جالپى, «امانات» پلاتفورماسى ءوز جۇمىسىندا بەس باعىتتى تاڭداعان – دايارلىق, ادالدىق, كاسىبيلىك, ديالوگ جانە سەنىم. وسى باعىتتاردىڭ ءارقايسىسى بويىنشا پلاتفورما بەلسەندىلەرى كۇنى-ءتۇنى تىنباي جۇمىس ىستەگەن.
بريفينگ بارىسىندا ءسوز العان پلاتفورما اكىمشىسى ليما دياس سايلاۋ بارىسىنداعى انىقتالعان بۇزۋشىلىقتارعا دا توقتالىپ ءوتتى.
– سايلاۋ بارىسىندا بۇزۋشىلىقتارعا قاتىستى 165 اۋىزشا ەسكەرتۋ جاسالدى, ونىڭ ءبارى دەر كەزىندە جويىلدى. قوسىمشا 18 ەسكەرتۋ سول ارادا تۇزەلگەن جوق نەمەسە بۇل كەمشىلىكتەر ەلەۋلى سانالىپ, ولار بويىنشا اكتىلەر تولتىرىلعان. سول 18 اكتىنىڭ ىشىندە 8-ءى سايلاۋ جاشىگىنە توپتاپ بيۋللەتەندەر سالۋعا قاتىستى بولدى, – دەدى ل. دياس. بۇل رەتتە ول سايلاۋدىڭ قازاقستان ءۇشىن ەرەكشە بولعانىن اتاپ ءوتتى.
پلاتفورما اكىمشىسى پرەزيدەنت سايلاۋىندا جاستاردىڭ وتە بەلسەندى بولعانىن دا ءسوز ەتتى. اسىرەسە ءوز ىقتيارىمەن بايقاۋشى بولۋعا ىنتا ءبىلدىرگەندەر سانى كوپ بولعان.
ۇيىم وكىلدەرى ءوز جۇمىستارىنىڭ باستى جەتىستىگى رەتىندە ەلىمىز بويىنشا ەڭ كوپ تاۋەلسىز بايقاۋشى دايارلانعانىن اتاپ ءوتتى. ماسەلەن, «اماناتتىڭ» 11 مىڭعا تارتا بايقاۋشىسى ەلىمىزدەگى سايلاۋ ۋچاسكەلەرىن تولىق قامتىعان.
«امانات» پلاتفورماسىنىڭ وكىلدەرى سايلاۋدان تۇيگەن ويلارىن قورىتا كەلە, بىرنەشە ماڭىزدى ماسەلەنى ىرىكتەپ العان. اتاپ ايتقاندا, قازاقستاندىق سايلاۋشىلاردىڭ ەلىمىزدىڭ زاڭنامالارىنان حابارسىزدىعى, تاۋەلسىز بايقاۋشىلاردىڭ سايلاۋ زاڭدىلىقتارىن تالاپ ەتە وتىرىپ, وزدەرى ساقتامايتىندىعى انىقتالعان. وسىدان كەلىپ قوعامعا قۇر ايقايشى ەمەس, زاڭدى بىلەتىن ادامداردىڭ قاجەتتىگى تۋرالى پىكىر قالىپتاسقان.
پلاتفورما وكىلدەرى سونداي-اق بايقاۋشىلارعا ساياسي مادەنيەتتىلىك ارتىقتىق ەتپەيتىنىنە كوز جەتكىزگەن.
