بۇگىندە قازاقستان اۋماعىندا جۇمىس ىستەپ تۇرعان حيميا يندۋسترياسىنداعى كاسىپورىنداردىڭ ۇزىن سانى 700-گە تاقاۋ. ونىڭ ءىشىندە ءىرى كەشەندەردىڭ سانى 10, ورتاشا كومپانيالار 13, قالعان 670 ۇساق مەكەمەلەر سانالادى. ال وسى سالادا ەكى قولعا ءبىر كۇرەك تاپقان حالىقتىڭ سانى 16 مىڭ ادامدى قۇرايدى.
«قازفوسفات» جشس تەحنولوگيالىق جەلىنى جاڭعىرتۋ ارقىلى فوسفورلىق مينەرالدى تىڭايتقىشتاردى شىعارۋداعى ءوندىرىستىك قۋاتتى 400 مىڭ تونناعا دەيىن ارتتىرعان.
بىلتىردان بەرى «قازازوت» اق ءوندىرىستى ءارتاراپتاندىرۋ باعىتىندا كۇردەلى مينەرالدىق تىڭايتقىشتار تسەحىن جاڭارتۋ جوباسىن ىسكە اسىرىپ جاتىر. اتالعان جۇمىس 2020 جىلعا قاراي اياقتالۋى ءتيىس. قۇنى 56,1 ملرد تەڭگە بولاتىن بۇل جوبا ىسكە اسىرىلسا, جىلىنا 400 مىڭ تونناعا دەيىن مينەرالدى تىڭايتقىش وندىرمەك.
بۇدان باسقا «دوستىق پوليمەر» جشس, «ينتەررين» عىلىمي-وندىرىستىك كاسىپورنى» جشس, سونداي-اق «ريمكازاگرو» جشس سىندى 7 جوبا ىسكە قوسىلىپ, 870 جۇمىس ورنىن اشۋ كوزدەلگەن. ونىڭ جالپى سوماسى – 60,8 ملرد تەڭگە.
جاقسىلىق مۇراتقالي,
«Egemen Qazaqstan»
