«جاستار جىلىن» قولداۋ اياسىندا وتكەن وسى جارىستا وزبەكستان, موڭعوليا جانە قازاقستاننىڭ بىرقاتار وقۋ ورىندارىنىڭ ستۋدەنتتەرى قاتىسىپ, 10 سالماق دارەجەسى بويىنشا ءتۇرلى-ءتۇستى جۇلدەلەردى ساراپقا سالدى. ال باسەكەلەردى تاماشالاۋعا كەلگەن ارداگەر بوكسشىلاردىڭ قاتارى مول بولدى. سولاردىڭ اراسىنان وليمپيادا چەمپيونى ەرماحان ىبىرايىموۆ, كسرو-نىڭ ەكى دۇركىن چەمپيونى كارىمجان ءابدىراحمانوۆ, كەزىندە وداقتىق جارىستاردا وزا شاپقان بولات ساعىندىقوۆ, ەلىمىزگە ەڭبەك سىڭىرگەن جاتتىقتىرۋشىلار سەرىك ابدەناليەۆ, بوريس تسحۆيراشۆيلي, جۇمابەك ومىرزاقوۆ, حاميت باراەۆ, ەدۋارد گابدۋلوۆ, بولات نۇرپەيىسوۆ, مۇرات سيقىمباەۆ جانە قازاقستاننىڭ ستۋدەنتتەر قۇراماسىنىڭ باپكەرلەرى داستان سادۋاقاسوۆ پەن قايرات قاجى كارمەنوۆتى كوزىمىز شالدى.
– وسى جارىستى ءبىزدىڭ اكادەميا 19 مارتە ۇيىمداستىرىپ وتىر. ونىڭ دەڭگەيى جىلدان-جىلعا ارتىپ كەلە جاتقانىنا بارشا جۇرت كۋا. بۇگىنگى تاڭدا ايتۋلى وقۋ ورنىنىڭ قابىرعاسىنان شىققان جانە وسى تۋرنيردە شەبەرلىكتەرىن شىڭداعان بوكسشىلاردىڭ دەنى قالىڭ كورەرمەنگە جاقسى تانىس. ولاردىڭ قاتارىندا وليمپيا ويىندارى مەن الەم چەمپيوناتتارىندا اتوي سالعان ساڭلاقتار دا بار. بۇيىرتسا, الداعى جىلدارى وسى جارىستا جەڭىمپاز اتانعاندارعا سپورت شەبەرى اتاعى بەرىلەتىندەي دارەجەگە كوتەرۋدى كوزدەپ وتىرمىز, – دەيدى قازاقتىڭ سپورت جانە تۋريزم اكادەمياسىنداعى بوكس جانە اۋىر اتلەتيكا كافەدراسىنىڭ مەڭگەرۋىشىسى تايىرجان ىسقاقوۆ.
جارىستىڭ وزىنە كەلەر بولساق, جينالعان جۇرت 81 كيلو سالماقتا سايىسقا تۇسكەن حالىقارالىق دارەجەدەگى سپورت شەبەرى ايات مارجىقباەۆتىڭ ونەرىنە ەرەكشە ريزا بولدى. وسىعان دەيىن جاستار اراسىنداعى قۇرلىق بىرىنشىلىگى مەن «ازيا بالالارى» تۋرنيرىندە جۇلدە العان استانالىق جاس ورەن وسى دودادا دا اسقان شەبەرلىك تانىتتى. باستاپقى باسەكەلەرىنىڭ بارلىعىن ايقىن باسىمدىقپەن ۇتقان ەرىك مارجىقباەۆتىڭ شاكىرتى فينالدا «بوستان بوكسينگ» كلۋبىنىڭ وكىلى الدان سەلمۇرزاەۆقا سان سوقتىردى.
60 كيلو سالماقتاعى قازستا ستۋدەنتى ەرتۋعان زەينۋلينوۆتىڭ دا مىقتىلىعى ەش كۇمان تۋعىزعان جوق. ستۋدەنتتەردىڭ الەم چەمپيوناتى مەن جاستاردىڭ ازيا بىرىنشىلىگىندە جەڭىس تۇعىرىنا كوتەرلىگەن الماس جىڭعىلباەۆ پەن قايرات كارمەنوۆتىڭ شاكىرتى اقتىق ايقاستا نۇرسۇلتان يساحاننان باسىم ءتۇستى. جارىس اياقتالعان بەتتە ەڭ ۇزدىك بوكسشىعا تيەسىلى ارنايى سىيلىقتى ءدال وسى ەرتۋعان يەلەندى.
ال وزگە سالماق دارەجەلەرىندە مىنا بىلعارى قولعاپ شەبەرلەرى جەڭىمپاز اتاندى: 49 كيلو – سىرىم باتىربەكوۆ (قازستا), 52 كيلو – ەلامان بۇتىنباەۆ (نۇر-سۇلتان), 56 كيلو – الماس نۇرعالي (الماتى), 64 كيلو – نۇردوس تولەباي (قازۇۋ), 69 كيلو – ازامات يبرايموۆ (شقو), 75 كيلو – راجاببوي اتانازاروۆ (وزبەكستان), 91 كيلو – رۇستەم ءىلياسوۆ (قازستا) جانە +91 كيلو – ءناۆرۋزالى بەگاليەۆ (وزبەكستان).
