ايتۋلى جارىستى قابىلداۋعا العاشىندا الەمنىڭ ءار قيىرىندا ورنالاسقان 22 قالا نيەت بىلدىرگەن ەدى. الايدا ۋاقىت وزا ولاردىڭ باسىم بولىگى ءتۇرلى سەبەپتەرگە بايلانىستى ءوز رايلارىنان قايتتى. اقىرىندا باستى تارتىس جوعارىدا اتالعان يتاليانىڭ قوس شاھارى جانە شۆەتسيانىڭ ستوكگولم مەن ورەسى اراسىندا ءوربىدى.
كۇنى كەشە لوزاننادا وتكەن حالىقارالىق وليمپيادا كوميتەتىنىڭ (حوك) جيىنىندا تورتجىلدىقتىڭ باستى جارىسىنىڭ جالاۋى 2026 جىلدىڭ 6-22 اقپان ارالىعىندا اپەننين تۇبەگىندە جەلبىرەيتىنى بەلگىلى بولدى.
وسى كۇنگە دەيىن يتاليانىڭ قىسقى ويىنداردى ەكى مارتە قابىلداعانى بەلگىلى. اتاپ ايتساق, 1956 جىلعى دودا كورتينا-د'امپەتستسودا وتسە, 2006 جىلعى جارىس تۋريندە ۇيىمداستىرىلدى. سونداي-اق, 1960 جىلى ريمدە جازعى وليمپيا ويىندارىنىڭ الاۋى تۇتاندى.
