سونىمەن ەربول شايمەردەن ۇلىنداي تالانتتىڭ ارتىندا قالعان مۇراسىن كەيىنگى بۋىنعا جەتكىزۋ, اتىن جاڭعىرتۋ جۇمىستارى سوڭعى كەزدە قولعا الىنا باستادى. ءوزىن بالاپانداي باۋلىپ, قىرانداي تۇلەتكەن قازاق جوعارى ءبىلىمىنىڭ قارا شاڭىراعى قازۇۋ-دا ءدارىسحاناسى اشىلدى. كىندىك قانى تامعان, الىپتار ەلى قىزىلجار وڭىرىندە بارەكەلدى دەگىزەر جۇمىستار جالعاسىن تابۋدا. جاقىندا سونداي قايىرلى قادامدارعا كۋا بولىپ قايتتىق. ونىڭ ءبىرىنشىسى, م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە «اقىن جۇرەكتى قايراتكەر» اتتى ءدوڭگەلەك ۇستەل ەدى. وعان قارىمدى قالامگەرلەر ج.سۇلەيمەنوۆ, ق.جيەنباي, جۋرناليست-سازگەر ق.اعىباەۆ, پروفەسسورلار ق.تۇرسىنوۆ, ا.ىبىراەۆا,ز.تايشىباي, ج.قادىروۆ, مەكتەپ مۇعالىمى ءا.ق ۇلىبەكوۆا, وزگە دە زيالى قاۋىم وكىلدەرى قاتىسىپ, ەربول شايمەردەن ۇلىنىڭ ارتىندا قالعان ۇشان-تەڭىز مۇراسىنا جان-جاقتى تالداۋ جاساپ, ول الدىمەن جىر ءدۇلد ۇلى تۇمانباي مولداعاليەۆ ايتقان اقىندىقتىڭ اۋليە قۇسىن قولىنا قوندىرعانىن دايەكتەيتىن ورنەكتى ولەڭ جولدارىمەن العا تارتتى. سول سەكىلدى قازاق كوركەم پۋبليتسيستيكاسىندا دا ءوز قولتاڭباسىن قالىپتاستىرعانىنان, انگە ءسوز جازۋدا ۇلتتىق ۇلگىنى قاتاڭ ۇستانعانىنان, اۋدارما سالاسىندا دا قىرۋار شارۋا بىتىرگەنىنەن, وعان الەم ويشىلدارى مەن فيلوسوفتارىنىڭ قاناتتى قاعيدالارىنىڭ قادىرىن كەتىرمەي جۇرتىمىزدىڭ كەمەل تىلىندە كەرەمەت سويلەتكەنىنەن مىسالدار كەلتىردى. شاشاۋ شىقپاسىن دەگەن نيەتپەن جيىرما بەس عاسىرلىق, باعزى زاماننان بۇگىنگە دەيىنگى دانالىق داراقتارىن جيناپ «قازاق افوريزمدەرى» دەگەن كولەمدى جيناقتى تۇڭعىش رەت جارىققا شىعارعانىنا, ونداعى دارا دا دانا ۇلىلارىمىزدىڭ, ياعني ب.ز.د.V عاسىرداعى اناقارىس, توقسارى, تونىكوك, بىلگە قاعان, كۇلتەگىننەن باستاپ, ساعات اشىمباەۆقا دەيىنگى ۇلت جاقسىلارىنىڭ ايتقان وي ورامدارىنا دا كەڭىنەن توقتالدى.
دوڭگەلەك ۇستەلدەن كەيىن وعان قاتىسۋشىلاردى وبلىس اكىمى قۇمار اقساقالوۆ قابىلداپ, ەڭسەلى ازاماتقا قۇرمەت كورسەتۋ ابىروي ەكەنىن اتاپ, شىعارماشىلىعىمەن دە, قايراتكەرلىگىمەن دە حالقىنا شىنايى قىزمەت ەتكەن ەربول شايمەردەن ۇلىنا دەگەن ءىلتيپاتىن جەتكىزدى.
ەكىنشى شارا مەملەكەتتىك رامىزدەر كۇنىنە وراي, «تۇڭعىش ءرامىزتانۋشى ەربول شايمەردەن ۇلى» تاقىرىبىنداعى وقۋشىلار كونكۋرسى وبلىستىڭ جامبىل اۋدانىنداعى قوجابەرگەن جىراۋ اتىنداعى مەكتەپتە بولدى. سايىس باستالار الدىندا ەلدىڭ ەڭسەسىن تىكتەيتىن ۇلت رامىزدەرىن تۇڭعىش رەت حالىققا جەتكىزۋ, «بۇل توڭىرەكتەگى اسقار تاۋداي قيىن شارۋانىڭ ءبارى جاس قالامگەر ەربول شايمەردەنوۆتىڭ موينىنا جۇكتەلدى. ول ناعىز بايقاتپاي ءجۇرىپ ەل مۇددەسىنە ەڭبەك ەتە بىلەتىن شىن بەينەتقورلىق مىنەزىن تانىتتى. ول ءمىنەزى جاس تاۋەلسىزدىگىمىزدىڭ ءتاي-ءتاي باسقان العاشقى جىلدارىندا ابدەن كورىندى», دەپ ءسوز زەرگەرى, اقىل داناگويى ءابىش كەكىلباي ۇلى ايتقانداي, ەربول ۇلت جۇمىسىن اقاۋسىز اتقارىپ, ەل تانۋ ءىلىمىن قالىپتاستىرعانى تۋرالى اقيقات العا تارتىلدى. وقۋشىلار اراسىنداعى بۇل سايىس ءتورت باعىتتا, ناقتىلاي تۇسسەك 5-11-سىنىپ وقۋشىلارى وتان, ەل, جەر, رامىزدەرىمىز تۋرالى پاتريوتتىق اندەر ايتىپ, ولەڭ شىعارىپ, سۋرەت سالىپ, ەسسە جازۋدان باقتارىن سىنادى. بارلىق قاتىسۋشىلارعا سەرتيفيكاتتار مەن العىس حاتتار, جەڭىمپازدارعا باعالى سىيلىقتار تاپسىرىلدى. وسى ارادا ع.ءمۇسىرەپوۆ اتىنداعى ورتا مەكتەپتىڭ 8-سىنىپ وقۋشىلارى ا.بۇعاسوۆ پەن ج.تاسقوجين ەربول شايمەردەن ۇلىنىڭ شىعارماشىلىعى بويىنشا «قالامگەر مۇراسى بىزگە ونەگە» دەگەن تاقىرىپتا عىلىمي جۇمىس جازىپ, وبلىستا جۇلدەلى ورىنعا يە بولعانىن ايتا كەتەلىك. وسىنداي عىلىمي ىزدەنىستە ءجۇرگەن وقۋشىلارعا كۇلاش شايمەردەنوۆا ارنايى سىيلىق تابىس ەتتى.
ەربولدىڭ اتاجۇرتىندا وتىرعاندار مەكتەپتەن وعان ارناپ شاعىن بۇرىش اشىپتى. 95 جاستاعى العاشقى ۇستازى شاربان ءحاكىمقىزى بالالىق شاعىنان ەستە قالارلىقتاي ەستەلىكتەر ايتتى. الداعى ۋاقىتتا مادەنيەت ءۇيىنەن مۋزەي جاساقتاۋ نيەتىندە ەكەن.
ءسوز تۇيىنىنە كەلەر بولساق, سان قىرلى ساڭلاق, جۇرت رۋحانياتىنا وزىندىك ۇلەس قوسقان قايراتكەر ازامات ەربول شايمەردەن ۇلىنا الداعى ۋاقىتتا دا وسىنداي قۇرمەت كورسەتۋدى جالعاستىرا بەرسەك جاراسارى حاق. ەندىگى جەردە ءوزى سالعان ۇلگىمەن تۇڭعىش ءرامىزتانۋشى, العاش رەت قازاق ءافوريزمىن جۇيەلەۋشى, ەلباسىنىڭ ءبىرىنشى ءباسپاسوز حاتشىسى, قايراتكەر قازاق ەربول شايمەردەن ۇلى اتىنداعى ءىس-شارالار قاتارىندا وتانىمىزدا اتالىپ وتىلەتىن مەملەكەتتىك رامىزدەر كۇنىنە وراي, «تۇڭعىش ءرامىزتانۋشى ەربول شايمەردەن ۇلى» دەگەن تاقىرىپتا رەسپۋبليكالىق كونكۋرستار ۇيىمداستىرۋدى قولعا الساق, ۇتىلماس ەدىك. ءبىز اتاعان ۇسىنىس كيەلى قىزىلجار وڭىرىندە باستالىپ تا كەتتى. ەندى ول بايتاق ەلىمىز بويىنشا جالعاسىن تابارىنا سەنىمىمىز مول.
