سەمينارعا ەلىمىزدىڭ ءار ايماعىنان 95 دارىگەر: وبلىستاردىڭ شتاتتان تىس باس نەوناتولوگتارى, باس دارىگەرلەردىڭ نەوناتالدىق قىزمەت جونىندەگى ورىنباسارلارى, وبلىستىق جانە قالالىق پەريناتالدىق ورتالىقتاردىڭ, بالالار اۋرۋحانالارىنىڭ نارەستەلەر رەانيماتسياسى, پاتولوگياسى جانە شالا تۋعان بالالاردى كۇتۋ بولىمشەلەرىنىڭ مەڭگەرۋشىلەرى مەن دارىگەرلەرى, پەدياتريا ورتالىعى مەن كوز اۋرۋلارى قازاق عىلىمي-زەرتتەۋ ينستيتۋتىنىڭ ماماندارى مەن رەزيدەنتتەرى قاتىستى.
ءۇش كۇندىك سەميناردا باكتەريالىق سەپسيس جانە اۋرۋحاناىشىلىك ينفەكتسيانىڭ الدىن الۋ بويىنشا كلينيكالىق حاتتامالار, نەوناتالدىق جەلدەتۋدىڭ قاۋىپسىزدىگى, گوسپيتالدان تىس پنەۆمونيا, گوسپيتالىشىلىك ينفەكتسيا ماسەلەلەرى, نەوناتالدىق ينۆازيالىق ەمەس رەسپيراتورلىق دەمەۋدىڭ قاۋىپسىزدىگى, گيپوكسيالىق-يشەميالىق ەنتسەفالوپاتيا جانە زاماناۋي ەمدەۋ ادىستەرى, شالا تۋىلعاندار رەتينوپاتياسى, مەديتسينالىق كومەك كورسەتۋگە بايلانىستى ينفەكتسيانى تومەندەتۋ تاجىريبەسى, تۋا بىتكەن دامۋ اقاۋى بار نارەستەلەردى وتا جاساۋ الدىنداعى دايارلاۋ ستراتەگياسى, شالا تۋىلعان بالالاردىڭ ءومىر ءسۇرۋ ساپاسىن جاقسارتۋ ماسەلەلەرى قارالدى.
سەميناردا رەسەيلىك نەوناتولوگتار, رەانيماتسيا بولىمشەلەرىنىڭ مەڭگەرۋشىلەرى الەكساندر لي (سانكت-پەتەربۋرگ) جانە اندرەي اۆەرين (چەليابينسك) دارىستەر وقىدى, سونداي-اق قازاقستاندىق ماماندار, مەديتسينا عىلىمدارىنىڭ دوكتورلارى, پروفەسسورلار تامارا چۋۆاكوۆا, پەدياتريا ورتالىعىنىڭ باسشىسى ريزا بورانباەۆا جانە نەوناتولوگتار كونگرەسىنىڭ باسشىسى بەكتۇرعان كارين ارنايى باياندامالار جاسادى.
سەمينار «شەۆرون» كومپانياسى مەن «ايالا» قايىرىمدىلىق قورىنىڭ قولداۋىمەن وتكىزىلدى.
ءبىلىم بەرۋ سەمينارلارىن وتكىزۋ جانە تاجىريبە الماسۋ جاڭا تۋعان نارەستەلەرگە مەديتسينالىق كومەك كورسەتۋ ساپاسىن جاقسارتۋعا, ينفەكتسيالىق اۋرۋلاردىڭ الدىن-الۋ پروفيلاكتيكالىق شارالارىن كۇشەيتۋگە جانە ەلىمىزدەگى نەوناتالدىق قىزمەتتى دامىتۋعا ىقپال ەتەدى.
