شارانى ۇيىمداستىرۋشىلار ترانسلياتسيانىڭ 450 جىلدان دا اسىپ كەتۋى مۇمكىن ەكەندىگىن ايتادى. ويتكەنى, پلاستماسسانىڭ تابيعي تۇردە جويىلۋى ونىڭ قۇرامىنا تىكەلەي قاتىستى بولسا كەرەك. سوندىقتان, ازىرگە ترانسلياتسيانىڭ قانشا ۋاقىتقا سوزىلاتىنىن ەشكىم بولجاي المايدى. دەگەنمەن, ەكولوگتار ترانسلياتسيا ارقىلى الەم حالقىنىڭ نازارىن قورشاعان ورتانىڭ لاستانۋىنا اۋدارۋدى كوزدەيدى ەكەن. ءارى پلاستماسسا ونىمدەردى تۇتىنۋ مولشەرىن ازايتۋ قاجەت ەكەندىگىنە دە كوپشىلىكتىڭ كوزىن جەتكىزبەك. ويتكەنى, بۇگىندە الەمدە 9 ملرد توننا پلاستماسسا بار ەكەنى انىقتالعان. ونىڭ 6 ملرد تونناسى قالدىق ەكەن. سول قالدىقتىڭ 10 پايىزى نەمەسە 600 ملن توننادان استامى مۇحيتتاردا قالقىپ ءجۇر. سونىڭ سالدارىنان جەر بەتىندەگى بارلىق تاسباقانىڭ تەڭ جارتىسىنىڭ اسقازانىنا پلاستماسسا قالدىعى تۇسكەن كورىنەدى. ال سۋ قۇستارىنىڭ 90 پايىزىنىڭ اسقازانىندا پلاستماسسا بار دەگەن بولجام ايتىلىپ ءجۇر. سونىمەن قاتار, عالىمدار سوڭعى 50 جىلدا پلاستماسسا قالدىقتارىنىڭ كەسىرىنەن جان-جانۋارلاردىڭ 20 پايىزىنىڭ تۇقىمى قۇرىپ كەتكەنى جايلى دەرەكتەر كەلتىرەدى.
10 مامىردا باستالعان ترانسلياتسيا بۇل ماسەلەگە كوڭىل اۋدارۋدى كوزدەگەن العاشقى شارا ەمەس. ءبىرىنشى ترانسلياتسيا 30 ناۋرىزدا پورتۋگاليا استاناسى ليسسابوندا باستالعان بولاتىن. ونداعى ترانسلياتسيانى ۇيىمداستىرۋشىلار وسى شارا ارقىلى ارنايى پەتيتسياعا 400 مىڭ ادامعا قول قويدىرۋدى كوزدەپتى. ءسويتىپ, الگى پەتيتسيانى بۇۇ-دا وتەتىن جيىنداردا الەم ەلدەرى جەتەكشىلەرىنىڭ نازارىنا ۇسىنۋدى كوزدەسە كەرەك. قازىردىڭ وزىندە پەتيتسياعا قول قويعاندار سانى ءاۋ باستاعى مەجەدەن اسىپ كەتتى. ال, Facebook ترانسلياتسيا كەيىن باستالدى.
