№48386 اسكەري ءبولىم كومانديرىنىڭ تاربيە جانە يدەولوگيالىق جۇمىستار جونىندەگى ورىنباسارى, پودپولكوۆنيك ۆلاديمير ۋليانوۆتىڭ ايتۋىنشا, باتالون 11 بارلاۋشىلار روتاسىنان تۇرادى. «سۇڭقار», «ۇكى», «نايزا», «وربيتا» دەپ اتالاتىن روتالاردىڭ ارقايسىسى اۋە, قۇرلىق بارلاۋىمەن قوسا بايلانىس, جاۋدىڭ مۇمكىندىگىن انىقتاۋ سىندى جەكە مىندەتتەرگە جاۋاپ بەرەدى. ءبولىم 1962 جىلدىڭ 1 مامىرىندا قۇرىلعان. جابدىقتالعان وقۋ-جاتتىعۋ كەشەندەرىنەن بولەك زاماناۋي بارلاۋ تەحنيكاسىنىڭ ۇزدىكتەرى وسى جەردەن تابىلادى. اتاپ ايتار بولساق, ۇرلەمەلى «روتان» قايىعى, «د-30» ارتيللەريا گاۋبيتساسى, «كاماز» جانە «لەندروۆەر» ۇستىنە ورناتىلعان زەنيتتىك قوندىرعى مەن راديوستانتسيا, «ۆاسيلەك» مينومەتى, «بتر-80» جانە «ارلان» بروندالعان اسكەري تەحنيكالار – دەسانتشىلاردىڭ يەلىگىندە. بارلاۋشىلار كەلىسىمشارت نەگىزىندە قىزمەت ەتەدى ەكەن. اسكەري ءبولىم – رەسەيدە وتكەن حالىقارالىق جارىستاردىڭ بىرنەشە دۇركىن جەڭىمپازى.
ودان كەيىن دەسانتتىق-شابۋىلداۋشى بريگاداسى ازىرلەگەن كورىنىسىن تاماشالاپ, جاۋىنگەرلەردىڭ دايىندىعىنا كوز جەتكىزدىك.
اسكەري تەحنيكانىڭ مۇمكىندىگىن دالەلدەپ, جۋرناليستەردى تاڭعالدىرعان تاعى ءبىر جايت – ىلە وزەنىندەگى سۋدى تازارتىپ, ىشۋگە جارامدى ەتۋ. ول قاپشاعاي قالاسىندا ورنالاسقان دەسانتتىق-شابۋىلداۋشى اسكەرىنىڭ ينجەنەرلىك بولىمىنە تيەسىلى «ۆوز-4» تازالاۋ ستانساسى ارقىلى جۇزەگە اسادى. بۇعان جاۋاپتى قاتارداعى جاۋىنگەر ەلامان ەگىزباەۆتىڭ ايتۋىنشا, كولىك ىشىنە ورناتىلعان فيلتر ارقىلى 1 ساعاتتا 4 م3, ياعني 4 توننا سۋ تازالاۋ مۇمكىندىگى بار. بۇل قۇرىلعىمەن ءبىزدىڭ جاۋىنگەرلەر يراكتاعى تيگر وزەنىنىڭ سۋىن تازارتىپ, حالقىن اۋىز سۋمەن قامتاماسىز ەتكەن.
سۋ راسىمەن ىشۋگە جارامدى بولىپ شىقتى. ءبولىم قىزمەتكەرلەرىنىڭ ايتۋىنشا, قۇرىلعى وزەن سۋى ەمەس باتپاقتاردى دا وڭاي تازارتادى.
ودان كەيىن مينا ماماندارى – ساپەرلەردىڭ بازاسىنا اتتاندىق. «جاعالاۋ» ينجەنەرلىك-ساپەرلىك بريگاداسىنىڭ مايورى اسحات سەرجانوۆ كينولوگتاردىڭ جۇمىسىمەن تانىستىردى.
ينجەنەرلىك-ساپەرلىك پولك كومانديرى باقىتبەك تاجىباەۆ ساپەردىڭ قورقۋى تابيعي نارسە, قورىقپايتىن ساپەر جاقسى مامان بولمايتىنىن ايتادى.
ساپەرلەرمەن بىرگە «بەلگيا توبەتى» دە بولدى. اكيرا اتتى سەنىمدى سەرىك جۋرناليستەردىڭ سومكەسىنە الدىن الا جاسىرىلعان جارىلعىش تيپتەس زاتتى وڭاي تاۋىپ بەردى. سەرجانت سارسەنبەك ورازاەۆتىڭ ايتۋىنشا, يت تەك ءبىر ادامدى عانا تىڭداپ, يەسى ساناعاننىڭ بۇيرىقتارىن ورىندايدى ەكەن. تاپسىرماسىن ءساتتى ورىنداعان توبەتكە يەسى ويىنشىعىن بەرىپ, ەركەلەتىپ قويدى.
جۋرناليستەر قاۋىمى ءارى قاراي حيميالىق قارۋ, رادياتسيامەن زاقىمدانعان اسكەري تەحنيكا مەن اسكەرلەردى زارارسىزداندىرۋ جۇمىسىنا كۋا بولدىق. ارنايى تەحنيكا, تازالاۋ قۇرالدارىمەن ۇرىس الاڭىنان قايتقان كولىكتى تازالاپ, جاۋىنگەرلەردى سابىندى سۋمەن جۋىندىرادى. بۇل رادياتسيانىڭ تاسىمالدانۋىن الدىن الادى. ءبىر ساعاتتا ءبىر ۆزۆود 7-8 كولىكتى تازارتا الادى, ال تۇگەل روتا جۇمىلدىرىلسا, ءبىر اۋداندى تازارتىپ بەرۋگە كۇشى جەتەدى.
رادياتسيا, حيميا جانە بيولوگيالىق قورعانىس
باتالونىنىڭ كومانديرى ا.نازارباەۆ باتالون يادرولىق جارىلىستىڭ الدىن الۋ,
رادياتسيالىق, حيميا-بيولوگيالىق بارلاۋ, وسىعان بايلانىستى اقپارات جيناۋ, تالداۋمەن
دە اينالىساتىنىن ايتىپ ءوتتى. باتالون بەيبىت كەزدە توتەنشە جاعدايلار
كوميتەتىمەن دە بىرلەسىپ جۇمىس ىستەيدى ەكەن. «ءموبيلدى باتالون 2014 جىلى
قۇرىلدى. حيميا – جىلدام داميتىن, وتە ارزان قارۋ. كۇن ساناپ جاڭا تۇرلەرى تابىلىپ
جاتادى, سوندىقتان قۇرالدارىمىزدى دا ۇنەمى جاڭارتامىز. رادياتسيانى تەكسەرۋ, زارارسىزداندىرۋعا
قاجەتتى قۇرالداردىڭ بارلىعى بار. زارارسىزداندىرۋدىڭ تولىق جانە جارتىلاي ءتۇرى
بولادى» دەيدى مايور.
كورىپ كەلگەنىمىزدەي, بەيبىت كۇننىڭ ساقشىلارى ۇنەمى دايىندىق ۇستىندە. №58012 اسكەري ءبولىمى كومانديرىنىڭ ورىنباسارى رۋسلان جىلقىباەۆ «تىنىشتىق كەرەك بولسا, سوعىسقا دايىن بولۋ كەرەك» دەيدى.
بۇدان بولەك «ۋر-77» ارنايى تەحنيكاسىنىڭ مينادان تازالاۋ جۇمىسىمەن دە تانىستىق.
وسى وپەراتسياعا جاۋاپتى اعا لەيتەنانت ب.شوقان ۇلى ميناسىزداندىرۋ تەحنيكاسى ءبىر مەزەتتە 90 مەتر جەردى مينادان تازالاپ بەرەتىنىن ايتادى. حالىق اراسىندا بۇل ماشينانى «زمەي گورىنىچ» دەپ اتايدى.
جاۋىنگەرلەرىمىز ونەرلى دە بولىپ شىقتى. پرەسس-تۋر سوڭى كونتسەرتپەن ءتامامدالدى.
