سپورت • 30 مامىر, 2019

«چەلسي» ەكىنشى رەت ەۋروپا ليگاسىندا توپ جاردى

840 رەت
كورسەتىلدى
1 مين
وقۋ ءۇشىن

ازەربايجان استاناسى باكۋدە فۋتبولدان ەۋروپا ليگاسىنىڭ 2018/2019 ماۋسىمداعى فينالدىق ويىنى ءوتتى. فينالدا انگليانىڭ قوس كومانداسى «چەلسي» مەن «ارسەنال» كەزدەسىپ, «اقسۇيەكتەردىڭ» (4:1) جەڭىسىمەن اياقتالدى.

«چەلسي» ەكىنشى رەت ەۋروپا ليگاسىندا توپ جاردى

باكۋدەگى «وليمپيادا» ستاديونىندا وتكەن ماتچتا جانكۇيەرلەر بەس گولدىڭ كۋاسى بولدى. ءبىر قىزىعى, گولدىڭ بارلىعى ەكىنشى تايمدا سوعىلدى. ءبىرىنشى تايمدا ەكى كلۋبتا دا گول سوعاتىن تاماشا مۇمكىندىكتەر بولعان, الايدا شابۋىلدى ناتيجەلى اياقتايتىن فۋتبولشى تابىلمادى. ويىنداعى ەسەپتى ەكىنشى تايمنىڭ 49-مينۋتىندا «چەلسي» شابۋىلشىسى وليۆە جيرۋ اشسا, 60 مينۋتتا پەدرو ەسەپتى 2:0-گە جەتكىزدى. 65-مينۋتتا پەنالتيدەن گول سوققان ەدەن ازار, 72-مينۋتتا جيرۋدىڭ پاسىن ءتيىمدى پايدالانىپ, دۋبل جاسادى. ال «ارسەنال» ساپىنان جالعىز قارىمتا گولدى 69-مينۋتتا الاڭعا تىڭنان قوسىلعان الەكس يۆوبي سالدى. قورىتىندى ەسەپ – 4:1.

وسىلايشا, «چەلسي» كومانداسى ەۋروپا ليگاسىندا ەكىنشى رەت توپ جاردى. بۇعان دەيىن 2013 جىلعى فينالدا پورتۋگاليانىڭ «بەنفيكا» كومانداسىن جەڭىپ, العاشقى جەڭىسىنە قول جەتكىزگەن ەدى. ال «ارسەنال» كەرىسىنشە, اتالعان ءتۋرنيردىڭ فينالىندا ەكىنشى رەت چەمپيوندىقتان قۇر قالدى. 2000 جىلى ەۋروپا ليگاسىنىڭ اتى ۋەفا كۋبوگى بولىپ تۇرعان كەزدە تۇركيانىڭ «گالاتاساراي» كومانداسىنا ەسە جىبەرگەن ەدى.

سوڭعى جاڭالىقتار