رۋحانيات • 12 ماۋسىم، 2019

الماتىدا سۋرەتشى ماريس حيتاحۋنوۆتىڭ كورمەسى وتۋدە

255 رەتكورسەتىلدى

قازاقستان رەسپۋبليكاسىنىڭ مەملەكەتتىك ورتالىق مۋزەيى «ءالامات» پروديۋسەرلىك ورتالىعى جانە «ءشابنام» ۇيعىر كرەاتيۆتى قىزدار كلۋبىمەن بىرلەسىپ بەلگىلى ۇيعىر سۋرەتشىسى، ەڭبەك سىڭىرگەن ونەر قايراتكەرى، كسرو سۋرەتشىلەر وداعىنىڭ مۇشەسى، قازاقستان سۋرەتشىلەر وداعىنىڭ باسقارما مۇشەسى، پەداگوگ ماريس حيتاحۋنوۆتىڭ 80 جىلدىعىنا ارنالعان رەسپۋبليكالىق فەستيۆال ۇيىمداستىرىپ، «جەر-انا قۇشاعىندا» اتتى كوركەم شىعارمالاردىڭ مەموريالدىق كورمەسىن اشتى.

قر ورتالىق مۋزەيى كەلۋشىلەر نازارىنا العاش رەت م. حيتاحۋنوۆتىڭ (1939-1994 جج.) شىعارماشىلىعىن ۇسىنىپ وتىر. بالا كەزىنەن سۋرەت سالۋمەن اينالىسقان ماريس «جۇگەرى جيناۋ ناۋقانىنداعى اتا-انالارىمىزعا كورسەتكەن كومەگىمىز!» ۇرانىمەن 14-15 جاسىندا ورىنداعان پلاكاتىنىڭ ەسكيزى اۋدان بويىنشا ءى ورىندى، ءسال كەيىنىرەك رەسپۋبليكالىق  «درۋجنىە رەبياتا» گازەتى جاريالاعان سۋرەتتەر بايقاۋىندا ءىى ورىندى («كولحوزعا كومەك») يەلەنىپ، بولاشاقتا ءوزىنىڭ سۋرەتشى بولاتىنىن نىق ايقىندايدى. بۇدان كەيىن ول ن.كرۋپسكايا  اتىنداعى بۇكىلوداقتىق حالىقارالىق ۋنيۆەرسيتەتتە سىرتتاي ءبىلىم الدى.  ەڭبەك جولىن احتام اۋىلىنداعى مەكتەپتىڭ سۋرەت جانە دەنە شىنىقتىرۋ ءپانىنىڭ مۇعالىمى بولىپ باستاعان م. حيتاحۋنوۆ، سوڭىرا گوگول اتىنداعى الماتى كوركەمسۋرەت ۋچيليششەسىن جانە ا. وستروۆسكي اتىنداعى تاشكەنت تەاتر-سۋرەت ينستيتۋتىن ءتامامدايدى. ۇزاق جىلدار بويى ن. گوگول اتىنداعى الماتى كوركەمسۋرەت ۋچيليششەسى، الماتى ساۋلەت-قۇرىلىس ينستيتۋتى، و.تاڭسىقباەۆ اتىنداعى الماتى سۋرەت ۋچيليششەلەرىندە قىزمەت اتقاردى. م.حيتاحۋنوۆ قازاقستان سۋرەتشىلەر وداعى باسقارماسىنىڭ، قازاقستان مادەنيەت مينيسترلىگىنىڭ بەينەلەۋ ونەرى جونىندەگى ساراپتامالىق كوميسسياسىنىڭ، قازاقستان ءبىلىم جانە عىلىم مينيسترلىگىنىڭ «رەسپۋبليكالىق ەستەتيكالىق تاربيە باعدارلاماسىن» ورىنداۋ جونىندەگى عىلىمي-زەرتتەۋ كەڭەسىنىڭ مۇشەسى، قىتاي – قازاقستان دوستىق قوعامىنىڭ مۇشەسى بولدى.

شەبەر شىعارماشىلىعىندا كەسكىندەمەمەن قاتار ادەبي قىزمەت تە ماڭىزدى ورىن الادى. ماريس – «ارمان الەمى»، «ۋمۋت ۋچكۋنليري»، «پروششاي، لەتو»، «بەينەلەۋ ونەرىنىڭ نەگىزدەرى» قولجازباسى، مەرزىمدى باسپاسوزدە جانە «ۇيعىر ءتىلى جانە وقۋ» وقۋلىق قۇرالىندا جاريالانعان اڭگىمە، ءتۇرلى باعدارلامالار مەن دەرەكتى فيلمدەردىڭ اۆتورى. بەينەلەۋ ونەرىنە ارنالعان ورىس تىلىندەگى باعدارلامانىڭ ۇيعىر تىلىندەگى شىعارىلىمىنىڭ اۋدارماشىسى، ول ۇيعىر جازۋشىلارى مەن بالالار كىتاپتارىنىڭ يلليۋستراتورى رەتىندە دە تانىمال.

م. حيتاحۋنوۆ – رەسپۋبليكالىق، بۇكىلوداقتىق، حالىقارالىق كورمەلەردىڭ قاتىسۋشىسى. سۋرەتشىنىڭ بىرقاتار شىعارمالارى قازاقستان، رەسەي، تۇركيا جانە ت. ب. ەلدەردىڭ مۋزەيلەرىندە، جەكە كوللەكتسيالاردا ساقتاۋلى تۇر.  

ماريس حيتاحۋنوۆتىڭ ءومىرى جانە شىعارماشىلىق جولىن تولعاعان «جەر-انا قۇشاعىندا» كورمەسى سۋرەتشىنىڭ قىزى مۋحاببات حيتاحۋنوۆانىڭ شىعارمالارىمەن، سونداي-اق ۇيعىر سۋرەتشىلەرى جاڭا بۋىن وكىلدەرىنىڭ جۇمىستارىمەن دە تانىستىردى. سۋرەتشى-كەسكىندەمەشى، پەداگوگ، پرەزيدەنتتىك ستيپەنديانىڭ ەكى مارتە يەگەرى مۋحاببات حيتاحۋنوۆا  بۇگىنگە  دەيىن 200-دەن استام حالىقارالىق جانە رەسپۋبليكالىق كورمەلەرگە قاتىسقان.   

فەستيۆال اياسىندا ۇيعىر ۇلتتىق مۋزىكاسىنان كونتسەرت ۇيىمداستىرىلىپ، كورمەگە قاتىسقان جاس بۋىن سۋرەتشىلەر ماراپاتتالدى. ءىس-شاراعا ۇيعىر تىلىندە ءبىلىم بەرەتىن مەكتەپ-گيمنازيانىڭ وقۋشىلارى دا تارتىلىپ، ولاردىڭ اراسىندا وتكەن «مەنىڭ بالالىق شاعىمنىڭ الەمى» سايىسى نەگىزىندە 6-9 جاستاعى بالالار اسفالتتا سۋرەت سالىپ، ءوزارا جارىسقا ءتۇستى.

سوڭعى جاڭالىقتار

ۇقساس جاڭالىقتار