جاپون پوپ مادەنيەتىندە تۇتاس باعىتقا اينالعان مونسترلار (گودزيللا, موترا, رودان, كينگ گيدور) كۇرەسى الپىس جىلدان بەرى نەبىر شىعارمالارعا ارقاۋ بولىپ كەلەدى. مايكل دوگەرتيدىڭ رەجيسسەرلىگىمەن جارىققا شىققان امەريكالىق فانتاستيكالىق بوەۆيك 2014 جىلى تۇسىرىلگەن گودزيللا ءفيلمىنىڭ جالعاسى. كينوتۋىندى سيۋجەتى گودزيللاعا ارقا سۇيەگەن ادامدار مەن الەمدى قيراتۋعا بەت العان پاتشا گيدور مەن ونىڭ جاقتاستارىنا قارسى قىرعي-قاباق كۇرەسىنە قۇرىلعان. العاشقى ءتۇسىرىلۋ جۇمىستارى 2017 جىلى 19 ماۋسىمدا اتلانتادا باستالىپ, كەي جەكەلەگەن بولىمدەرى مەحيكونىڭ تاريحي ورتالىقتارىندا جالعاستى. رەجيسسەر باس پەرسوناج گودزيللاعا قۇدايلىق سيپات ۇستەۋدى قالاپ, جىرتقىشتىق ايبارىن اسىرۋ ءۇشىن تىرناقتارى مەن اياعىن بىرنەشە ەسەگە ۇلكەيتىپ, داۋىسىن زورايتقان. ونىڭ ايتۋىنشا, بۇل 1954 جىلعى تۇپنۇسقا وبرازعا ءبىرشاما جاقىن.
ال ءفيلمنىڭ پارتيتۋراسى كومپوزيتور بەار ماككريريگە جۇكتەلدى. «جوباعا قاتىسۋعا شاقىرتۋ العاندا قاتتى تاڭداندىم. مەن ءۇشىن بۇل ۇلكەن مارتەبە. سۇيىكتى مونسترلارىمىز ءۇشىن مۋزىكانىڭ بار مۇمكىنشىلىگىن پايدالانامىن», دەيدى ول. تۋىندىنىڭ جارىق جۇلدىزدارى – ۆەرا فارميگا, كەن ۆاتانابە, ساللي حوكينس,چجان تسزىي جانە وزگەلەر. كارتينا كورنەكىلىگى مەن مۋزىكالىق سۇيەمەلدەۋى, ەكشن-ساحنالارى تۇرعىسىنان سىنشىلار تاراپىنان وڭ باعاعا يە بولدى.
31 مامىردان باستاپ اقش پەن كانادانىڭ 4100 كينوتەاترىندا كورسەتىلىپ, العاشقى دەمالىس كۇندەرىندە-اق 55-65 ميلليون اقش دوللارى كولەمىندە تابىس تۇسەدى دەپ بولجانىپ وتىر. الدىڭعى ءفيلمنىڭ ناقتى بيۋدجەتى ايتىلماعانىمەن, 160 ملن اقش دوللارى جۇمسالعاندىعى ۇزىن قۇلاقتان ەستىلىپ قالعان بولاتىن. رەجيسسەر گارەت ەدۋاردس ءتۇسىرىلىم توبى 400 ادامنان تۇراتىن مۇنداي ۇلكەن بيۋدجەتپەن جۇمىس ىستەۋ ادەتتەن تىس بولعانىن مويىنداعان ەدى.
