بىرنەشە جىلدان بەرى ەلىمىزدىڭ تاريحي ماڭىزى بار ءارى كورىكتى جەرلەرىنە ساياحات جاساپ, ىشكى ءتۋريزمدى دامىتۋعا اتسالىسىپ جۇرگەن «Nomad Explorer» توبى بيىلعى شاراعا جامبىل وبلىسىن تۇڭعىش رەت قوسىپ وتىر ەكەن. بەلگىلى ساياحاتشى مارعۇلان سەيسەنباي باستاعان ساپاردىڭ العاشقى باعىتى ەكى مىڭ جىلدان استام تاريحى بار كونە تاراز قالاسىنان باستالدى. جوسپار بويىنشا ەكسپەديتسيالىق توپ تاراز قالاسىنان شىعىپ, الاتاۋدىڭ ەتەگىندەگى ورتاعاسىرلىق اقىرتاس تاريحي نىسانىنا باردى. سونىمەن قاتار ساياحاتشىلار تالاس وزەنىنىڭ وڭ جاعالاۋىندا ورنالاسقان تەكتۇرماس كەسەنەسىنە كەلىپ, ودان كەيىن قاراحان, ايشا ءبيبى جانە بابادجا حاتۋن كەسەنەلەرىنىڭ تاريحىمەن دە تانىستى.
بۇدان كەيىن جۋالى اۋدانىنىڭ بەرىكقارا شاتقالىندا ەلباسىنىڭ « ۇلى دالانىڭ جەتى قىرى» اتتى ماقالاسىنا وراي «قىزعالداق – جامبىل وبلىسىنىڭ تابيعي مۇراسى» تاقىرىبىندا عىلىمي-تاجىريبەلىك كونفەرەنتسيا ءوتتى. «اتالعان شارا ەلىمىزدەگى گرەيگ, كاۋفمان, زينايدا, بورششوۆ, كولپاكوۆسكي قىزعالداقتارى سياقتى ەندەميالىق وسىمدىكتەرگە جاستاردى ۇقىپتى قاراۋعا شاقىرۋ بولىپ تابىلادى. سونىمەن قاتار مۇنداعى گرەيگ جانە كاۋفمان قىزعالداقتارى قازاقستاننىڭ قىزىل كىتابىنا ەنگىزىلگەن. ءىس-شارانىڭ نەگىزگى ماقساتى – جامبىل وبلىسىنىڭ تاريحي جەرلەرىمەن قوسا, تابيعات كەرەمەتىن دە تۋريستەرگە تانىستىرۋ جانە ونى ساقتاۋدىڭ ماڭىزدىلىعىنا ءمان بەرۋ», دەيدى وبلىستىق تۋريزم باسقارماسىنىڭ باسشىسى قارلىعاش ارالبەكوۆا.
اتالعان عىلىمي-تاجىريبەلىك كونفەرەنتسياعا «اقسۋ-جاباعىلى» مەملەكەتتىك تابيعي قورىعى» رەسپۋبليكالىق مەملەكەتتىك مەكەمەسى, ءبىلىم جانە عىلىم مينيسترلىگىنە قاراستى بوتانيكا جانە فيتوينترودۋكتسيا ينستيتۋتى, قازاقستاننىڭ بيوالۋانتۇرلىلىگىن ساقتاۋ قاۋىمداستىعى, جامبىل وبلىسى اكىمدىگىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ قىزمەتكەرلەرى, جامبىل وبلىسى تۋريستىك فيرماسىنىڭ وكىلدەرى, بۇقارالىق اقپارات قۇرالدارى, ۇكىمەتتىك ەمەس ۇيىمدار وكىلدەرى, بلوگەرلەر مەن فوتوتىلشىلەر قاتىستى. كونفەرەنتسياعا قاتىسۋشىلار بەرىكقارا شاتقالىنداعى كوكتەمگى ءارتۇرلى ءوسىمدىكتەردى تاماشالاپ, جابايى قىزعالداقتار اياسىندا فوتوسەسسيالار ۇيىمداستىردى. سونىمەن قاتار مۇندا كوكپار, بايگە, توعىزقۇمالاق, اسىق اتۋ سياقتى ۇلتتىق ويىن تۇرلەرىنەن دە فەستيۆال ءوتتى.
