دۇنيەجۇزىلىك دەنساۋلىق ساقتاۋ ۇيىمىنىڭ (ددسۇ) اقپاراتى بويىنشا, ونكولوگيالىق دەرتتەر – بۇكىل الەم بويىنشا بالالار مەن جاسوسپىرىمدەر اراسىنداعى ءولىمنىڭ نەگىزگى سەبەپتەرىنىڭ ءبىرى.
جىل سايىن الەمدە تۋىلعاننان 19 جاسقا دەيىنگى بالالار اراسىندا, شامامەن, 300 000 جەتكىنشەككە قاتەرلى ىسىك دياگنوزى قويىلادى. بالالار اراسىنداعى ونكودەرتتەردىڭ ەڭ كەڭىنەن تاراعان تۇرلەرى لەيكەميا, باس ميىنىڭ قاتەرلى ىسىگى, ليمفوما, نەيروبلاستوما جانە نەفروبلاستوما بولىپ تابىلادى. ددسۇ ماماندارى, ەگەر دەرت باستاپقى كەزەڭدە انىقتالسا, ولاردىڭ كوپتەگەن تۇرلەرىن ەمدەۋگە بولاتىندىعىن ايتادى.
بۇلدىرشىندە قاتەرلى ىسىكتىڭ دامىپ جاتقانىن كورسەتەتىن ءبىر قاتار بەلگىلەر بار. دەگەنمەن دەرتتەردىڭ كوپشىلىگى كوزگە كورىنبەي داميدى ءارى باسقا سىرقاتتارعا ۇقسايدى, سوندىقتان اتا-انالاردىڭ كوپشىلىگى ولاردىڭ قاتەرلى ىسىك ەكەنىن بىلە بەرمەيدى. سونىڭ سالدارىنان, سىرقات تەز كۇش الىپ, كوپ رەتتە, ەم قيىن قوناتىن كەش كەزەڭدە انىقتالىپ جاتادى. Anadolu (تۇركيا) ەمحاناسى, بالالار ونكولوگياسى بولىمشەسىنىڭ مەڭگەرۋشىسى, پروفەسسور الپ وزكان دەر كەزىندە دارىگەرلەردىڭ كومەگىنە جۇگىنىپ, ۋاقتىلى ەم الۋ ءۇشىن, اتا-انالار بۇل بەلگىلەردى ءبىلۋ كەرەك دەپ ەسەپتەيدى.
