ەلىمىزدەگى بىرلىك پەن حالىقتىڭ ءوزارا تاتۋلىعىنىڭ ماڭىزدىلىعى تۋرالى ەلباسى بۇعان دەيىن دە تالاي ايتقان-دى. اسىرەسە, قوعام تىنىشتىعىن ساقتاۋدا قۇقىق قورعاۋ قۇرىلىمدارىنىڭ الدىنا جۇكتەلەتىن مىندەتتەر وتە اۋقىمدى. ويتكەنى ءتارتىپ پەن قاۋىپسىزدىكتى قامتاماسىز ەتىپ, كەز كەلگەن قۇقىق بۇزۋشىلىققا توسقاۋىل بولاتىن ەل تىنىشتىعىن قورعايتىن – ىشكى ىستەر ورگاندارىنىڭ قىزمەتكەرلەرى. ەلباسىنىڭ پوليتسەيلەردەن تەرەڭ دە ساپالى ءوزگەرىستەر كۇتەتىنى سوندىقتان. سەبەبى قاۋىپسىزدىك – ەلدەگى تۇراقتىلىقتىڭ اجىراماس بولىگى.
ادامي تۇرعىداعى ەڭ اسىل ماقسات – ازاماتتار ساناسىندا پوليتسەيلەر – جازالاۋشى ەمەس, كەرىسىنشە, قيىن جاعدايدا كومەك كورسەتۋشى دەگەن تۇسىنىكتى ورنىقتىرۋ. ياعني, حالىقتىڭ شىنايى قامقورلىقتى سەزىنە الۋى. وسى قاعيدانى جادىنا تۋ ەتىپ, ەل مۇددەسى ءۇشىن تەر توگىپ جۇرگەن ازاماتتارىمىز ارامىزدا وتە كوپ. بويىندا ۇلتجاندىلىق پەن پاتريوتتىق قاسيەتتەر ءبىرگە ءورىلىپ, قىزمەت جولىن ەل الدىنداعى بورىشى ساناپ كەلە جاتقان ابزال ازاماتتارىمىزدىڭ ءبىرى – دانياربەك مۇساەۆ.
«وسى ءبىر ويى مەن قىرى, قىزىعى مەن قيىندىعى مول جولدى اكەم مەن الدىڭعى تولقىن اعالارىم سالدى. اكە سالعان سارا جولدى تايعاناقتاماي ءجۇرىپ ءوتۋ – بالا كۇنگى اسىل ارمانىم بولاتىن», دەيدى دانياربەك ومەتاي ۇلى.
راسىندا, اق ارمان اداستىرمادى. بۇگىندە يىعىنا پولكوۆنيك شەنىن تاققان, سىر مەن سىمباتى كەلىسكەن اتپال ازامات ءىىم كولىكتەگى پوليتسيا دەپارتامەنتى باستىعىنىڭ ورىنباسارى لاۋازىمىن اتقارادى.
ول كەز كەلگەننىڭ ىڭعايىنا كونە بەرمەيتىن بۇل ماماندىققا مەكتەپتى ءتامامداپ, اسكەري بورىشىن وتەگەننەن كەيىن كەلدى. بۇل بۇلاڭداعان بالالىقتىڭ ارتتا قالىپ, ناعىز جىگىتتىكتىڭ تولىسقان شاعى عوي. ءوزىنىڭ ايتۋىنشا, بۇل وڭ-سولدى تانىپ, اق پەن قارانىڭ جىگىن ايىرىپ ءارى ومىرگە سالماقپەن قاراي باستاعان كەز.
«تۋعان جەرگە تۋىڭدى تىك», دەمەكشى دانياربەك ومەتاي ۇلى ەڭ العاش ەڭبەك جولىن اتا-باباسىنىڭ قۇتتى مەكەنىنە اينالعان جامبىل وبلىسىنا قاراستى جاڭاتاس قالاسىنىڭ پاترۋلدىك-بەكەتتىك قىزمەتىنەن باستاعان. اسكەري ءومىردىڭ تەمىردەي تارتىبىنە ابدەن توسەلگەن جانعا قاي جۇمىستىڭ بولسىن اۋىرلىعى جوق. ونىڭ ۇستىنە پوليتسيا قىزمەتىن بالا كۇنىنەن كورىپ وسكەندىكتەن بە, وعان ءتىپتى دە تاڭسىق بولمادى. قيلى قيىندىقتارعا دا توتەپ بەردى. ءسويتىپ ءجۇرىپ ومىرىنە ازىق بولار ۇلكەن تاجىريبە جيناقتايدى. «سىرلى اياقتىڭ سىرى كەتسە دە, سىنى كەتپەيدى. – سول كەزدەگى كومەكشى قۇرالداردىڭ قازىرگى زاماناۋي قۇرالدارىنداي بولماسا دا – وزىمىزگە جۇكتەلگەن تاپسىرمالاردى ابىرويمەن ورىنداپ شىعۋىمىزعا قىلداي كەدەرگىسى بولمادى», دەيدى پوليتسيا پولكوۆنيگى وتكەندى ەسكە الىپ.
قىزمەتتىڭ ىستىق-سۋىعىنا ۇيرەنىپ, قانىعىپ كەلە جاتقان پوليتسەي 1989 جىلى كسرو ءىىم الماتى ارنايى ميليتسيا مەكتەبىنە وقۋعا تۇسەدى. مۇساەۆ وقۋدى اياقتاعان سوڭ دا تۋعان ولكەسىنە ورالىپ, جەدەل ۋاكىل بولىپ جۇمىسقا ورنالاسادى. قىلمىستىق ىزدەستىرۋ سالاسىندا كوپتەگەن كۇردەلى ىستەردى ءجۇرگىزدى, شىنىقتى, شيرادى. باستاعان ءىسىن ءاردايىم سوڭىنا دەيىن جەتكىزىپ, ءساتتى اياقتايتىن پوليتسەي – ەڭبەكقورلىعىنىڭ ارقاسىندا جۇرت نازارىنا بىردەن ىلىكتى.
ءسويتىپ, دانياربەك مۇساەۆ 1993 جىلى قاجىرلى قايراتىمەن, تاباندى ەڭبەگىمەن اعا لەيتەنانت شەنىن مەرزىمىنەن بۇرىن الىپ, ميليتسيانىڭ ۇزدىك جەدەل ۋاكىلى اتانادى.
2001 جىلى پودپولكوۆنيك د.مۇساەۆ, 2005 جىلى پولكوۆنيك اتاعىن دا مەرزىمىنەن بۇرىن الادى. بۇل دا كەز كەلگەنگە بۇيىرا بەرمەيتىن ابىروي, جەتىستىك. بۇدان سوڭ ءبىلىمىن جەتىلدىرۋ ماقساتىندا ح.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىندە وقىدى, ونى دا ءساتتى ءبىتىردى. قازىرگى تاڭدا كەيىپكەرىمىز – زاڭ عىلىمدارىنىڭ كانديداتى.
بۇعان دەيىن د.مۇساەۆ ءبىرنەشە جىل الماتى قالاسىنداعى كولىكتەگى وڭتۇستىك-شىعىس ىشكى ىستەر دەپارتامەنتى باستىعىنىڭ ءبىرىنشى ورىنباسارى قىزمەتىن اتقارعان. تەرەڭ ءبىلىم مەن جيناقى تاجىريبەنى سەرىگىنە اينالدىرا ءجۇرىپ, پولكوۆنيك وزىنەن كەيىنگى ءوسىپ كەلە جاتقان جاس ماماندارعا اقىلمان باسشى, جاناشىر اعاعا اينالدى.
ءوز سالاسىنىڭ ۇزدىك قىزمەتكەرى. ءتىپتى, كوپتەگەن ناگرادالار مەن ءتوس بەلگىلەردىڭ يەگەرى. بيىل دا ىشكى ىستەر ورگاندارىنداعى ەرەن ەڭبەگى ءۇشىن ءىى دارەجەلى «ايبىن» وردەنىن جارقىراتىپ كەۋدەسىنە تاقتى.
جالپى مۇساەۆتار ىنتىماعى بەرىك, بەرەكەسى شالقىعان شاڭىراقتىڭ يەلەرى. سونداي-اق ىشكى ىستەر سالاسىندا دا قاناتىن كەڭ جايعان ديناستيا ءداستۇرىن جالعاۋشىلار. وزىنەن كەيىنگى ءىنىلەرى سادۋبەك پەن دوسىمبەك, قارىنداسى گۇلدانا دا ۇلاعاتتى اعانىڭ ءىزىن جالعاپ, پوليتسەي اتانعان. بۇگىن دە ولاردىڭ ارقايسىسى قىزمەتتەرىن ابىرويمەن اتقارىپ ءجۇر.
«باعالاي بىلگەنگە باق قونار, قۋانا بىلگەنگە قۇت قونار», دەگەن ناقىل دا مۇساەۆتار وتباسىنا ارنالىپ ايتىلعانداي. دانياربەك ومەتاي ۇلى – اسىل جار, تۇمارلى ۇل مەن ت ۇلىمدى قىز وسىرگەن باقىتتى اكە.
