ءۇش كۇنگە سوزىلعان حالىقارالىق جايدارمان فەستيۆالى ارنايى باعدارلامالىق جوسپار نەگىزىندە جۇزەگە استى. فەستيۆالدىڭ العاشقى كۇنى شەت ەلدىڭ جاستارى مەن قازاقستاندىق توپتاردى تابىستىرۋ ماقساتىندا اشىلۋ سالتاناتى ءوتتى. جاستار سارايىنىڭ تورىندە بەلگىلى جايدارمانشىلاردىڭ جۇرگىزۋىمەن كونتسەرتتىك باعدارلاما قويىلدى. سونداي-اق, فەستيۆالدىڭ ەكىنشى كۇنى شەتەلدىك قاتىسۋشىلار ءۇشىن نۇر-سۇلتان قالاسىنا ارنايى ەكسكۋرسيا ۇيىمداستىرىلدى. قالا ىشىندە ورنالاسقان ءزاۋلىم عيماراتتار مەن مۇراجايلاردى, «بايتەرەك» پەن «ەكسپو» كەشەندەرىن جانە تەاترلاردى ارالاتتى. شارا بارىسىندا قوناقتارعا قازاق ەلىنىڭ تاريحى باياندالىپ, سالت-داستۇرلەرى جايلى مالىمەتتەر ايتىلدى.
فەستيۆالدىڭ ء ۇشىنشى كۇنى قاتىسۋشى تۇركى تىلدەس مەملەكەتتەردەن كەلگەن كوماندالار مەن قازاقستاندىق توپتار اراسىندا جايدارمان سايىسى ۇيىمداستىرىلدى. بەيبىتشىلىك جانە كەلىسىم سارايىندا وتكەن دوداعا بارلىعى 10 كوماندا قاتىستى. ونىڭ 6 شەتەلدىك, 4 قازاقستاندىق توپ. «قازاقستان حالقى اسسامبلەياسىنىڭ قۇراماسى» (نۇر-سۇلتان قالاسى), «بايان ولكە» قۇراماسى (موڭعوليا), «ءبىز قازاقپىز» كومانداسى (ەكىباستۇز قالاسى), «قاراقالپاقستان قۇراماسى» (وزبەكستان رەسپۋبليكاسى, نوكىس قالاسى), «باشقۇرتستان قۇراماسى» (رەسەي فەدەراتسياسى, ۋفا قالاسى), «نوعاي قۇراماسى - التىن وردا» (رەسەي فەدەراتسياسى, نوعاي اۋدانى), «بۇگىن.kz» (شىمكەنت قالاسى), «تاتارستان قۇراماسى» (رەسەي فەدەراتسياسى, قازان قالاسى), «ميلليون» - «نۇر-ءۇمىت» ونەر ورتالىعى (شىمكەنت قالاسى), «پوزيتيفف» (قىرعىزستان رەسپۋبليكاسى, بىشكەك قالاسى) كوماندالارى ءوز وتاندارىنىڭ نامىسىن قورعادى.
ونەر كورسەتكەن كوماندالارعا قازىلار ءتيىستى ۇپاي ساندارىن ۇلەستىرىپ, جەڭىمپازداردى انىقتادى. قازىلار القاسىنىڭ ءادىل شەشىمىمەن «بايان ولكە», «قاراقالپاقستان», «باشقۇرتستان» قۇراما كوماندالارى ءىىى ورىنعا لايىق دەپ تانىلىپ, 150 مىڭ تەڭگە كولەمىندەگى قارجىلاي سىيلىققا يە بولدى. جۇلدەلى ءىى ورىن يەگەرلەرى ءۇشىن 300 مىڭ تەڭگە اقشالاي سىيلىق بەرىلدى, بۇل تۇعىرعا «بۇگىن.kz» جانە «پوزيتيفف» كومانادالارى كوتەرىلدى. ءۇش كۇنگە سوزىلعان حالىقارالىق ءازىل فەستيۆالىنىڭ جەڭىمپازى «نوعاي قۇراماسى - التىن وردا» كومانداسى اتاندى. ءى ورىندى يەلەنگەن نوعاي اۋدانىنىڭ نامىسىن قورعاعان جاستارعا 1 ميلليون تەڭگە كولەمىندەگى اقشالاي سىيلىق بەرىلدى.
«ۇزدىك ويىنشى» اتالىمىنا «تاتارستان قۇراماسىنىڭ» ويىنشىسى – نايل سالاxوۆ لايىق دەپ تانىلدى.
اسەم تاڭاتار
ەۇۋ-ءدىڭ جۋرناليستيكا فاكۋلتەتى ستۋدەنتى
