ونى اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ توراعاسى جەڭىس نۇرعاليەۆ اشىپ, جۇرگىزىپ وتىردى. ول ءوزىنىڭ ءسوزىن پرەزيدەنت قاسىم-جومارت توقاەۆتىڭ سايلاۋالدى باعدارلاماسىندا باستى ماسەلەلەردىڭ قاتارىندا ەكولوگيا جانە قورشاعان ورتانى قورعاۋ ايتىلعانىن, سول باستامانىڭ ناقتى ناتيجەسى رەتىندە ەكولوگيا, گەولوگيا جانە تابيعي رەسۋرستار مينيسترلىگىنىڭ قۇرىلعانىن اۋىزعا الدى. قورشاعان ورتانى قورعاۋ مەن تابيعي رەسۋرستاردى ۇتىمدى پايدالانۋدى باقىلاۋ مەن قاداعالاۋداعى مەملەكەتتىك ساياساتتى قالىپتاستىرۋ وسى مينيسترلىكتىڭ باستى مىندەتى بولىپ تابىلادى, دەي كەلىپ, ول مينيسترلىك باسشىسى ماعزۇم مىرزاعاليەۆتى تاعايىندالۋىمەن قۇتتىقتاپ, ەڭبەگىنە جەمىس تىلەدى.
قارالعان ماسەلە بويىنشا بايانداما جاساۋ ءۇشىن ءبىرىنشى ءسوز ەكولوگيا, گەولوگيا جانە تابيعي رەسۋرستار ۆيتسە-ءمينيسترى ەرلان نىسانباەۆقا بەرىلدى. ول پارلامەنت سەناتىنىڭ 2016 جىلعى جاساعان 37 ۇسىنىسىنىڭ 30-ى تولىق ورىندالعانىن ايتتى. «قازىر قالعان بولىگىن ىسكە اسىرۋ بويىنشا جۇمىستار ءجۇرگىزىلۋدە. ءالى شەشىمىن تاپپاعاندار قاتارىندا قازاقستان رەسپۋبليكاسىندا بيولوگيالىق ءارتۇرلىلىكتى ساقتاۋ مەن ورىندى پايدالانۋ بويىنشا 2030 جىلعا دەيىنگى تۇجىرىمداما جانە ورمان شارۋاشىلىعى, جانۋارلار ءدۇنيەسى مەن ەرەكشە قورعالاتىن تابيعي اۋماقتاردى دامىتۋ سالاسىندا جەكە باعدارلامالىق قۇجات ازىرلەۋ سەكىلدى ماسەلەلەر بار. «نۇر وتان» پارتياسىنىڭ باعدارلاماسىندا دا وسى جايت قارالىپ, قازىر مينيسترلىك سونى ىسكە اسىرۋ جۇمىستارىن ۇستىمىزدەگى جىلعا جوسپارلاپ وتىر», – دەدى ە.نىسانباەۆ.
سونىمەن بىرگە وسىمدىكتەر ءدۇنيەسىن قورعاۋ جونىندەگى زاڭ جوباسى دا ازىرلەنىپ, ونى 2020 جىلدىڭ جوسپارىنا ەنگىزۋ كوزدەلگەن ەكەن. «بىلتىر 52,7 مىڭ گا ورمان قالپىنا كەلتىرىلگەن. دەگەنمەن, جەرگىلىكتى اكىمدىكتەر وسى باعىتتاعى جۇمىستارىن جانداندىرا تۇسكەنى ءجون. ورمان ءورتتەرىن ءسوندىرۋ جۇمىستارىندا دا ولقىلىقتار كوپ, بۇل ماسەلەدە ءبىز جوعارى دامىعان ەلدەردەن ارتتا قالىپ وتىرمىز. قازىر اۆياپاترۋلدەر ۇشىرۋ جۇمىستارىن 8 ملن 800 مىڭ گەكتاردان 9 ملن 500 مىڭ گەكتارعا دەيىن ارتتىرۋ جوسپارلانۋدا. ءاۆياپاترۋلدى جۇرگىزۋ ورمان شارۋاشىلىعىن عانا ەمەس, ونداعى جانۋارلار مەن وسىمدىكتەر دۇنيەسىن دە قورعايدى, سوندىقتان وعان قوسىمشا جىل سايىن 1,8 ملرد تەڭگە جۇمساۋ كەرەك. دالا ورتتەرىنىڭ دە زيانى ەكوجۇيەنى جويۋدا از زارداپ شەكتىرمەيدى. جەرگىلىكتى اكىمدىكتەر بۇل جۇمىستاردى تولىق يگەرە الماۋدا», دەدى ۆيتسە-مينيستر.
بايانداما اياقتالعان سوڭ سەناتورلار ونى سۇراقتىڭ استىنا الدى. سونىڭ ىشىندە م.قۇل-مۇحاممەد قۇلاندار سانىن ارتتىرۋ ماسەلەسىنە نازار اۋداردى. ولاردى «التىن ەمەل» قورىعىنان رەسپۋبليكانىڭ بارلىق جەرىنە تاراتۋ بويىنشا اتقارىلىپ جاتقان جۇمىستاردىڭ ماردىمسىز ەكەنىن ايتقان سەناتور ونىڭ 9 تۇياعىنىڭ عانا قوستاناي وبلىسىنا جەتكىزىلگەنى كۇلكىلى ەكەنىن اتاپ ءوتتى.
سەناتور سارسەنباي ەڭسەگەنوۆ بالىق شارۋاشىلىعىنىڭ ماسەلەلەرىنە كوڭىل اۋدارىپ: «ءبىزدىڭ ەلىمىزدە بالىق اۋلاۋعا كوكتەمگى مۇز تۇسكەننەن باستاپ 24 ساۋىرگە دەيىن, ال رەسەيدە بۇل مەرزىم 25 مامىرعا دەيىن سوزىلعان. سوندا بالىقتى ولار بىزدەن 44 كۇن ۇزاق اۋلايدى. ال كۇزگى بالىق اۋلاۋ مەرزىمىن قوساتىن بولساق, ولار ءبىزدەن 55 كۇنگە ارتىق اۋلايدى. وسىنىڭ سەبەبى نەدە؟ دەپ سۇرادى سەناتور. وعان ە.نىسانباەۆ بۇرىن ەكى ەلدىڭ دە بالىق اۋلاۋ مەرزىمدەرى ءبىردەي بولعانىن, الايدا 2014 جىلدان باستاپ ءبىزدىڭ باس پروكۋراتۋرا, وكىنىشكە قاراي, كوكتەمگى جانە كۇزگى بالىق وسىمىنە زيانىن تيگىزەدى دەگەن سەبەپپەن بىزدە اۋلاۋ مەرزىمىن ازايتىپ تاستاعانىن جەتكىزدى.
سەنات توراعاسىنىڭ ورىنباسارى بەكتاس بەكنازاروۆ «بالقاش جولبارىسىن» قالپىنا كەلتىرەمىز دەگەن اڭگىمەنىڭ ءوزى بوستان-بوسقا مەملەكەت قاراجاتىن شاشۋعا ۇلاسپاي ما دەپ سۇرادى. ەرلان نىسانباەۆ «بالقاش جولبارىسى» پوپۋلياتسياسىن قالپىنا كەلتىرۋ يدەياسى حالىقارالىق تابيعات قورعاۋ قورىنان شىعىپ, بۇل ىسكە 10 ملن دوللار قاراجات قاراستىرىلعانىن ايتتى. سوندىقتان ءبىزدىڭ مەملەكەتتەن بۇل ىسكە قاراجات بولىنگەن ەمەس, دەدى ول.
وسىنداي وتە وتكىر ەكولوگيالىق, بيولوگيالىق ماسەلەلەر كوتەرىلگەن ۇكىمەت ساعاتىن سەنات توراعاسى داريعا نازارباەۆا قورىتىندىلادى. ول كوتەرىلگەن ماسەلەلەر ۇكىمەتكە ۇسىنىستار تۇرىندە تۇسىرىلەتىنىنە سەنىم ءبىلدىردى.
