اندرەي فومەنكو كورمەگە 2017 جانە 2018 جىلدارى ماڭعىستاۋ وبلىسىنا بارعان كەزدە تۇسىرگەن سۋرەتتەرىن قويعان.
اۆتور ءۇستىرت شوقىسى, سور ءتۇزبايىر, شەرقالا, ايراقتى تاۋىندا, كاسپي تەڭىزىنىڭ جاعاسىندا جانە ماڭعىستاۋدىڭ وزگە دە جەرلەرىندە بولعان. ول جەرگىلىكتى جەر بەدەرىن, جانۋارلار مەن وسىمدىك الەمىن, مازارلار مەن زيراتتار, پەتروگليفتەر, شاقپاق اتا مەشىتىن, جەرگىلىكتى تۇرعىنداردى سۋرەتكە تۇسىرگەن.
«كەز كەلگەن ادام اي, مارس, ۆەنەراعا بارا الماۋى مۇمكىن, بىراق ماڭعىستاۋعا بارا الادى. بۇل تابيعات جاعدايى وتە قاتال ايماق. وندا ءتىپتى تۇششى سۋ دا جوق, ەسەسىنە تۇز كوپ, جىلدىق ورتاشا تەمپەراتۋراسى وتە جوعارى. كليمات جاعدايىنا تابيعاتى دا ساي. قۇددى مەتافيزيكالىق الەمگە ءوتىپ كەتكەندەي. فيزيكالىق جانە مەتافيزيكالىق الەم اراسىنداعى ءدال وسى شەكارا مەنى تاڭداندىرادى. سۋرەتتەرىمنىڭ بارىنشا قاراپايىم, انىق, قاتاڭ, ءوزى بايانداپ تۇرعانداي بولعانىن قالادىم», دەدى ول.
سالاارالىق زەرتتەۋلەر كافەدراسىنىڭ پروفەسسورى, ونەر سالاسىنداعى پراكتيك, ونەرتانۋ عىلىمىنىڭ دوكتورى اندرەي فومەنكو سانكت-پەتەربۋرگ قالاسىندا تۇرادى جانە سوندا جۇمىس ىستەيدى. زەرتتەۋلەرىنىڭ نەگىزگى تاقىرىبى: سوۆەتتىك فوتواۆانگارد. سۋرەتكە ءتۇسىرۋ تەورياسى بويىنشا بىرنەشە كىتاپ شىعارعان. ورتالىق ازيانى جاقسى بىلەدى. اكەسى قىرعىزستانداعى ماناس اۋەجايىنىڭ قۇرىلىس جوباسىنا جەتەكشىلىك ەتكەن كەزدە بىرنەشە جىل سوندا تۇرعان. بىشكەكتەگى كوركەمونەر ۋچيليششەسىندە وقىعان.
