«رۋحاني جاڭعىرۋ» باعدارلاماسى اياسىندا ۇيىمداستىرىلعان فەستيۆال ۇلىتاۋ اۋداندىق مادەنيەت ۇيىندە وتكەن «ەدىگە تاۋ – ەسكى جۇرت ەسكەرتكىشى» اتتى عىلىمي-تاجىريبەلىك كونفەرەنتسيامەن باستالدى. جيىننان سوڭ قوناقتار ەدىگە تاۋىنا بارىپ, قاتپارىنا تاريح تۇرعان قاسيەتتى مەكەنمەن تانىستى.
ءتۇس اۋا ءداستۇرلى جانە بارد اندەرى بايقاۋىنىڭ ىرىكتەۋ كەزەڭىندە ونەرپازدار باق سىناستى. كەش تۇسە جاستار ءۇشىن «التىباقان اندەرى» مەرەكەسى ۇيىمداستىرىلىپ, التىباقان تەپكەن جاستار شىرقاعان قازاقتىڭ حالىق اندەرى ۇلىتاۋ اسپانىندا قالىقتادى.
«كوكمايسا» ەتنوفەستيۆالىنىڭ ەكىنشى كۇنى قوناقتار تەاترلاندىرىلعان كورىنىستەردىڭ كۋاسى بولدى. مۇنان سوڭ قولدانبالى ونەر بويىنشا شەبەرلىك سىنىپتار, ساداق اتۋ, قاتىن كۇرەس, اۋدارىسپاق, تەڭگە الۋ, اساۋ ۇيرەتۋ سىندى ۇلتتىق سايىستار ۇيىمداستىرىلدى. كەشكە قاراي ءان بايقاۋىنىڭ شەشۋشى سايىسىنا جولداما العان ورىنداۋشىلار ونەر كورسەتتى. سايىس سوڭىندا جەڭىمپازدار مەن جۇلدەگەرلەر جينالعان قاۋىم قۇرمەتىنە گالا-كونتسەرت قويدى.
فەستيۆالدىڭ سوڭعى كۇنىندە قوناقتار مەن قاتىسۋشىلار قاسيەتتى ۇلىتاۋ تاۋلارىنا سالت اتپەن ساياحات جاساپ, تاريح تۇنعان ولكەنىڭ اۋاسىمەن تىنىستادى. سونداي-اق, بۇل كۇنى كوكپار, قىز قۋ, الامان بايگە ۇيىمداستىرىلىپ, فەستيۆالدىڭ جابىلۋ سالتاناتى ءوتتى.
ەسكە سالساق, «كوكمايسا» ەتنوفەستيۆالى العاش رەت 2018 جىلى جەزقازعاننان 160 شاقىرىم جەردەگى كەنەنباي كولىنىڭ جانىندا وتكەن ەدى. ۇيىمداستىرۋشىلار «كوكمايسا» ەتنوفەستيۆالى ۇلىتاۋ اۋدانىنىڭ تۋريستىك الەۋەتىن ارتتىرۋعا سۇبەلى ۇلەس قوسادى دەپ سەنىممەن ايتادى. راسىندا دا, سىرتتان كەلگەن مەيمانداردىڭ ريزا كوڭىل, ىستىق ىقىلاستى لەبىزدەرىنە قاراپ, بۇل رۋحاني تۇرعىداعى ماڭىزدى شارانى شەتەلدىك قوناقتاردى قازاق حالقىنىڭ تاريحىمەن جانە مادەنيەتىمەن تانىستىرۋدىڭ ۇتىمدى جانە وتە كورنەكتى مۇمكىندىگى دەپ ايتۋعا تولىق نەگىز بار.
قاراعاندى وبلىسى
