ايماقتار • 31 مامىر، 2019

ۇلتتىق ۇلان اسكەرىندە جىلدىق تەحنيكالىق بايقاۋ وتۋدە

915 رەت كورسەتىلدى

ۇلتتىق ۇلان اسكەرى ەلىمىزدىڭ قاۋىپسىزدىك قالقانى بولىپ سانالاتىندىقتان ونىڭ تەحنيكاسى مەن قارۋ-جاراعى جانە قورعانىس قۇرالدارى ۇنەمى جاۋىنگەرلىك ازىرلىكتە بولۋى ءتيىس. ماتەريالدىق-تەحنيكالىق بازاسى مىقتى اسكەردىڭ قورعانىسى دا مىقتى. وسىعان وراي بيىل ۇلتتىق ۇلاننىڭ بارلىق اسكەري بولىمدەرىندە جىلدىق تەحنيكالىق بايقاۋلار وتۋدە، دەپ حابارلادى بۇگىن 28237 اسكەري ءبولىمىنىڭ اعا لەيتەنانتى ايدوس بايشاعىروۆ.

اتالعان بايقاۋ بۇگىن الماتى وبلىسى جامبىل اۋدانىنىڭ ۇزىناعاش اۋىلىنداعى ب. مومىش ۇلى اتىنداعى ۇلتتىق ۇلاننىڭ 28237 اسكەري بولىمىندە جالعاسىن تاپتى. بولىمدە تەحنيكالىق بايقاۋدى وتكىزۋ ءۇشىن ۇلتتىق ۇلاننىڭ باس قولباسشىلىعىنىڭ اعا وفيتسەرلەرىنەن قۇرالعان ارنايى كوميسسيا ءوز جۇمىسىن باستادى. بۇل ءىس-شارا اسكەري بولىمدە ەرەكشە باستالدى. ەڭ الدىمەن سالتاناتتى تۇردە ساپ تۇزەگەن جاۋىنگەرلەرگە ۇلتتىق ۇلان باس قولباسشىلىعى تەحنيكا جانە قارۋ-جاراق باسقارماسىنىڭ باستىعى پولكوۆنيك كونستانتين يۋرەۆيچ ۆورونكين قۇتتىقتاۋ ءسوز سويلەپ، بارلىق جەكە قۇرامعا تەحنيكالىق بايقاۋدان ويداعىداي وتۋگە ساتتىلىك تىلەدى. ءوز كەزەگىندە ءبولىمنىڭ ارداگەرى زاپاستاعى مايور سەيتقاسىم اليمساەۆ تا اسكەري قىزمەتشىلەرگە جالىندى تىلەگىن ارنادى.

ءداستۇرلى جىلدىق تەحنيكالىق بايقاۋ «جاۋىنگەرلىك جانۇياداي ۇيىسقان، ۇلتتىق ۇلان ەلى مەن حالقىنا قورعان!» اتتى جاۋىنگەرلىك ۇرانىمەن وتۋدە. وسىنداي جاۋاپتى كۇنى اسكەري قىزمەتشىلەردىڭ رۋحىن كوتەرۋ ءۇشىن جامبىل اۋداندىق «جاس ۇلان» وقۋشىلار ءۇيىنىڭ ونەرپازدارى اۋەلەگەن اندەرى مەن مىڭ بۇرالعان بي ورنەكتەرىن ارناپ جاۋىنگەرلەردىڭ كوڭىل-كۇيىن ءبىر سەرپىلتىپ تاستادى.

وسى ءىس-شاراعا تياناقتى تۇردە دايىندالعان ماتەريالدىق جانە تەحنيكالىق قامتاماسىز ەتۋ روتاسىنىڭ كومانديرى، كاپيتان جاسۇلان حاميتوۆ: «جىلدىق تەحنيكالىق بايقاۋدى تاپسىرۋ ءبىز ءۇشىن ماڭىزدى كۇن بولىپ تابىلادى. ەڭ باستىسى، ءبىز – باۋىرجانشىلار، تاعى دا ءوز ءىسىمىزدىڭ شەبەرى ەكەندىگىمىزگە كوز جەتكىزەمىز. ءبولىمنىڭ تەحنيكاسى مەن قارۋ-جاراعى قاشاندا  جاۋىنگەرلىك ازىرلىكتە، سوندىقتان ءبىز بۇل بايقاۋدان «وتە جاقسى جانە جاقسى» دەگەن باعا الاتىندىعىمىزعا سەنىم بىلدىرەمىز!» – دەدى.

اتالعان جىلدىق تەحنيكالىق بايقاۋ بولىمدە ەكى كۇن بويى جالعاسادى. تەكسەرىس بارىسىندا ءبولىمنىڭ تەحنيكالارى، قارۋ-جاراعى، ينجەنەرلىك، راديوحيميالىق جانە باكتەريولوگيالىق قورعانىس مۇلكى مەن بايلانىس قۇرالدارىنىڭ جۇمىس ىستەۋ ساپاسى، ولاردىڭ ازىرلىگى جانە دە جۇرگىزۋشىلەر مەن وفيتسەرلەردىڭ دە دايىندىقتارى باعالاناتىن بولادى.

سوڭعى جاڭالىقتار

اقسۋدا قارتتار ءۇيى ورتەندى

ايماقتار • بۇگىن، 09:57

ۇقساس جاڭالىقتار