28 مەملەكەتتەن كەلگەن 413 بالۋاننىڭ قاتىسۋىمەن وتكەن دودانى قازاقستان قۇراماسى ءۇش جۇلدەمەن قورىتىندىلادى. اتاپ ايتساق, 48 كيلو سالماق دارەجەسىندە بەلدەسكەن عاليا تىنباەۆا مەن اقمارال ناۋاتبەك وزدەرىن وتە جاقسى قىرلارىنان كورسەتىپ, اقتىق سىندا كۇش سىناسۋ قۇرمەتىنە بولەندى. قازاقتىڭ قوس قىزىنىڭ اراسىندا وتكەن فينالدىق باسەكەدە عاليانىڭ مەرەيى ۇستەم بولدى. ول باس جۇلدەنى ولجالاسا, اقمارال كۇمىس مەدالدى موينىنا ءىلدى. سونداي-اق وسىدان بىرەر كۇن بۇرىن 66 كيلو سالماقتا ونەر كورسەتكەن نۇرزات سالىمباەۆ ءۇشىنشى ورىنعا تابان تىرەگەن بولاتىن.
ۇلدار اراسىنداعى جارىستا جەرگىلىكتى دزيۋدوشىلاردىڭ مەرەيى ۇستەم بولدى. ۆەنگريا قۇراماسىنىڭ ءۇش بىردەي وكىلى جەڭىس تۇعىرىنىڭ ەڭ بيىك ساتىسىنا كوتەرىلدى. قىزدار باسەكەسىندە ۇلىبريتانيا مەن گەرمانيانىڭ بالۋاندارى ەكى رەتتەن التىننان القا تاعىندى.
