ارينە, قوعام تاعاتسىزدانا كۇتكەن پرەزيدەنتتىڭ ۇلىقتاۋ راسىمىندەگى ءسوزى – ازاماتتارىمىزدىڭ باستى ساۋالدارىنا بەرىلگەن ناقتى جانە تۇسىنىكتى جاۋاپ. وندا پرەزيدەنت ق.ك.توقاەۆتىڭ سايلاۋالدى تۇعىرناماسىنىڭ ەرەجەلەرى عانا كورىنىس تاۋىپ قويماي, ولارعا قول جەتكىزۋدىڭ نەگىزگى تاسىلدەرى دە بەلگىلەنىپ, جيناقتالعان تۇردە بەرىلگەن.
ساباقتاستىق قاعيداتى ەلباسىنىڭ قازاقستاندى ءۇشىنشى جاڭعىرتۋدى, بەس ينستيتۋتتىق رەفورمانى ىسكە اسىرۋعا ارنالعان باعىتىنىڭ, پرەزيدەنت «ەلباسى ستراتەگياسى» دەپ اتاعاننىڭ بارلىعىنىڭ وزگەرمەيتىندىگىمەن راستالدى.
سونىمەن بىرگە جاڭا تاسىلدەر مەن جاڭا شەشىمدەر ۋادە ەتىلدى, مەملەكەت باسشىسىنىڭ ايتۋىنشا, ولار وزدەرىن كوپ كۇتتىرمەيدى.
سونداي-اق تۇڭعىش پرەزيدەنت – ەلباسى وتكەن جىلدىڭ سوڭىندا جانە وسى جىلدىڭ باسىندا قالىپتاستىرعان قۋاتتى الەۋمەتتىك پاكەت وسى سالاداعى ەلەۋلى ناتيجەلەرگە قول جەتكىزۋ ماقساتىندا الەۋمەتتىك ساياساتتىڭ جاڭارتىلۋىمەن تولىقتىرىلاتىنى دا اسا ماڭىزدى.
بيلىكتىڭ ادامداردىڭ سۇرانىستارىن ەستۋ, جەرگىلىكتى جەرلەردەگى ماسەلەلەردى شەشۋ, ازاماتتار الدىندا جۇيەلى تۇردە ەسەپ بەرۋ مىندەتى ەرەكشە اتاپ ءوتىلدى. «ۋادە بەرمەي, ىستەۋ كەرەك!» دەگەن تەزيس ورتالىق جانە جەرگىلىكتى بيلىكتىڭ ءىس-ارەكەتتەرىن باعالاۋشى ۇستانىمعا اينالىپ, ول ادامداردىڭ ناقتى ءال-اۋقاتىنان كورىنىس تابۋعا ءتيىس. ادىلدىك قاعيداتىن راستاۋ دەگەنىمىز دە, مىنە, وسىندا جاتىر.
بارلىق سالاداعى – ەكونوميكالىق, الەۋمەتتىك جانە ساياسات سالاسىنداعى پروگرەسس قاعيداتىن پرەزيدەنت قازىرگى زامانعى سىن-قاتەرلەرگە بىردەن-ءبىر دۇرىس جاۋاپ رەتىندە قاراستىرادى. بىراق پروگرەستىڭ ءوزى دە ساندىق نەمەسە فيزيكالىق ءوسۋ رەتىندە ەمەس, ادامداردىڭ يگىلىگى ءۇشىن جاسالعان جاسامپاز وزگەرىستەر رەتىندە تۇسىنىلەدى. سوندىقتان قازاقستاندىق كاسىپكەرلەردى قولداۋ, ينۆەستيتسيالاردى تارتۋ جانە قورعاۋ, ىسكەرلىك بەلسەندىلىكتى ىنتالاندىرۋ نيەتى, سايىپ كەلگەندە, تۇراقتىلىق پەن بىرلىكتىڭ نەگىزى رەتىندە كەڭ اۋقىمدى ورتا تاپتى قالىپتاستىرۋدى بىلدىرەدى.
مىنە, وسى جەردە ءبىز مەملەكەت باسشىسىنىڭ قوعام مەن ازاماتتار ءۇشىن ماڭىزدى – قوعامنىڭ بىرلىگىن قامتاماسىز ەتۋ جانە ءاربىر ازاماتتىڭ قۇقىقتارىن قورعاۋ ماقساتىنا جاقىندايمىز. سايلاۋ ناۋقانى دا وسى الەۋمەتتىك سۇرانىستى قوعامدىق كۇن تارتىبىندەگى جەتەكشى ترەند رەتىندە العا شىعاردى.
ەكىنشى جاعىنان, مەملەكەت باسشىسى ۇلىقتاۋ راسىمىندەگى سوزىندە ءوز پرەزيدەنتتىگىنىڭ جاھاندىق ماقساتتارىن عانا ەمەس, سونداي-اق ولارعا قول جەتكىزۋدىڭ نەگىزگى تاسىلدەرىن دە اتاپ كورسەتە الدى.
مەملەكەتتىڭ ستراتەگيالىق ماقساتتارعا قول جەتكىزۋى ءۇشىن جاۋاپكەرشىلىگى ءبىر فورمۋلامەن تۇجىرىمدالدى: كۇشتى, وكىلەتتى پرەزيدەنت – ىقپالدى, ارەكەتكە قابىلەتتى پارلامەنت – حالىققا ەسەپ بەرەتىن ۇكىمەت. الايدا, ساياسي قوندىرما ءجۇرگىزىلىپ جاتقان ەكونوميكالىق وزگەرىستەرگە سايكەس بولۋى ءۇشىن ساياسي ترانسفورماتسيا پروتسەسى بەلگىلەنگەن.
بۇل پروتسەسس بيلىكتىڭ حالىق الدىنداعى جاۋاپكەرشىلىگىن ارتتىرۋ, ازاماتتىق قوعامدى دامىتۋ, بيلىك پەن قوعامنىڭ ديالوگى, سونداي-اق پىكىرلەر ءپليۋراليزمى ۆەكتورى بويىنشا قۇرىلاتىن بولادى.
بۇل جولداعى العاشقى قادام, بالكىم العاشقى كەڭەسى وسى جىلدىڭ تامىز ايىندا وتەتىن ۇلتتىق قوعامدىق سەنىم كەڭەسىن قۇرۋ بولۋى مۇمكىن.
ال پرەزيدەنتتىڭ سايلاۋالدى تۇعىرناماسىن ىسكە اسىرۋدىڭ ناقتى جوسپارى بارلىق جۇمىستىڭ ورتاق ءمانى بولىپ, وندا ازاماتتار مەن قوعامنىڭ تىلەكتەرى ەسكەرىلەتىن بولادى.
مەملەكەت باسشىسى پرەزيدەنت لاۋازىمىنداعى جۇمىسىنىڭ باسىمدىقتارى دەپ اتاعان 10 مىندەت بارىنشا ناقتىلىقپەن اتاپ كورسەتىلدى. ولاردىڭ قاتارىندا حالىقتىڭ تابىسىن ارتتىرۋ, سىبايلاس جەمقورلىققا قارسى كۇرەس, سوت رەفورماسى, جۇمىسقا ورنالاستىرۋ, جاڭا جۇمىس ورىندارىن اشۋ, تابىستى ءادىل ءبولۋ, تۇرعىن ءۇي ماسەلەلەرىن شەشۋ, ءادىل الەۋمەتتىك ساياسات, جالپىعا بىردەي وقىتۋدى قولداۋ, ساپالى مەملەكەتتىك قىزمەتتەر كورسەتۋ, وڭىرلەردى دامىتۋدىڭ جاڭا باعىتى, «رۋحاني جاڭعىرۋ» باعدارلاماسى, سىرتقى ساياسات جانە جاستار بلوگى بار.
سايلاۋ الدىنداعى تۇعىرنامادا بەلگىلەنگەن باعىتتار ارناسىندا مۇلدە كۇتپەگەن جانە جاڭا ۇسىنىستار ايتىلىپ, ولار ق.توقاەۆتىڭ ءوز باسەكەلەستەرىنىڭ حالىق اراسىندا تانىمال بولعان تەزيستەرىنە ايتارلىقتاي ءمان بەرىپ, شىن مانىندە بارشا قازاقستاندىقتىڭ «حالىقتىق» پرەزيدەنتى بولۋعا نيەتتى ەكەنىن كورسەتتى.
ولاردىڭ اراسىندا – «ءوسۋدىڭ ماڭىزدىلىعى», «سوت ادىلدىكتىڭ سوڭعى ينستانتسياسىنا اينالۋى ءتيىس», «كىرىستەردى ءادىل ءبولۋ – ستراتەگيالىق ماڭىزى بار ماسەلە», «حالىق وڭىرلەردەگى شەشىم قابىلداۋلارعا قاتىسۋى ءتيىس», «بوستاندىققا ۇمتىلۋ, حالىقتىڭ بىرلىگى مەن جاسامپاز كۇشى», «جاستار – پروگرەستىڭ قوزعاۋشى كۇشى», «پرەزيدەنتتىڭ كادرلىق رەزەرۆى» بار.
بۇل ۇسىنىستاردى قوعام دا, قازاقستاندىق ساياسي تاپ تا, مەملەكەتتىك قىزمەت تە ەستۋگە ءتيىس. ەستىپ, تاۋەلسىز قازاقستاننىڭ جاڭا تاريحى «ەسىك قاعىپ تۇرماعانىن», قازىرگى كەزدە «تابالدىرىقتان اتتاعانىن» تۇسىنۋلەرى كەرەك. سوندىقتان دا «پرەزيدەنتتىك ۋاقىت» قىسىلىپ, نىعىزدالا تۇسۋدە, ويتكەنى پرەزيدەنت ۇلىقتاۋ راسىمىندە سويلەگەن سوزىندە بەلگىلەگەن مەرزىمدەر – «تاياۋ بولاشاق تا» ەمەس, «ۇكىمەتتىڭ تاياۋداعى وتىرىسى», بيىلعى جىلدىڭ تامىز ايى, بۇگىن جانە ءدال قازىر.
بۇل دەگەنىمىز, ءبىز ءبارىمىز بىرگە جاڭا ساياسي تسيكلگە قادام باسقانىمىزدى ءبىلدىرەدى جانە قازىر ءبىزدىڭ اينالامىزدا – جاڭا شىنايى ءومىر.
جانسەيىت تۇيمەباەۆ,
قحا توراعاسىنىڭ ورىنباسارى
