاستىق جانە ءوزارا كومەك تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوبالارى جۇمىسقا الىنىپ، وتىرىس ءداستۇرلى دەپۋتاتتىق ساۋالدارمەن تۇيىندەلدى.  

سوڭعى جاڭالىقتار

كۇلكى كەرۋەنى № 16

رۋحانيات • بۇگىن، 12:04

اقىنعا ارنالعان كۇن

رۋحانيات • بۇگىن، 07:46

قالانى دامىتۋ قۇجاتى دايىن

ايماقتار • بۇگىن، 07:43

باسپانامەن قامتيتىن باستى قۇجات

باعدارلامالار • بۇگىن، 07:23

ەر ەدىگە جانە ەلدىك مۇددە

رۋحانيات • بۇگىن، 07:20

بولمىسى ءبۇتىن باعاەۆ

رۋحانيات • بۇگىن، 07:19

ۇقساس جاڭالىقتار