ەرەكشە اتاپ وتەر ءبىر ۇلگىنى بولە-جارا ايتۋدى ءجون كوردىك. ءبىلىم ورداسىنىڭ كىرە بەرىسىندە «ۇزدىك وقىرمانعا سىيلىق» دەگەن جازۋ قويىلعان ءۇش ۆەلوسيپەد تۇردى. مىنە, وسى ءۇش ۆەلوسيپەد يەلەرى انىقتالعان ءسات ەرەكشە ەستە قالدى. ولار وقۋعا ءتيىس ءجۇز كىتاپتى ەڭسەرگەندەر ەكەن. الدى 30 كىتاپتى وقىپتى. ءۇش جۇلدەگەر قاتارىندا سەگىزىنشى سىنىپ وقۋشىسى – ءمولدىر قۇربانباي, بەسىنشى سىنىپ وقۋشىسى – سىمبات مۇراتجانقىزى, ءتورتىنشى سىنىپ وقۋشىسى – ايالا سايلاۋ بولدى. قۇندىلىققا دەن قويعاندار وزدەرى تاڭداعان شىعارمالاردى وقىپ قانا قويماي, مازمۇنىن سىنىپتاستارىنا, ۇستازدارىنا, اتا-انالارىنا ايتىپ بەرۋدى داعدىعا اينالدىرىپتى.
– مەن بۇرىن تەلەفون مەن تەلەديداردان كوز المايتىن ەدىم. مەكتەبىمىزدە كىتاپ وقۋعا قۇلشىنىس باستالعاننان بەرى ودان تىيىلدىم دەسە دە بولعانداي. مۇحتار اۋەزوۆتىڭ, بەيىمبەت ءمايليننىڭ, بەردىبەك سوقپاقباەۆتىڭ, مۇقاعالي ماقاتاەۆتىڭ, وزگە دە اۆتورلاردىڭ تۋىندىلارىن وقىدىم. سونىڭ ءناتيجەسىندە وي-ءورىسىم ءوسىپ, جۇيەلى ءسويلەۋگە, ساۋاتتى جازۋعا, ىزەت-يناباتتىڭ قانداي بولاتىنىن بىلە باستاعاندايمىن. اسىرەسە, ۇلكەندى, اتا-انانى سىيلاۋدىڭ ۇلتتىق ۇلگىسىن تانىپ-بىلگەنىم انىق. ءبىز قازىر وتباسىمىز بويىنشا كىتاپ وقۋدى داستۇرگە اينالدىردىق. بۇرىن كىتاپ دۇكەنى دەگەندى بىلە قويمايتىن ەدىم. ەندى ءجيى بارامىن. اتتەڭ, قازاق كىتاپتارىنىڭ باعاسى وتە قىمبات, ارزانداتۋعا بولماي ما ەكەن؟ تاعى ءبىر ايتارىم, بالالارعا ارنالعان قازاق كىتاپتارى از كەزدەسەدى. ەسەسىنە ماسكەۋدەن شىققان ورىسشا كىتاپتار وتە كوپ, – دەيدى جەڭىمپاز وقۋشىنىڭ ءبىرى سىمبات.
ال مەكتەپ ديرەكتورى قۇرالاي بايتاجىكوۆانىڭ ايتۋىنشا, زاماناۋي تەحنيكالىق قۇرالداردى مەڭگەرۋگە ەش قارسىلىق جوق, بىراق ۇلتتىق, الەمدىك رۋحاني قۇندىلىقتاردىڭ ءجونى بولەك. ءبىز قۇندىلىقتىڭ باسى كىتاپ دەپ شەشتىك. وسىنى ءار اتا-انا قولداسا دەيمىز. ەڭ باستىسى, ۇل-قىزىمىزدىڭ دەنساۋلىعى قىمبات ەكەنى انىق. ءارتۇرلى زاماناۋي قۇرالدار وقۋشىنىڭ كوزىنە, قۇلاعىنا, ويلاۋ جۇيەسىنە كەرى اسەر ەتە باستاعانىن عالىمدار دالەلدەپ وتىر. ونى پايدالانىپ, بۇگىن تىنىش وتىرعان بالانىڭ ەرتەڭ جۇيكەسى سىر بەرسە, الگى تىنىشتىق بۇزىلماي قويمايدى. ءتىپتى ازابى مەن توزابىن اتا-انالار كورۋى مۇمكىن. ونىڭ كەيبىر كەرى اسەرلەرىن كورىپ تە, ەستىپ تە ءجۇرمىز. باستى ماقساتىمىز – ءبىرىنشى سىنىپتان كىتاپ وقۋعا باۋلۋ. ءار سىنىپتان كىتاپ بۇرىشىن اشىپ قويدىق, كىتاپحانا جابدىقتادىق. دالىزدەرگە دە كىتاپ قويۋ ءداستۇرىن قالىپتاستىرىپ كەلەمىز. ءار اپتانىڭ سارسەنبى, سەنبى كۇندەرىن كىتاپ وقۋ كۇنى دەپ بەلگىلەدىك. وعان ءبارىمىز قاتىسامىز. بۇل باستاما ورنىقتى دەۋگە بولادى. بيىل 2000 وقۋشىنىڭ ىشىنەن ونداعان وقۋشى ۇزدىك دەپ تانىلسا, ءۇش ۇمىتكەر جۇلدەگەر اتانىپ وتىر. ۆەلوسيپەدتىڭ وقۋشى دەنساۋلىعىنا پايدالى ەكەنىن دە ەسكەردىك. بۇل باستامامىز جالعاسا بەرەدى. ونىڭ ءتۇرلى جولدارىن ويلاستىرۋدامىز. وقۋشىنى ىنتالاندىرۋ جولدارى دا قاراستىرىلۋ ءۇستىندە. قولداۋشىلارىمىز دا, دەمەۋشىلەرىمىز دە تابىلىپ جاتىر, – دەيدى مەكتەپ باسشىسى.
شىنىندا, بۇل ۇلگى ۇيرەنەر ءۇردىس ەكەنى ءسوزسىز. بۇل باسقا ءبىلىم ۇيالارىندا دا جالعاسىن تاۋىپ جاتسا, نۇر ۇستىنە نۇر. ءتىپتى وسى يگىلىكتى ءىستى جۇزەگە اسىرۋ جايىن القالى جيىندا قوزعاپ, باستاماشىلار ءتاجىريبە الماسسا, اتا-انالار ءىلتيپات تانىتسا, بارىمىزدى باعالاپ, جوعىمىزدى تۇگەندەر ەدىك. ەڭ باستىسى, ۇرپاعىمىزدى تەلەفونعا تەلمىرۋدەن قۇتقارار ەدىك.
