– كارتوچكا ارقىلى جاسالعان قولما-قول اقشاسىز قارجى اينالىمىنا بونۋس تولەۋ جاعىن قازىر بانكتەرمەن ءبىرلەسىپ قاراستىرۋدامىز. بۇل بونۋس مەملەكەت تاراپىنان تولەنەدى, – دەدى Forbes.kz سۇراعىنا جاۋاپ بەرگەن ۇلتتىق ەكونوميكا ءمينيسترى رۋسلان دالەنوۆ.
ءمينيستردىڭ ايتۋىنشا, مەملەكەت ەسەبىنەن بەرىلەتىن بونۋس كولەمى كارتوچكامەن جۇرگىزىلگەن قارجى اينالىمىنىڭ 1-2 پايىزىن قۇراۋعا ءتيىس. تۇسكەن بونۋستى بەلگىلى ءبىر تاۋار ساتىپ الۋعا نەمەسە سالىقتى وتەۋگە پايدالانۋعا بولادى.
بۇل جاڭالىقتى جۇزەگە اسىرۋ ءۇشىن ەكى ماسەلەنى شەشىپ الۋ كەرەك. بىرىنشىدەن, بانكتەر كارتوچكالاردىڭ كولەمى, جاسالعان وپەراتسيالار تۋرالى اقپاراتتاردى جەتكىزىپ وتىرۋ جاعىن شەشۋگە ءتيىس. ەكىنشى ماسەلە, مەملەكەت تاراپىنان بونۋستى ۇسىنۋ تەتىكتەرىنە قاتىستى.
– بۇل ىسكە قاتىستى امبەباپ تەتىك ءالى جاسالعان جوق. دەگەنمەن, ءبىز حالىق قولما-قول اقشاسىز, كارتوچكامەن تولەۋگە قىزىعۋشىلىق تانىتادى دەپ سانايمىز. سول ارقىلى نارىقتاعى تەڭگە اينالىمىن ايتارلىقتاي تومەندەتۋگە قول جەتكىزەمىز. نارىقتاعى تەڭگە اينالىمى تۋرالى بارىنشا ءدال اقپاراتتى بىلسەك, سالىق ساياساتىندا دا سوعان ساي وزگەرىستەر جۇرگىزۋگە بولادى. مىسالى, سالىق اۋىرتپالىقتارىن جەڭىلدەتۋ ماسەلەسى كوتەرىلۋى مۇمكىن, – دەيدى ر.دالەنوۆ.
تاعى ءبىر ايتا كەتەرلىگى, جەكە تۇلعالار اراسىندا ءىرى كەلىسىمشارتتار بويىنشا ەسەپتەسۋ كەزىندە قولما-قول اقشانىڭ كولەمىنە شەكتەۋ قويىلۋى ىقتيمال.
– ماسەلە ەليتالىق پاتەرلەر, قىمبات تۇراتىن ليۋكس اۆتوكولىكتەرگە قاتىستى. ءارينە ءبىر بولمەلى پاتەر ءۇشىن, نە بولماسا اۋىلدىق جەرلەردەگى ۇيلەر ءۇشىن قولما-قول اقشاسىز ەسەپتەسۋدى مىندەتتەۋ ازاماتتارعا قيىنعا سوعۋى مۇمكىن ەكەنىن تۇسىنەمىز. ونىڭ ۇستىنە, بۇل ادامداردىڭ قۇقىن شەكتەيدى. سول ءۇشىن قازىر بانكتەرمەن بىرلەسىپ, شەكتى سومانىڭ كولەمىن ويلاستىرىپ جاتىرمىز, – دەدى مينيستر.
ۇكىمەتتە زاڭدى تۇلعالاردى ءوزارا كەلىسىمشارتتاردى قولما-قول اقشاسىز جۇزەگە اسىرۋعا ىنتالاندىرۋ تەتىكتەرى قاراستىرىلىپ جاتقانىن دا ايتا كەتۋ كەرەك.
