بۇل جايتقا ءبىز بەكەر نازار اۋدارىپ وتىرعان جوقپىز. ءتورت جىلدا ءبىر وتەتىن وليمپيا ويىندارىنا قاتىساتىن دزيۋدوشىلار ءدال وسى رەيتينگى ارقىلى انىقتالادى. تارقاتىپ ايتساق, ءار سالماقتىڭ 18 ۇزدىگى وليمپيادا جولداماسىنا بىردەن يەلىك ەتەدى. ودان كەيىن قۇرلىقتار اراسىنداعى تەپە-تەڭدىكتى ساقتاۋ ماقساتىندا قوسىمشا 100 جولداما تاراتىلادى. ولار دزيۋدو كۇرەسىنىڭ دامۋىنا كوڭىل ءبولىپ جاتقان جەر جاھانداعى ءار مەملەكەتتىڭ وكىلدەرىنە بەرىلەدى. ەرلەر مەن ايەلدەردى قوسا العاندا عالامدىق دودادا بارلىعى 352 تاتامي شەبەرى باق سىنايدى. ال ەگەر ءبىر مەملەكەتتىڭ بىرنەشە وكىلى ۇزدىكتەر قاتارىنان كورىنگەن جاعدايدا, جولداما رەيتينگتە ەڭ جوعارى ورىندى يەلەنگەن بالۋانعا بۇيىرادى.
قازاقستاننىڭ ەرلەر قۇراماسى مۇشەلەرى اراسىنان ەڭ جوعارى ورىندا ەل ماقتانىشى ەلدوس سمەتوۆ تۇر. 60 كيلو سالماقتا كۇش سىناسىپ جۇرگەن ريو وليمپياداسىنىڭ كۇمىس جۇلدەگەرى, الەم جانە قۇرلىق چەمپيونى, ازيا ويىندارىنىڭ جەڭىمپازى قازىرگى كەزدە التىنشى ورىندى يەلەنۋدە. بىلتىر باكۋدە وتكەن دۇنيەجۇزىلىك دودادا 66 كيلو سالماق دارەجەسىندە بەلدەسىپ, كۇمىس مەدالدى موينىنا ىلگەن ەرلان سەرىكجانوۆ جەتىنشى ساتىعا جايعاستى. قۇرلىقتىڭ دەڭگەيدەگى رەسمي جارىستاردا سان مارتە جەڭىس تۇعىرىنا كوتەرلىگەن 90 كيلو سالماقتاعى يسلام بوزباەۆ 10 ورىنعا تابان تىرەدى. سونىمەن قاتار, تاعى ءتورت قانداسىمىز «توپ-20» بالۋاننىڭ قاتارىندا. عۇسمان قىرعىزباەۆ (60 كيلو) پەن ەلدوس جۇماقانوۆ (66 كيلو) 12 ورىنداردى ەنشىلەسە, ديدار حامزا (81 كيلو) – 16 جانە جانساي سماعۇلوۆ (73 كيلو) – 19 ساتىلارعا تۇراقتادى.
ءبىزدىڭ ەڭ ولقى سوعىپ تۇرعان تۇسىمىز – الىپتارىمىزدىڭ السىزدىگى. ماسەلەن, +100 كيلو سالماق دارەجەلەرىندە ايقاساتىن ەراسىل قاجىباەۆ قازىرگى كەزدە نەبارى 33 ورىندى, ال 100 كيلو سالماقتاعى ايبەك سەرىكباەۆ پەن ۆيكتور دەميانەنكو 61 جانە 64 ورىنداردى قاناعات تۇتۋدا. ەگەر الداعى ۋاقىتتا ولار قارقىندارىن كۇرت كۇشەيتپەسە, وليمپيادا دۋىنان شەت قالۋلارى ابدەن مۇمكىن.
ايەلدەر اراسىندا جالعىز عانا وتگونتسەتسەگ گالبادراح «توپ-10» دزيۋدوشىنىڭ قاتارىنا ەنۋدە. 48 كيلو سالماقتاعى قايسار قىز توعىزىنشى ورىندى ولجالاۋدا. ال وزگە ارۋلارىمىزدىڭ قارقىنى تىم باياۋ.
وسىدان شامامەن ءبىر اي بۇرىن «ەگەمەن قازاقستان» گازەتىندە «گرۋزيندەردىڭ داڭقى دۇركىرەپ تۇر» دەگەن ماقالا جارىققا شىققان ەدى. سول ماقالامىزدا ءتۇرلى مەملەكەتتىڭ تۋى استىندا ونەر كورسەتىپ جۇرگەن ايتۋلى ۇلتتىڭ بەس بىردەي وكىلى الەمدىك رەيتينگتە كوش باستاپ تۇرعانىن تامسانا جازدىق. قازىر دە ولار ءوز تۇعىرلارىنان تايعان جوق. اتاپ ايتساق, گرۋزيا ۇلتتىق قۇراماسىنىڭ مۇشەلەرى ۆاجا مارگۆەلاشۆيلي (66 كيلو), ۆارلام ليپارتەلياني (100 كيلو) جانە گۋرام تۋشيشۆيلي (+100 كيلو) ءوز سالماق دارەجەلەرىندە تەڭدەسسىز دەپ تانىلۋدا. سونداي-اق, رەسەيلىك روبەرت مشۆيدوبادزە (60 كيلو) مەن يسپانيالىق نيكولاز شەرازاديشۆيلي (90 كيلو) دە شاشالارىنا شاڭ جۇقتىرماي كەلەدى. قالعان ەكى سالماقتا ازىربايجاندىق رۋستام ورۋدجەۆ (73 كيلو) پەن يراندىق سايد موللاەيدىڭ (81 كيلو) مەرەيى ۇستەم.
بۇگىنگى تاڭدا ەرلەردىڭ الەمدىك رەيتينگىندە رەسەي مەن جاپونيا قۇراما كوماندالارى مۇشەلەرىنىڭ قاراسى مول. رەسەيلىكتەردىڭ – 9, جاپونداردىڭ – 8 جىگىتى «توپ-10» دزيۋدوشى ساناتىندا. موڭعوليانىڭ – 6, گرۋزيا مەن ءيزرايلدىڭ – 5, برازيليا مەن وڭتۇستىك كورەيانىڭ – 4, قازاقستان, ءازىربايجان جانە گوللانديانىڭ – 3 ورەنى مىقتىلار تىزىمىنە قوسىلدى. ال ايەلدەر اراسىندا جاپونيانىڭ – 3, فرانتسيانىڭ – 2 جانە برازيليا مەن كۋبانىڭ – 1 بالۋانى الەمدىك رەيتينگتە كوش باسىندا كەلەدى.
