پرەزيدەنت • 17 ماۋسىم، 2019

ەلىمىزدە «پرەزيدەنتتىڭ كادرلىق رەزەرۆى» جاساقتالادى

643 رەت كورسەتىلدى

قاسىم-جومارت توقاەۆ پرەزيدەنتتىك قىزمەتىنە كىرىسەر الدىنداعى ۇلىقتاۋ سالتاناتىندا قازاقستاندى دامىتۋدا جاستاردىڭ قوزعاۋشى شەشۋشى كۇشكە يە ەكەنىن ايتىپ، الداعى ۋاقىتتا «پرەزيدەنتتىڭ كادرلىق رەزەرۆى» تۇزىلەتىنىن اتاپ ءوتتى. بۇل سايلاۋالدى تۇعىرنامادا ايتىلعانداي، ساباقتاستىقپەن بىرگە ساياسي باسقارۋ قۇرامىندا وزگەرىستىڭ دە بولاتىنىن بايقاتادى. ياعني ەلىمىزدىڭ جوعارى ساياسي يستەبليشمەنتى جاڭارادى.

بۇل تۋرالى پرەزيدەنتتىڭ ءبىر اي بۇرىن ەلىمىزدىڭ باتىس وڭىرىنە جا­سا­عان جۇمىس ساپارىندا ايتىلعان ەدى. مەملەكەت باسشىسى تۋيت­تەر­دە­گى پاراقشاسىندا دا ەكونوميكادا، عىلىمدا، مادەنيەت پەن سپورت سالا­سىن­داعى تالانتتى جاستاردى قول­داۋ­­عا جاعداي جاسالاتىنىن جازدى. «ءبىز­دىڭ نەگىزگى باسىمدىق – جاستارعا ارنالعان الەۋمەتتىك ءليفتىنىڭ ءتيىم­دى­لى­گى مەن اشىقتىعىن قامتاماسىز ەتۋ. وسى ماقساتتا «پرەزيدەنتتىڭ كادرلىق رە­زەر­ۆى» قۇرىلادى» دەگەن ءسوزى جاستاردىڭ كوكەيىندەگى ويدى تاپ باستى.

ەلباسى 2019 جىلدى جاستار جىلى دەپ جاريالادى. «جاستار – ەل تىرەگى» ارنايى جوباسى جۇمىس ىستەي باستادى. «جاس كاسىپكەر» اتتى جاس­تار­دىڭ كاسىپكەرلىك باستامالارىن دامىتۋ باعدارلاماسى ىسكە اسىرىلماق. پرەزيدەنت ۇلىقتاۋ سالتاناتىندا جاس­تاردى جۇمىسپەن قامتۋ باعدارلاماسى ەنگىزىلەتىنىن ايتتى. سونىمەن بىرگە جاستاردىڭ ارمان-ماقساتتارىن جۇزەگە اسىرۋعا جانە جەكە «تابىستىلىق ءومىر­بايا­نىن» قالىپ­تاس­تىرۋىنا بارلىق مۇمكىندىكتى بەرۋ قا­جەت­تىگىن جەتكىزدى. «پرە­زيدەنتتىڭ كا­در­­لىق رەزەرۆى» ايا­سىندا مەملەكەتتىك قىز­مەتتىڭ بار­لىق دەڭگەيىندە دارىندى جاس باس­قا­رۋشىلاردى دايىنداۋ تۋرالى ءمىن­دەت­تەمە قويىلىپ وتىر. «ءبىزدىڭ جاس­تارىمىز – ماقساتكەر، ەڭبەكقور، كرەا­تيۆتى، سوندىقتان قازاقستاننىڭ كەلە­شە­گى سەنىمدى قولدا» دەدى ق.توقاەۆ.

البەتتە، جاستىڭ اتى – جاس. ءبىر عا­سىر بۇرىن جاڭا گۇل اشقان باقشاداي جاس­تاردان ءۇمىت ەتكەن مىرجاقىپ دۋ­لات­ ۇلى «حالىققا، جاستار، باسشى بول! قاراڭعىدا جەتەكتەپ» دەپ جازدى. الاش ارداقتىسىنىڭ جاس بۋىننىڭ رۋ­حىن جانىعان ءسوزى ءالى دە وزەكتى. ءويت­كە­نى قازىرگى جەدەل وزگەرىستەرگە تولى جاھاندىق سىن-قاتەرلەرگە ۋاقتىلى جاۋاپ قاتۋ قاجەت. بۇل رەتتە زاماننىڭ ءۇنى، ويى مەن تالابى ۇدەسىنەن تابىلاتىن جاستاردىڭ قولىنداعى قۋاتتى رەسۋرستى ءتيىمدى پايدالانعان ءلازىم. قازاقتىڭ قاي ءتامسىلىن الساڭىز دا، ۇلكەن­گە ىزەت، جاسقا جول كورسەتەدى، «جاس كەلسە – ىسكە» دەيدى. سوندىقتان ەلدىڭ باسقارۋ قۇ­رى­لىمىنداعى بۋىن الما­سۋىنىڭ ءجۇر­گىز­ىل­ۋى زاڭدىلىق.

بۇگىندە قازاقستان حالقىنىڭ 3 ملن 900 مىڭنان استامىن جاستار قۇرايدى (22،5 پايىز). «جاستار» عىلىمي-زەرتتەۋ ورتالىعىنىڭ مالىمەتىنشە، ەلىمىزدە مەملەكەتتىك قىزمەتتە جۇرگەن وسكە­لەڭ ۇرپاقتىڭ ۇلەسى از ەمەس. ماسە­لەن، ءبۇ­گىن­دە 22 مىڭعا جۋىق جاس مەم­لە­كەتتىك اكىمشىلىك قىزمەتتە ەڭبەك ەتەدى. سونداي-اق اكىمدەردىڭ بارلىق دەڭگەيىندە ەل باسقارۋ ىسىنە ارالاسىپ جۇرگەن 137 جاس بولسا، 29 جاسقا دەيىن جەرگىلىكتى ءماس­ليحاتتارعا سايلانعان 184 دەپۋتات بار ەكەن. ورتالىق ديرەكتورى تال­عات قاليەۆتىڭ ايتۋىنشا، ەلىمىزدە پرە­زي­دەنتتىڭ كادرلىق رەزەرۆىنىڭ ءتۇزىلۋى – قۇپ­تار­لىق باستاما. بۇل رەتتە جاستاردىڭ كۇش-جىگەرى، جاڭا يدەيالاردى الىپ كەلۋى جانە جاستىق ماكسيماليزمى دە قوعامنىڭ العا جىلجۋىنا ايتارلىقتاي ىقپال ەتپەك. سونداي-اق بۇل ەلىمىزدەگى جو­عا­رى لاۋازىمدارعا جاس بۋىننىڭ كەلۋىنە جول اشادى.

جالپى، بۇعان دەيىن ەلىمىزدە ۇكى­­­مەت، جەكەلەگەن ۆەدومستۆولار مەن Nur Otan پارتياسىنىڭ، جەر­­گى­­لىك­تى اكىمدىكتەردىڭ كادرلىق رە­زەر­ۆ­تەرى جاساقتالعانى بەلگىلى. ءما­سە­لەن، ون شاقتى جىل بۇرىن ءبى­لىم جانە عىلىم مينيسترلىگى جاس تالانت­تى، بەلسەندى قازاقستاندىقتار قاتارىنان ەلدىڭ باسقارۋشى كادرلارىن انىقتاۋ، ىرىكتەۋ، دايىنداۋ جانە تاربيەلەۋگە باعىتتالعان «جاستار كادرلىق رەزەرۆى» جوباسىن ىسكە اسىردى. سونداي-اق ەلىمىزدەگى باس پارتيا دا كادرلىق رەزەرۆتى قالىپتاستىرۋعا كۇش جۇمساپ، ولاردىڭ قاتارىندا جاس بۋىن مەن ايەلدەر قاۋىمىنىڭ دا كەم بولماۋىن قوزعاپ، قولداپ كەلەدى. ال مەملەكەتتىك قىزمەتشىلەر اراسىندا كادرلىق رەزەرۆ «ا» كورپۋسى بويىنشا ىرىكتەلەتىنى بەلگىلى. دەسە دە، بۇل رەزەرۆتەردەن قوعامنىڭ جاپپاي سۇيىسپەنشىلىگىنە بولەنگەن ءىرى تۇلعالار شىعا قويعان جوق. با­سىم بولىگى نومەنكلاتۋرالىق ورىن­داۋ­شىلىق دەڭگەيدە قالىپ قويدى. ساراپشىلاردىڭ ايتۋىنشا، ەندى جاساقتالاتىن «پرەزيدەنتتىڭ كادرلىق رەزەرۆىنە» ەنگەن جاستار مانساپتىق تۇرعىدا ۇلكەن كەڭىستىككە شىعۋعا مۇمكىندىك الادى. بۇل مەملەكەتتىك باسقارۋ قۇرىلىمىنا قان جۇگىرتۋگە، حالىقپەن اشىق ءارى سەنىمدى ديالوگ ورناتۋعا، كۇرمەۋلى ماسەلەنى دەر كەزىن­دە شەشۋگە، ەڭ باستىسى باسقارۋ قۇرى­لى­مىن جاسارتۋعا سەپتىگىن تيگىزبەك.

دامىعان ەلدەردە كادردىڭ قادىرى جوعارى. ولار وسى باعىتتا ورنىق­تى تالداۋلار جۇرگىزەدى. ماسەلەن، وتكەن عاسىردىڭ سەكسەنىنشى جىلدارى اقش-تا جۇرگىزىلگەن الەۋ­مەت­تىك زەرتتەۋلەردە كادرلىق رەزەرۆ­تى ازىرلەۋگە قوماقتى شىعىن جۇم­­ساعان كاسىپورىنداردىڭ 40 پايىزىن­دا مامانداردىڭ تۇراقسىزدىعى باي­قال­عان. مۇنىڭ باستى سەبەبى رەتىندە كادرلىق رەزەرۆپەن جۇمىستىڭ دۇرىس ۇيىمداستىرىلماۋى، ياعني ءتيىستى لا­ۋازىمعا ۇمىتكەردى باعالاماۋ، قىز­­مەتكەرلەرگە كۇش-جىگەر بەرۋدىڭ جەت­كى­لىكسىزدىگى جانە مانساپتىق ءوسۋ كە­لە­­شەگىنىڭ بولماۋى، سونداي-اق قىز­مەتكەرلەردىڭ ءوز ءبىلىمى مەن بىلىگىن تو­لىق پايدالانا الماۋى اسەر ەتكەنى اتالادى. سوندىقتان باتىس الەمىنىڭ ءىرى كورپوراتسيالارى بۇگىندە كادرلىق رەزەرۆتى ازىرلەۋدە قاتەلىكتەردەن قاشۋعا كوپ كوڭىل بولەدى. بۇل رەتتە كادر ازىرلەۋدەن بۇرىن ءار قىز­مەت­كەر­دىڭ كاسىپورىن كەلەشەگىنە قوسار ۇلەسى ەرەكشە ەسكەرىلەدى.

جاقسى باسشى – ەلدىڭ تۋى. قازىرگى قوعامدا ات ۇستىنەن يت قابار جامان ەمەس، قار ۇستىنە وت جاعار جاقسى مامان، ءبى­لىكتى باسشى كەرەك. وسىعان دەيىن ۇلتتىق كومپانيالاردىڭ مەنەدجەرلىك توبى مايلى جىلىككە بالانىپ، «بارماق باستى، كوز قىستىمەن» ەركەتوتايلارعا جول بەرىلگەنى دە شىندىق. ال «پرە­زي­دەنتتىڭ كادرلىق رەزەرۆى» شىن مانىندەگى حالىقشىل، ىسكەر، قارا­پا­يىم، ارى تازا باسقارۋشىلار مەكتەبىنە اينال­ۋى ءتيىس.

سوڭعى جاڭالىقتار

رۋحاني قازىنانىڭ قاينارى

قازاقستان • كەشە

بالا ءسۇيۋ – باقىت

قوعام • كەشە

اعا-دوستى اڭساۋ

ونەر • كەشە

اتىراۋشا اقشا «اساۋ»

ايماقتار • كەشە

ميزامشۋاق

فوتوگالەرەيا • كەشە

استىق ءتۇسىمى تومەن - اشم

قازاقستان • كەشە

ۇقساس جاڭالىقتار