الماتى مەملەكەتتىك قۋىرشاق تەاترىندا كيەلى ونەر تابىستىرىپ, ومىردە دە قول ۇستاسىپ قاتار كەلە جاتقان 11 وتباسى بار. 30 اكتەرى بار شاعىن ۇجىم ءۇشىن از ەمەس. قۋىرشاقتاردى قيمىلداتىپ, بالا داۋىسىمەن نەشە ءتۇرلى جان-جانۋارلار مەن قۇستاردىڭ ءۇنىن, مىنەزىن سالىپ اندەتىپ, بيلەتىپ جۇرگەن اكتەرلىك ونەردىڭ اۋىر سالماعى مەن قىزىقتى جۇمىسىنا باس سۇققان ەرلى-زايىپتىلار ءوز شاڭىراعىندا دا بەرەكەسى تاسىعان, بىرلىگى بەرىك جۇپ ەكەنىن «باقىتتى وتباسى» تەاترىشىلىك بايقاۋىندا بار قىرىنان دالەلدەي ءتۇستى. تەاترعا كەلگەن ءار بالانىڭ جۇرەگىنە تەرەڭ ءۇڭىلىپ, سەزىم پەرنەسىن تاپ باسا الاتىن تالانتتى ارتىستەردىڭ ءتورت جۇبى ءوز بالالارىمەن بىرگە توپ قۇرىپ, وتباسىلىق سايىس كورىگىن قىزدىرعاندا, تەاترداعى ارىپتەستەرى ءبىردەي جانكۇيەرلىك جاساپ, ورتاق جەڭىس تىلەدى. سايىسقا تۇسكەندەردىڭ جاس ەرەكشەلىگى دە, وتباسىلىق قۇرامى دا ءارتۇرلى: مومىنجانوۆتار ءتورت بالانىڭ اتا-اناسى بولسا, جاڭادان شاڭىراق كوتەرگەن جولداسحانوۆتاردىڭ بوبەگى بەسىكتەن بەلىن ەندى كوتەرگەن. وتباسى تاربيەسىندەگى قاعيدالاردى نەگىزگە الا وتىرىپ, كەلەشەك ۇرپاققا ماردىمدى تاربيە بەرۋدى ماقسات ەتكەن جەتى بولىمنەن تۇراتىن سايىستا باق سىناعان ونەرلى جۇپتار ءوز ۇجىمى الدىندا جاڭا قىرلارىمەن تانىلىپ قانا قويماي, بايقاۋ قورىتىندىسىندا قوماقتى قارجىلاي سىيلىقتاردى دا ولجالادى.
«باقىتتى وتباسى» سايىسىنىڭ 3-ورنىن بەلگىلى تەاتر ارتىستەرى بولات جانە ۇلبوسىن مومىنجانوۆتار وتباسى يەلەندى. كورەرمەنىن حاريزماعا تولى بي مەن ەرەكشە يدەيامەن ويلاستىرىلعان بەينەجازبالارىمەن باۋراپ العان ۇلگىلى وتباسى ىنتىماقتارىنىڭ بەرىكتىگىن كورسەتتى. بايقاۋدىڭ جۇلدەلى 2-ورنىن تەاتردىڭ دىبىس ينجەنەرى ارشىن جانە تەاتر اكتريساسى گۇلبارشىن جولداسحانوۆتاردىڭ وتباسىنا بۇيىردى. كورەرمەندەر مەن قوناقتاردى تارتىمدى تانىستىرۋىمەن, جالىندارىمەن ءتانتى ەتكەن ۇيەلمەن كورەرمەندەر كوزايىمىنا اينالىپ ۇلگەردى. سايىستىڭ جۇلدەلى 1-ورنىنا تەاتر ءارتىسى شوقان مەن «كورەرمەندەرمەن جۇمىس» ءبولىمىنىڭ قىزمەتكەرى جۇلدىز قۇلنازاروۆتار يە بولدى. اسەرگە تولى بيىمەن, ەرەكشە ويىن ۇلگىلەرىمەن كوزگە ءتۇسىپ سايىستىڭ كورىگىن قىزدىرا ءتۇستى. ال «باقىتتى وتباسى - 2019» تەاترىشىلىك بايقاۋىنىڭ باس جۇلدەسىنە تەاتردىڭ بەلدى ارتىستەرى, ۇلگىلى جۇپتاردىڭ بىرەگەيى التاي جانە مارال تاۋەكەلوۆتەردىڭ اۋلەتى لايىق دەپ تانىلدى. وتباسىلارىن تانىستىرۋ تالابىن ءوز ماماندىقتارىمەن بايلانىستى ەتىپ دايىنداعان بەينەتۋىندىلارى كوپشىلىكتىڭ تاڭدانىسىن تۋدىرىپ, وتباسىنىڭ اۋىزبىرشىلىگىن, ءبىر-بىرىنە دەگەن سەزىمدەرىنىڭ كىرشىكسىز تازالىعىن كەرەمەت كورىنىستەرمەن بايانداپ بەردى.
الماتى مەملەكەتتىك قۋىرشاق تەاترىنىڭ ديرەكتورى تالعات قامقاباي ۇلى «قۇندىلىقتار قۇلدىراعان قوعامدا باقىتتى وتباسىلاردى ۇلگى ەتىپ كورسەتۋ, ونەر مەن ءومىردى ۇشتاستىرىپ جۇرگەن وتباسىلاردى ناسيحاتتاۋ – الەۋمەتتىك دەرتتىڭ الدىن الۋ جولىنداعى ءتيىمدى ءتاسىل» دەگەن پىكىر ءبىلدىردى. ۇلتتىڭ بولمىسىن بيىكتەتىپ, ۇرپاقتىڭ قاجەتىنە جارايتىن وسىنداي تاربيەلىك شارالار بارلىق جەردە جالعاسىن تابۋعا ابدەن لايىقتى.
الماتى
