بۇرىن قاراپايىم وتا جاساتۋ ءۇشىن جۇرت ءىرى قالالاردى جاعالايتىن بولسا, بۇگىندە اۋدان ورتالىقتارىنداعى اۋرۋحاناعا سەنىممەن بارادى. ءماسەلەن, سوڭعى جىلدارى وبلىستا ءولىم-ءجىتىم كورسەتكىشتەرى مىڭ ادامعا شاققاندا 5,44-گە جەتكەن. ياعني, 1,8%-عا تومەندەگەن. قان اينالىمى جۇيەسىنەن ءولىم-ءجىتىم كورسەتكىشى 10,4%-عا تومەندەگەنى كوڭىل قۋانتادى. سول سياقتى قاتەرلى ىسىكتەردەن بولاتىن ءولىم-ءجىتىم 0,9%-عا, قۇرت اۋرۋىمەن سىرقاتتانۋشىلىق كورسەتكىشى 9,2%-عا تومەندەگەن.
انا مەن بالا دەنساۋلىعىن قورعاۋ ماسەلەسىندە دە جاقسى كورسەتكىشتەر بار. انا ءولىمىنىڭ الدىن الۋدا جۇيەلى شارالار جالعاسىپ كەلەدى. بۇگىندە 75 ملن تەڭگەنىڭ مەديتسينالىق قۇرال-جابدىقتارى الىنىپ, ناتيجەسىندە انا مەن بالا دەنساۋلىعىن قورعاۋعا ارنالعان مەديتسينالىق ۇيىمداردىڭ قۇرال-جابدىقتارمەن قامتاماسىز ەتىلۋى 77%-دان 85%-عا دەيىن جەتكىزىلدى. جەرگىلىكتى بيۋدجەتتەن قارجىلاندىرىلاتىن بوسانعاننان كەيىنگى وڭالتۋ بولىمشەسى 2016 جىلى اشىلىپ, جۇمىس ىستەپ جاتىر.
2017 جىلدان باستاپ قاناتقاقتى رەجىمدە, ال 2018 جىلدان باستاپ بارلىق جۇكتى ايەلدەر مەن بالالارعا ارنالعان پاتروناجدىق قىزمەت كورسەتۋدىڭ امبەباپ-پروگرەسسيۆتى مودەلى ەنگىزىلىپ, جۇمىس ىستەيدى.
نەوناتالدى حيرۋرگيا ماماندارىنىڭ بىلىكتىلىگىن ارتتىرۋ ماقساتىندا ەكى مامان (حيرۋرگ, نەوناتولوگ) كورەي ەلىندە ءبىلىمىن جەتىلدىرىپ, ناتيجەسىندە وسى سالا بويىنشا حيرۋرگيالىق بەلسەندىلىك ارتتى. سونىمەن قوسا, بالالار اۋرۋحاناسى بويىنشا كولەمدى وتالار سانى بىلتىرعى جىلمەن سالىستىرعاندا 512 جاعدايعا نەمەسە 96%-عا وسكەن.
حيرۋرگيالىق وتا جاساۋدىڭ جاڭا ادىستەرى تاجىريبەگە ەنگىزىلدى. ونىڭ ىشىندە, شۇعىل وتانى قاجەت ەتەتىن جاعدايى تۇراقسىز نارەستەلەرگە, سول مەزەتتە پالاتادا كيۋۆەز ترانسفورمەردە وتا جاساۋ ءادىسى, لاپوروسكوپيالىق وتا جاساۋ, ەندوسكوپيالىق ادەنويدوەكتوميا, كرانيوپلاستيكا, وتە از سالماقتاعى نارەستەلەرگە ناركوز بەرۋ, وڭەش اترەزياسى انىقتالعان نارەستەگە وتا جاساۋ سياقتى اۋرۋلاردى ەمدەۋدە جاقسى ناتيجەگە قول جەتكىزىلدى.
مەديتسينالىق كومەكتىڭ ساپاسىن جاقسارتۋ ماقساتىندا وبلىستاعى دەنساۋلىق ساقتاۋ جۇيەسىنىڭ جەلىسى نورماتيۆكە سايكەستەندىرىلدى. ەكى جىلدا 25 مەديتسينالىق نىسان قولدانىسقا بەرىلدى. سوڭعى بەس جىلدا ەلدى مەكەندەردەگى باستاپقى مەديتسينالىق سانيتارلىق كومەك كورسەتەتىن ۇيىمداردىڭ 63%-ى جاڭارتىلدى. اعىمداعى جىلى ارال, قازالى اۋداندىق ورتالىق اۋرۋحانالارى, 3 دارىگەرلىك امبۋلاتوريا (اقجارما, بەكباۋىل, وركەندەۋ) قولدانىسقا بەرىلدى. ال شيەلى اۋدانىندا ورتالىق اۋرۋحاناسىنىڭ قۇرىلىسى جۇرگىزىلىپ جاتىر.
دەنساۋلىق ساقتاۋ سالاسىندا وبلىستاعى دەنساۋلىق ساقتاۋ ۇيىمدارىن زاماناۋي مەديتسينالىق تەحنيكامەن جابدىقتاۋعا سوڭعى بەس جىل ىشىندە 8 047,4 ملن تەڭگەگە مەديتسينالىق قۇرال-جابدىق ساتىپ الىنىپ, ناتيجەسىندە مەديتسينالىق ۇيىمداردىڭ ماتەريالدىق تەحنيكالىق جابدىقتارمەن جاراقتاندىرۋ كورسەتكىشى 34,9%-عا ءوستى.
2018 جىلدىڭ 1 قاڭتارىنان باستاپ بايقوڭىر قالاسىنداعى ومو فيليالىندا ەمحانا اشىلىپ, وعان وسى ۋاقىتقا دەيىن رەسەي فەدەراتسياسىنىڭ مەديتسينالىق ۇيىمدارىنان قىزمەت الىپ جۇرگەن 25 مىڭنان اسا قازاقستاندىق تىركەلدى. اقاي, تورەتام ەلدى مەكەندەرىندەگى حالىققا مامانداندىرىلعان مەديتسينالىق كومەكتىڭ قولجەتىمدىلىگىن ارتتىرۋ ماقساتىندا 2019 جىلدىڭ 1 قاڭتارىنان باستاپ وسى ەلدى مەكەندەردە ورنالاسقان مەديتسينالىق ۇيىمدار بايقوڭىر قالاسىنداعى وبلىستىق مەديتسينا ورتالىعى فيليالىنىڭ قۇرامىنا بەرىلدى.
امبۋلاتوريالىق دەڭگەيدە بەرىلەتىن تەگىن ءدارى-دارمەكتەرگە تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە امبۋلاتوريالىق دەڭگەيدە تۇرعىنداردى تەگىن ءدارى-دارمەكتەرمەن قامتاماسىز ەتۋ ءۇشىن 2018 جىلعا بولىنگەن قارجى بىلتىرعىمەن سالىستىرعاندا 2 ەسەگە ءوسىپ, 6 ملرد 431 ملن تەڭگەگە جەتتى.
ەلباسىنىڭ «تسيفرلى قازاقستان» باعدارلاماسى اياسىندا 32 مەديتسينالىق ۇيىمعا مەديتسينالىق اقپاراتتىق جۇيەلەر ەنگىزىلىپ, كورسەتكىش 100%-عا جەتكىزىلدى.
ۇكىمەت پەن وبلىس اكىمدىگىنىڭ ۇزاق جىلدارعا ارنالعان كەشەندى جوسپارلارىنىڭ ارقاسىندا وسىنداي جەتىستىكتەرگە جەتىپ وتىرمىز. بۇگىندە الەمدەگى دامىعان مەملەكەتتەردىڭ مەديتسينالىق قوندىرعىلارى قازاقستاندىقتارعا قىزمەت ەتە باستادى. ماماندارىمىز كاسىبي بىلىكتىلىگى جاعىنان ءوستى. حالقىمىز ەڭ ۇلكەن بايلىققا دەنساۋلىقتى جاتقىزادى. قىزىلوردا وبلىسىندا حالىقتىڭ دەنساۋلىعىن جاقسارتۋ جولىندا وسىنداي كەشەندى جۇمىستار جۇرگىزىلىپ جاتىر.
باقىتجان نارشاباەۆ,
قازالى اۋداندىق اۋرۋحاناسىنىڭ حيرۋرگى
قىزىلوردا وبلىسى
