الەم • 30 مامىر، 2019

ۆيلنيۋستە «قازاقستانعا ىسكەرلىك جول» اتتى تاجىريبەلىك سەمينار ءوتتى

664 رەت كورسەتىلدى

قازاقستان رەسپۋبليكاسىنىڭ ليتۆاداعى ەلشىلىگى «Count line» كونسالتينگتىك كومپانياسىمەن بىرلەسە وتىرىپ، قازاقستاننان ارنايى شاقىرتىلعان ساراپشى ا.ماحمەتوۆتىڭ اتسالىسۋىمەن «قازاقستانعا ىسكەرلىك جول» اتتى تاجىريبەلىك سەمينار ۇيىمداستىردى.

سەمينارعا قازاقستانمەن ىسكەر ىنتىماقتاستىق ورناتۋعا قىزىعۋشىلىق تانىتقان ليتۆالىق ءىرى كومپانيا وكىلدەرى مەن كاسىپكەرلەرى قاتىستى. حالىقارالىق ىسكەرلىك باسقوسۋدا قازاقستاندا بيزنەس سالاسىن رەتتەيتىن نورماتيۆتىك-قۇقىقتىق زاڭنامالاردىڭ نەگىزگى قاعيداتتارىن ءتۇسىندىرۋ مەن ەلىمىزگە ينۆەستيتسيا تارتۋ جولدارىنا باستى ەكپىن قويىلدى.

شاراعا قاتىسۋشىلار قازاقستانعا ينۆەستيتسيا تارتۋ، ەركىن ەكونوميكالىق جانە يندۋستريالدى ايماقتار، ينۆەستيتسيالىق جەڭىلدىكتەر، سونداي-اق احقو قىزمەتى تۋرالى، جاڭا كەشەندى «ەكوجۇيە» جونىندە تولىق اقپارات الدى.

سالىق سالاسىنىڭ ساراپشىسى ا.ماحمەتوۆ قازاقستاندا شەتەلدىك كومپانيا وكىلدىكتەرىن قۇرۋ ماسەلەسى جونىندە جان-جاقتى كەڭەس وتكىزىپ (بيزنەستى تىركەۋ، شوت اشۋ، ەسق، قىزمەتتى ليتسەنزيالاۋ)، قازاقستاندىق سالىق كودەكسىنىڭ باسىم تۇستارىن اتاپ ءوتتى.

بۇدان باسقا، ساراپشى قازاقستانداعى كەدەن راسىمدەرى تۋرالى بايانداپ، ەەو ەلدەرىنە قازاقستان رەسپۋبليكاسىنان ونىمدەردى باجسىز شىعارۋدىڭ جانە «قورعاس-شىعىس قاقپاسى» ەركىن ەكونوميكالىق ايماقتا جەڭىلدىكپەن شەكارالىق ساۋدا جۇرگىزۋ مۇمكىندىكتەرىن اتاپ ءوتتى.

سەمينارعا قاتىسۋشىلار شارانىڭ ماڭىزدىلىعىن، تەرەڭ مازمۇنى مەن ءتيىمدى سيپاتىن جوعارى باعالادى.

سوڭعى جاڭالىقتار

ۇقساس جاڭالىقتار