2018 جىلدىڭ 1 ساۋىرىنەن باستاپ سالىقتىق جانە كەدەندىك اكىمشىلەندىرۋدى جاقسارتۋ جونىندەگى شارالار رەتىندە «استانا-1», «تاۋارلاردى تاڭبالاۋ», «ەلەكتروندىق شوت-فاكتۋرالار», «ۆيرتۋالدى قويما», «قاتەرلەردى باسقارۋ جۇيەسى» اقپاراتتىق جۇيەلەرى العاش رەت ەنگىزىلگەن بولاتىن.
قارجى ۆيتسە-ءمينيسترى رۋسلان ەڭسەباەۆتىڭ ايتۋىنشا, بۇل جۇيەلەردى ەنگىزۋدىڭ بىرقاتار ارتىقشىلىقتارى بار, ونىڭ ىشىندە الدىن الا اقپارات بەرىلگەن ساتتەن باستاپ, ءترانزيتتى رەسىمدەۋ جانە تاۋارلاردى ۋاقىتشا ساقتاۋ قويماسىندا ساقتاي تۇرۋدان شىعارىلعانان كەيىنگى باقىلاۋعا دەيىن كەدەن ۇدەرىستەرىن اۆتوماتتى تۇردە باقىلاۋ مۇمكىندىگى بولىپ وتىر.
«كەدەندىك باقىلاۋدىڭ بارلىق ۇدەرىستەرى (جەدەل باسقارۋ ورتالىعى, كولىك اۆتوماتتاندىرىلعان اقپارات جۇيەسى, دەرەكناما, Web-دەكلارانت, بروكەرلىك جۇيە, قاتەرلەردى باسقارۋ جۇيەسى) بەستەن اسا باعدارلامانى الماستىرا وتىرىپ, ءبىر اقپاراتتىق جۇيەگە شوعىرلانعان. مۇنداي جۇيە تاياۋ جانە الىستاعى 95 شەت ەلدەردە جۇمىس ىستەۋدە, Doing Business رەيتينگىندە وڭ باعاعا يە ءارى دكۇ جانە دسۇ ەرەجەلەرى مەن ستاندارتتارىنا سايكەس كەلەدى»,- ر. ەڭسەباەۆ اتاپ ءوتتى.
ساپار بارىسىندا «استانا-1» جۇيەسىن ءىس جۇزىندە قولدانۋ, قازاقستان مەن قىتاي اراسىنداعى جۇك قوزعالىسى بويىنشا ستاتيستيكالىق دەرەكتەردىڭ الشاقتىعى, بىرىڭعاي تەرەزە قۇرۋ ارقىلى كەدەندىك اكىمشىلەندىرۋدى ودان ءارى جەتىلدىرۋ ماسەلەلەرى دەپۋتاتتاردىڭ باستى نازارىندا بولدى.
جالپى, كەدەندىك راسىمدەۋدى جەتىلدىرۋ بويىنشا اتقارىلعان شارالار ارقىلى قازاقستان رەسپۋبليكاسى Doing Business`19 رەيتينگىسىندە 21 ساتىعا كوتەرىلىپ, 109-ورىنعا يە بولدى.
